Read koorete Anxuttaasiti 6 Bible Online

Anxuttaasiti 6 - koorete bible

Anxuttaasiti 6

¹Ye woggaani Laaxi oge hangeesiti u laddo. Yenniya fede wudefa yooda Ayhudaxitaara yaha yecha Ayhudaxitaaray wolko yaha u yecha. Fede wudefa yooda Ayhudaxiti beera yecha u adey baadese indowaxhituse wontana wontana shahutti ingutticha kaxaafa yaha yecha Ayhudaxiti inge u dheeddinne uso gunce u ayto.

²Tamma lam'i anxuttaasiti aadexichashita uddina bhikkilli <<Kaxa shaheme hissine Wonto kato eruse dhabey nuuse bishuwassho.

³Yebo, nuundo na'axhito, laappi axita hinukaafa xharuwayte. Axi uso modheko hidi hineesita Ayaana Geeshuna kundeseesita gaxe keengeesita maaqeko uso e worguse. Ha hantasuko uso nu maagexe.

⁴Nunimay shi'e garaara kato ohe garaarako nu oseyne>> yeydi u hido.

⁵Ye uddha maxo axi uddi maggana etti u xhardo. Ye usini aadexonaara, Ayaana Geeshunaara kundese Isxhifanoose, Filphoose, Prokorose, Niqanore, Xhimoone, Pharmeene, Ayhuda woga etti u Wonto kuxicha Anxhokiyaxe maaqe Niqoloose yeysi u xhardo.

⁶Anxuttaasiti buro uso u uqusso, ususeni be shidho geede be kuche u gara u gaddo.

⁷Wonto katoy aatti e hando. Yerusaleeme Laaxi oge hangeesiti taafoy orjena e laddo. Wonto Hayla Zawa kahinittaafa lagiti Wonto u aadesso.

⁸Isxhifanooseni Wonto suusaara e osaaray essa kundinne axiti gidda micusheshaara orje du'usesaara hantiya e yecha.

⁹Yenniyani <<Maaketowafa Keseesesiti Bhikkilo Zawa>> hidi hiyutte Ayhuda Bhikkilo Zaway e yecha. Qarana katamafaara Iskindiriya katamafaara fedeesiti assi Kilqiyafaara Isiyafaara yooda Ayhudaxiti ye Bhikkilo Zawaaka wolko u yecha. Usini dendi Isxhifanoosiyara u bersicha.

¹⁰Esuna e zeericho era Ayaanay indo gisha esa iicheshe danda'utto baasso.

¹¹Sekke <<Ha axi Musiyara Wontowara e cashushuneko nu siido>> yeydi hine gerita e gara suqussi u densicha.

¹²Axitani gate cimitani Muse woga eruseesitani e gara u denso. Usini Isxhifanoose ayti gate aheesiti buro u uqusso.

¹³Zaade ateyne bidzi bidzi axita u oodine <<Ha axi Wonto Hayla Zawaara Muse wogaara cashe garafa biya kakkuwasso.

¹⁴Esini zeerisine <Nazrataxi Yesuusay Wonto Hayla Zawa budoko e bude, Musey nuuse garsecho wogani arxako e arxe> yeydi e hisuneko nu siidese>> hidi hissine u zeerdo.

¹⁵Yaha uttiya yecha gate aheesiti uddi Isxhifanoose aafiya caddi u beesune hade Wonto woosaxi aafushake e aafushay maaddhesune u beedo.