Read koorete Anxuttaasiti 7 Bible Online

Anxuttaasiti 7 - koorete bible

Anxuttaasiti 7

¹Kahinituse afana adey Isxhifanoose <<Ha zeerey aadiya?>> yeydi e oycco.

²Isxhifanooseni ohisine <<Nuundo na'axhito, nuwadiyaxhito, siwwayte! Keddaydese kuxa fuula keenge nu Wontoy nuuse ade maaqe Abrahaamese Kaarane wude handi e uttosume buro Masphotoome wudiya e yesune esuse addeydi,

³<Ne wudiyafa, ne iginitaafa dhaddi kessi niya ta beysoro wudiya hanguwa!> yeydi e hido.

⁴Ye woggani Keledaxiti wudiyafa kessi Kaarane wude handi e utto. Yahafani esadey haydho geede Wontoy hanzo essa ni yese ha wudiya e oodo.

⁵Yenniyani haya e toke bale elle saha esuse indo baasso. Maaqe baaka yele haga yello badi e yesune esuseni e nayshi nayshusheni essaa u yesesa u wude mati be ingenike esa e gobbusso.

⁶Wontoy esuse <Ne nayshi nayshi fede wude handi yaha yesoronikeko e maaqe, oyddi xhiixi berako ye wudaxiti uso maala mati u maddhunxe.

⁷Ye be maala mati uso ahe axiti gara yenniya yaa'ako ta yaa'e, ye e geedeko ye wudefa dhaddi kessi ha godowaka taa u kuxe> yeydi e hidecha.

⁸Caaqoseni gada utte woga e gaddo. Hinne Abrahaameni Yissaaqe yelli hazzunxo wonte gada e uttusso. Ye esuke Yissaaqeni Yayqoobe, Yayqoobeni tamma lam'i eruttese nii yella adiyaxhita gada u uttusso.

⁹Yayqoobe na'axhiti Yoosefe dhiiddhi maala e maaqoronike Gibxhe wudaxi gara u zal'o. Wontomay esaara yesine

¹⁰e maddhaafa uddi e kesso. Wontoy esa Gibxhe kaati eehoronike mati esuse era e indo. Ye kaati Gibxhe wude garaara be zawa garaara afana maaga mati e maagesso.

¹¹Gibxheni Kene'aane wudeni uddi naayey undine iita maddhaa u gello. Niyadiyaxhiti kaxa u dheeddo.

¹²Yayqoobeni Gibxhe kaxay yesesa siidi geede nii shayda be na'axhe e anso.

¹³Lakko wogga u handoniya Yoosefey beyndo na'axhituse bemba e erusso. E zawa axitini Gibxhe kaatuse erutto.

¹⁴Yoosefeni biyade Yayqoobiyara biyade zawa axitaara uddina Gibxhe u hamoronike woosso e anso. Ye geriti bidzi godo laappi tamma ichichuko u maaqicha.

¹⁵Yayqoobeni usaara Gibxhe hando. Esaara nimba yella geritaaray yaha haydho.

¹⁶U meqeteni Seekeme katama oodi Abrahaamey Emoore nayshi garafa be miijhena woondecho boossaa u mooddo.

¹⁷Wontoy Abrahaamese caadhi indecho gobboy itese hisune ni axi Gibxhe wudiya orjena u shaydo.

¹⁸Yenniyawo Yoosefe eruwa fede kaati Gibxhe kaatto.

¹⁹Ye kaatini ni axiti gara orjena fayanti nayshi xhahiti hay'oronike wude kessi wora u daforonike olo nimba shayda gerita e maddhunso.

²⁰Ye woggani Musey yelutto. Ye Museni Wonto buro modhe bishache e maaqicha, adiyara indowaray haydzi agunna aallo esa u ayto.

²¹Wora e dafuttechoyne Gibxhe kaati bushoy degessi be yele mati i dissho.

²²Gibxhaxitini be era uddi Muse u erusso, be zeerena be hantana era keenge osaxe e maaddho.

²³Musey e beray oyddi tamme maaddhesune bidzi wonte be gerita maaqe Isra'eelaxita beyese be muxhurowa e masso.

²⁴Handi Isra'eelaxitaafa bidzo Gibxhaxi miidhesa beedi e gisha Gibxhaxi gara dendi ye esa woddhi gano e kesso.

²⁵Wontoy Gibxhe maaketowafa esuna uso kessenike ususe e gellesesako Musese e bishecha, maaqe baaka ususe gello badiko e yecha.

²⁶Geede wonte lam'i Isra'eelaxiti wola u gaylusune beedi uso naqese wordi <<Gero, hinuni wolindo na'axhitako, abasuwa wola hi wodhe?>> yeydi e hido.

²⁷Ye beyndo na'e miidhechashi <<Niya nuu ahesaara nu gara yaa'esaara mati maagesay oonena?

²⁸Zine Gibxhaxe ne woddhechonike taani wodhesuwa neyne?>> yeydi hissine be garafa e ur'o.

²⁹Musey ye e zeerdosa siidi badhi handi Miidiyame wude bayaxe maaddhi e utto. Yahani lam'i nayshe e yello.

³⁰Oyddi tammi bera geede Wonto woosaxi Sinna bakka da'aa yese saha melaa eexhiya yese mixi dushuraaka tama looxhena e bento.

³¹Musey ye esa be beedoniya e micco. Beyese e uqusune Laaxi be katona

³²<Tani niyadiyaxhiti Wontoko, Abrahaame Wontoko, Yissaaqe Wontoko, Yayqoobe Wontoko> hidi e hinesa e siido. Museni koburdi esuko beyese jhassho.

³³Laaxi <Ha ne ee'e godoy hayla saha maaqe gisha ne tokiyafa kobha kessuwa.

³⁴Gibxhiya yese ta axiti waayye aadewo beedi maddhundi u uwwesani siidiko uso maaketowafa kessese ta hoddhese. Yoowwa, hatte Gibxheko niya ta anxe> yeydi e hido.

³⁵Isra'eelaxiti buro Muse <Niya nu gara ahesaara yaa'esaara mati maagesay oonewa?> yeydi u hidecha. Esa u inxhadhechoyne Wontoy eexhiya yecha mixi dushuraaka esuse benta be woosaxi badena ahesaara maaketowafa kessesaara mati sekke usuko ye Museko e anso.

³⁶Ye Musey Gibxhe wudiya, Zo'o Bagadiya, saha melaa oyddi tammi bera micusheshaara du'usesaara hantisine uso durti e kesso.

³⁷Esako Musey zeerisine Isra'eelaxituse <Wontoy hinindo na'axhittaafa taanke yese kaayaxuko e denxe, esuse siwwayte> hidi hidechashi.

³⁸Saha melaakani bhikkiluttese axiti lagaara yechashi Museko. Sinna bakkaa zeerdecha Wonto woosaxaara yeydiwo nuwadiyaxhitaara wolko yechashi Museko. Wontokofa yeso inge kato nuuse etti garsasi esako.

³⁹Ye Museseni nuwadiyaxhiti eeti woosutto baasso. Maaqe baaka inxhadhi be muxhurowanna sekke Gibxhe dhaddi hamese u masso.

⁴⁰Usini Aaroneko <Nu wonto maaddhi numba durkesa nuuse naquwa, ye Gibxhe wudiyafa nuu kessecha Musey aba e maaddhosa eruwanxhiko> yeydi u hido.

⁴¹Yenniyani mina'i bisha be wonto naddhi esuse kaasha ingo u uqusso. Be kuchey hanto hantana fettona u maddo.

⁴²Magguttuwaye baaka Wontoy uso beedi afaa yesine fo'e ingeesituse u akkirusune dhaddi u garafa e arto. Kaayaxiti fissharowani ohisine <Hinuno Isra'eelaxito, oyddi tammi bera aallo saha melaa kaashaara ingowara taasuwa hi uqusecha?

⁴³Ususe hi akkiroronike hi naddho wonto bishita ayti hi hando. Ye usiti Moloke essaaka hi kuxicho maa'o zawaara Remifume hiyutte hi wonto xhoolinte bishaarako e maaqicha. Tani Babiloone semfako hinumba ta goode> yeydi e diizuttechonike e maaddho.

⁴⁴Musey Wontoy beysonikiyara woossonikiyara maa'o zawa e naddho. Ye maa'o zawani Wontoy u giddaaka yesenike ato maaddhiko nuwadiyaxhiti giddaa saha melaa e yecha.

⁴⁵Ye e geede Wontoy ha wudiya yecha axita u burowafa goodi oossine Yaasowaara nuwadiyaxhitaaray u wude etto. Yenniyani biyadiyaxhiti garafa be ettecho maa'o zawa ha wudiya u gelso. Dawitey kaatto aallo ye maa'o zaway haya e yecha.

⁴⁶Wonto aafey Dawite gara yecho gisha Yayqoobe Wontoy essaa yesoro zawa keexhese Wonto e shidho.

⁴⁷Maaqe baaka geede keexhay Salamoneko e maaqicha.

⁴⁸Kaayaxi ohisine <Laaxi <<Afay ta uttuxi godoko, sahani ta toke e gara ta gadesako, taase waydese zawani hi keexhe? Yeydiwo kaxe essa ta ekke godoy waakeydesesani? Ha esi uddi ta kuchey hantosa maaquwaye?>> hidiko e hine> yeydi hidonike uddime afana maaqe Wontoy axi kuchena keexxho keessaa yesuwasso.

⁴⁹

⁵⁰

⁵¹Hinuno hi onta beyseesito, hinuni Wonto eruwa geruke hi muxhurona gaxhuwaytako, hi washenani siwwaytako, hinuni uddi wogga hinadiyaxhiti inxhadhechonikeko Ayaana Geeshi ohesa siye hi inxha'e.

⁵²Kaayaxittaafa hinadiyaxhiti waayye beyso baanne atta kaayaxi a'esana? Gizo axe hidi hiyuttesi yoonenike burona zeerdechashita fetto u woddho. Hinunini hatte ye gizo axe garsi hi indo, hi woddho.

⁵³Wonto woosaxituna woga hi ettosa baaka ye woga katto baytako>> yeydi e hido.

⁵⁴Gate aheesiti yeydi Isxhifanoosey zeerdosa be siidoniya be muxhurowafa kessi iitana huulli aafe u zodho.

⁵⁵Isxhifanooseni Ayaana Geeshi essa kundine wokke afaa tiddhissi e beesune Wonto kuxa fuulaara Wonto oshishaa eedhi yese Yesuusaara e beedo.

⁵⁶<<Afay do'uttine axi yele hidi hiyuttasi Wonto oshisha ee'usuneko beya ta yese>> yeydi e hido.

⁵⁷Usini orje katona uwwisine siye inxhadhi be washe tucci bidzi muxhuronani e gara u dendo.

⁵⁸Katamaafa wude esa goosshi kessi shuchuna ice u gello. E gara ateydaasiti be maa'o kessi Sawle hidi hisso bidzi mulla da'aa u gaddo.

⁵⁹Isxhifanooseni shuchuna iciya u yesune <<Laaxo Yesuusa, ta lubbo ekkuwa!>> yeydi e shidho.

⁶⁰Bocunti <<Laaxo, ha esa ususe cubbo matofuna!>> yeydi be kato keddaysi e shidho. Yeydi be hido geede e haydho.