Read koorete Anxuttaasiti 5 Bible Online

Anxuttaasiti 5 - koorete bible

Anxuttaasiti 5

¹Hanaaniya sunge bidzi adey be machi Saphiraara wolko saha e zal'o.

²Ye be zal'echo saha miijhiyafa bade beese shati bade etti oodi anxuttaasituko e indo. Ha esani e machi i ericha.

³Phexhroseni <<Hanaaniya, ne zal'echo saha miijhiyafa shati Ayaana Geeshe ne qaarusoronike abasun Humbayey ne muxhurowa kundo?

⁴Ne zal'o baanne sahay neese maaquwadiya e yecha? Ne zal'o geedeni miijhe gara adeto keenguwadiya ne yecha? Haanke yese zeere abasuna ne muxhurowa ne masso? Wonto garako baaka axi gara maaquwasso ne zaaddosi>> yeydi e hido.

⁵Hanaaniyani ye kato siidi undi e haydho. Ye esa siidasiti uddi orjena u jhassho.

⁶Mullitini dendi aha acci kessi u mooddo.

⁷E machi haydzi saate ellesa decci gaddi maaddha base erdo badi yoodi i gello.

⁸Phexhroseni <<Taako ohuwa, hi saha ha esawa hi zal'o?>> yeydi e oycco. Isini <<Eewa, ha miijhewoko>> yeydi i mato.

⁹Phexhroseni <<Laaxi Ayaana naadhi hi beyoronike ame wolla hi kundo? Hay, ne ade moodda axiti sumaako yoodese. Nembani ettiko u kese>> yeydi e hido.

¹⁰Yenniyawo e toke da'aa undi i haydho. Mullitini yoodi haydhi i yesune beedi kessini i ade da'aa aandi u mooddo.

¹¹Wonto zawa axitaara maaddhase siidasitaaray uddi orjena u jhassho.

¹²Wontoy anxuttaasituna laga du'usesaara micusheshaara axi laga gidda hantiya e yecha. Aadexeesiti be uddina bidzi muxhurona maaddhi Salamone karaa u bhikkilutticha.

¹³Usume feday bidzini usaara wolla kessi gelese naassesi badiko e yecha. Naasse dheebuttuwaye baaka axiti uso kuxiyako yecha.

¹⁴Laaxe aadexeesiti burome gardi u taafo gara u kosutticha, asanxitani maaqqe indowaxhiti taafoy orjena lagako u maaqicha.

¹⁵Anxuttaasiti laga micushe hanta u hanticho gisha Phexhrosey garusune e leemoy fetto bidzi bidzi garana garorosa hargaxita ogiyaka kessi algakaara essa woyxuso abakowakara u woyxicha.

¹⁶Yeydiwo Yerusaleeme googe yecha katamaafa hargaxitaara xhoozi uso maddhunsi yecho axitaara oodi lagita u bhikkilicha, uddinani u loolicha.

¹⁷Yenniyani kahinituse afana adey esaara yecha Sodoqaxiti bade maaqeesiti uddi orjena uso dhiiddhi dendi

¹⁸anxuttaasita ayti tufe zawa u gelso.

¹⁹Maaqe baaka Laaxi woosaxi qama tufe zawa gasa dodhi kessi

²⁰<<Wonto Hayla Zawaaka handi eedhi uddi ha yeso kato axuse ohuwayte>> yeydi e hido.

²¹Ye esani siidi ketiya sho'e Wonto Hayla Zawaa gelli eruse u ayto. Yenniyani kahinituse afana adiyara esaara yechashitaaray yoodi gate aheesitaara Ayhudaxiti cimitaara uddina bidzi godo u bhikkillo. Phexhrosiyaxhita u ooworosani tufe zawa yebita u anso.

²²Usini tufe zawa handi uso degexe dheeddi maaddhi yoodini

²³<<Tufe zaway moddhi aykutti kakkeesiti wudena sumaa ee'iya u yesuneko nu beedo. Aykutti yesuwaye baaka nu dodhine essaaka ooneni badiko yecha>> yeydi u hido.

²⁴Wonto Hayla Zawa kakkichashituse afana maagaara kahinituse afana maagitaaray ye zeere be siidoniya <<Haha'e, ha esi am maaqese hine?>> hidi u buro e baado.

²⁵Bidzi axini usuko yoodi <<Tufe zawa hi gelsecho axiti Wonto Hayla Zawa qeyshi giddaa eedhiko axitani erusiya u yese>> yeydi e oto.

²⁶Yenniyani Wonto Hayla Zawaa kakkicha maagaara e yebitaaray handi laga axiti bemba icci wodheesumeni hooddi koysi baa ogena uso etti u yoodo.

²⁷Gate aheesiti buroni oodi u esso. Kahinituse afana adeni

²⁸<<Yesuusa sunxuna hi erusuwannike minsi hinumba tucco badiya nu yecha? Maaqe baaka Yerusaleemey hi eruso eranako e kundo. Ye axi suuxe nu gara mahesuwa hi maxe?>> yeydi uso e oycco.

²⁹Phexhrosiyara fede anxuttaasitaaray <<Numba e worgusesi axuse woosuttekofa Wontose woosutteko.

³⁰Hinuni mixi gara suxxhi woddhecho Yesuusa nuwadiyaxhiti Wontoy esa denso.

³¹Ye Yesuusanani Isra'eelaxiti be cubbowafa dhaddi u maaqoronikiyara maaroni u degexoronikiyara e mahorosa durkesaara loolusesaara mati modhussi kussi kuxa godo e uttusso.

³²Nunini ha zeerese atoko, Wontoy woosutteesituse indo Ayaana Geeshini atoko>> yeydi u hido.

³³Gate aheesitini ye esa be siidoniya fettona u huullo, usoni wodhese u masso.

³⁴Maaqe baaka axi uddi esa kuxicho Gamaliya sunge Muse woga erusicha bidzi Farasaxi gate aheesiti giddaa e dendo. Anxuttaasita oddhe woggase wude u kesoronike be oto geede

³⁵gate aheesituseni <<Hinuno Isra'eelaxito, ha axiti gara abako hanteeme e buro naddhi gaxxhi beyeko hinumba e worguse.

³⁶Ha esume buro Tadoosey <Tani angussuko> yeydi hinesi e dendo. Oyddi xhiixe elle axitini esaara wolla u kundo. Esini wodhutto, esaara kungichashitini uddi budutti u baado, u massechoshini atto.

³⁷Ye e geede assi axiti sunxi diizutto bera Galila wude axi Yuuday dendo. Laga axitani beera u hamoronike mati e yecha. Esini baado, esaara kungichashitini uddi budutto.

³⁸Hatteni hinuse ta ohesi u gara zeerdofita, usoni dhagguwayte. Ha maxoy oo'oyne ha hantay axi garafa maaqo'ayko baattako e baane.

³⁹Wonto garafa e maaqo'aykoma uso buddi baysese danda'uwaytako. Yeysi hi maho'ayko fetto Wonto gara hi dendosako e maaqe>> yeydi e hido. Ye esani siidi u etto.

⁴⁰Anxuttaasitani beeko oodi u durdo. Yesuusa sunxuna u zeeruwannike kasshi u datto.

⁴¹Usini e sunxi gisha eeretey u gara yoodosi bishesha maaddhi taabutto gisha gaxxhi gate aheesiti burowafa maggisine u kesso.

⁴²Uddi wonte burse baaka Wonto Hayla Zawaakaara wol zawaakaara hanti <<Ha Yesuusaydi hiyuttesi Mesiheko>> hidi erusiyakaara modhe odo ohiyakaara u yecha.