Read koorete Anxuttaasiti 4 Bible Online

Anxuttaasiti 4 - koorete bible

Anxuttaasiti 4

¹Phexhrosiyara Yohanisiyaray axituse zeeriya u yesune kahinitaara Wonto Hayla Zawa kakkicha afana maagaaray yeydiwo Sodoqaxitaaray hanke usuko u uddho.

²Phexhrosiyara Yohanisiyaray axituse ohisine Yesuusana benta haybo denxose u erusso gisha iitana u huullo.

³Usoni ayti sahay qandi yecho gisha e wontoro aallo tufe zawa u gelso.

⁴Yeysi u matakoni kato siidasitaafa lagiti Wonto u aadesso. Ye aadessa asanxiti taaboy ichichi kuma aallo e maaddho.

⁵Gutani u afana maagitaara, gate cimitaaray Muse woga eruseesitaara, kahinituse afana ade Haannani, Qayaafani, Yohaniseni, Iskindireni, kahinituse afana ade iginitini be uddina Yerusaleeme u bhikkilutto.

⁷Phexhrosiyara Yohanisiyara be buro essi <<Aba osanani oo'oyne oone sunxunani ha esa hi mato?>> hidi hissine u oycco.

⁸Phexhroseni yenniya Ayaana Geeshi essa kundine ususe zeerisine <<Hinuno afana maagito, cimito!

⁹Hanzo ha dooma maaqicha axuse hantutta modhe hanta gisha <Ha esi abanani e loollo?> hidi numba modhussi hi oyccako

¹⁰hinuni suxhine Wontoy haybowafa denso Nazrataxi Yesuusi Kristosa sunxuna ha esi dendi hi buro e eedhonike hinunaaraydi Isra'eelaxitaaraydi uddi ha esa modhussi eruwayte!

¹¹<Hinuni shuchuna keexhichashiti haassi hi dattecho shuchi hade boorey keexe aykenike zawa ayke shuchuko e maaddho> hidi hiyuttasi Yesuusako.

¹²Looloy fedana oonenani baasso. Loolese esuna ni danda'esi ha saha wosula aallo axuse ingutta sunxi feday baasso>> yeydi e hido.

¹³Phexhrosiyara Yohanisiyaray naassi zeerdosa be beedoniyaka erunxe keenguwa axita u maaqichosha gaxxhi fettona u micco. Yesuusaara wolko u yechoshani u gaxxho.

¹⁴Ye loolla adeni usaara ee'iya yesune beedi ususe beynesa u dheeddo.

¹⁵Gate aheesiti beekafa wude u kesoronike mati wolla sekke hanke u kundo.

¹⁶Kungisineni <<Ha geriti gara am nu hanto? Yerusaleeme yeseesituse uddi eruttese hantay u badena micusheshi hantuttosi addeydi e yese gisha <Maaddho baasso> hidi hiyese danda'uwanxhiko.

¹⁷Ye e gisha axi giddaa aatti e lageeme ha makkina sekke ooneseni Yesuusa sunxuna u zeeruwannikeko kasshi ni ohhe>> hidi hissine wolla u kundo.

¹⁸Uso xheydi Yesuusa gisha fettona u zeeruwanikiyara u erusuwanikiyara u kassho.

¹⁹Maaqe baaka Phexhrosiyara Yohanisiyaray sekke mati <<Wontoy e worgesi esuse siyekofa hinuse nu siyorosuwani? Mee, am hinuse e bishe?

²⁰Nunimay nu beedosaara nu siidosaara zeerdo badi dhabese danda'uwanxhiko>> yeydi u hido.

²¹Maaddha zeerena axiti Wonto galaticho gisha gate aheesitini axita jhasshi Phexhrosiyara Yohanisiyara u gara esuna be yaa'e zeere dheeddi sekke kasshi u datto.

²²Ye micushe hantana loolla ade beray oyddi tammi bera garesako e maaqicha.

²³Phexhrosiyara Yohanisiyaray dafutti be baditi gara yoodi Wonto zawa kahinituse afana maagitaara gate cimitaaray u gara zeerdosa uddi u oto.

²⁴Usini be siido woggaa bidzi muxhurona be kato keddaysi Wonto shi'isine <<Uddiyade kaato nu Wonto, neni afani sahani bagadeni ussaa yesesani uddi meddhasuko.

²⁵Ayaana Geeshi badena nuuse ade maaqe ne maraxe Dawitena zeerisine <Ayhuda maaquwa ha saha gara yese axiti huulana ame u eexho? Laga axitini maruwa zeerita ame u masso?

²⁶Saha kaataxheni toorase biya naddhi afana aheesiti bhikkilutti Laaxi garaara ne Mesihe garaara wolla u dendo> hidi hidechashi Wontoy nenko.

²⁷Aadewo Herodisiyara Phenxhenaxi Philaxhosiyaray Ayhuda maaquwasitaara Isra'eelaxitaara ha katamaaka wolko bhikkilutti ne tissho Mesihe maaqe hayla ne maraxi Yesuusa gara u dendo.

²⁸U bhikkiluttosi burowo ne osanaara ne massechonikiyara <Maaquwaye> hidi hissine ne otechoshi aaloronikeko.

²⁹Hatteni Laaxo, u kashesha beewwa! Ne hantaxiti naassi ne kato ohoronike mahuwa.

³⁰Hayla ne yele Yesuusa sunxuna hargaxiti looloronikiyara micushe hantaara du'use zeeriyaray maaqoronike ne osa anxuwa!>> yeydi u shidho.

³¹Wonto u shidhosi geede bhikkilutti u yecho godoy sekke hanke e en'o. U uddiyakani Ayaana Geeshi kundo. Wonto katoni jhashe baa naassi u oto.

³²Aadesi yechashitini bidzi muxhurona bidzi maxona u yecha, u keengicho abakoy uddi kooxewo e maaqichosha baaka yesesaafa bidzi axi <<Ha esi taasuko>> yeydi hinesi badiko yecha.

³³Anxuttaasitini orje osana Laaxi Yesuusi Kristosa denxo gisha u ohicha. U uddi gara Wonto suusini orjena e yecha.

³⁴Saha oo'oyne zawa keengeesiti ooneni zal'i ye miijhe u oocho gisha bidzi jheetaxini u gidda badiko yecha.

³⁵Be miijheni oodi anxuttaasituko u ingicha, u bidzi bidzise e worguse aallo miijhe u ingicha.

³⁶Be yeluttenani Qophrose dhaanaxe maaqicha e ommay Lewe maaqe bidzi Yoosefe sunge adey e yecha. Anxuttaasitini esa Barnabase hidi u xheygicha. E birchey <<Osuse axe>> hidi hiyoko.

³⁷Sahani zal'i miijhe oodi anxuttaasituko e indo.