Read koorete Anxuttaasiti 8 Bible Online

Anxuttaasiti 8 - koorete bible

Anxuttaasiti 8

¹Sawleni e hay'oronike usaara kundiko e yecha. Ye wonte Yerusaleeme yecha Wonto zawa axiti iitana goodutto. Anxuttaasita baaka be uddina Yuudakaara Samariya wudiyakaara u budutto.

²Bidzi bidzi Wonto jhasshi kuxicha axitini Isxhifanoose u mooddo. Orje yeefo esuse u yeetto.

³Sawley Wonto zawa axita e maddhunxicha, uddi axi zawa gelli asanxeni maachoni goosshi kessi tufe zawa oodi e gelsicha.

⁴Gooddutti budutti yecha aadexichashiti Wonto kato erusisine seyna hayna u hanto.

⁵Filphoosey Samariya katama handi Kristosa gisha e erusso.

⁶Laga axiti e ohichosha be siidoniya hantiya e yecho micushe hanta be beedoniya e zeerdosa kume muxhurona u siido.

⁷Xhoozitini orje katona uydi laga axita datti kesiya u yecha. Hamese danda'uwadechashitini doondechashitini lagiti u loollo.

⁸Ye katama axiti orjena u maddo.

⁹Ye wogga Simoone hisso bidzi adey <<Tani orjeko>> hidi hinesi Samariya katamaxita be du'use aallo xhoozi osana micushe hanta hantisine buro ye wudiya e yecha.

¹⁰Oddhiyafa ayti orje aallo yeseesitini << <Malla osako> hidi hiyutte Wonto osay ha esako>> yeydi hissine be uddina esuse kume muxhurona u siicha.

¹¹Esuse u siichoshini laga beraafawo ayti xhoozi osana micushe hanta hantisine uso e micushicho gishako.

¹²Ye katamaa yecha axitini Wonto kaatetesaara Kristosa sunxi gishaara Filphoosey ohusune e otosa <<Aadeko>> hidi etti asanxitini maachitini u xhamaqutto.

¹³Simooneni beese Wonto e aadesso. Xhamaquttini Filphoosiyara wolla e yecha. Filphoosey hanticho du'usesaara orje micusheshaara be beedo wogga dhonxhidi e micco.

¹⁴Yerusaleeme yecha anxuttaasiti Samariya wude axiti Wonto kato u ettosa siidi Phexhrosiyara Yohanisiyara Samariya u anso.

¹⁵Usini handi Ayaana Geeshe u eforonike u shidho.

¹⁶Laaxi Yesuusa sunxunawo u xhamaquttechosha baaka Ayaana Geeshi bidzi axi garani yoodo badiko e yecha.

¹⁷Yenniya be kuche u gara u gaddo, Ayaana Geesheni u etto.

¹⁸Simooney anxuttaasiti kuche gaddine Ayaana Geeshi inguttosa be beedoniya miijhe ususe oodi

¹⁹<<Ta kuche e gara ta gadesi uddi Ayaana Geeshe eforosa odde taaseni ha adeto inguwayte>> yeydi e shidho.

²⁰Phexhrosemay mahisine <<Wonto ingo miijhena woomese ne wordo gisha ne miijhey neera baye!

²¹Ne muxhuroy Wonto buruwa gizo e maaquwa gisha ha zeerese shaho fettoni godo keenguwannako.

²²Yoonase, ne iitetiyafa dhaddi maaquwa, Wontoy haliya ha ne muxhuro maxo <Attuwaye> yeydi hinesa e maaqo'ayko esa shi'uwa.

²³Iita dhiidhana ne kundesenikiyara cubboy nemba tufaxe matesenikiyarako niya ta erdese>> yeydi e hido.

²⁴Simooney sekke mati <<Hi zeerdosaafa bidzini taa elleeme hinumbawoy taase Laaxe shi'uwayte>> yeydi e hido.

²⁵Phexhrosiyara Yohanisiyaray Laaxi gisha be erdosa zeerdi Laaxi kato be oto geede Samariya wudiyaka laga katamaa modhe odo ohisine dhaddi Yerusaleeme u maaddho.

²⁶Wonto woosaxi Filphoose <<Dendi yede badena Yerusaleemefa Gaaza aange ogiyanna hanguwa>> yeydi e hido. Ye ogeni shanka melaanna aangesako e maaqicha.

²⁷Esini dendi hando. Yenniya bidzi Tobhiyaxi afana maagay Wontose akkirese Yerusaleeme e handecha. Esini Hindeeke hidi hisso Tobhe kaatise miijhe gara afana maagako e maaqicha.

²⁸Hanke maaddhi yoosine gaare gara utti kaayaxi Isayase fissharo zeerusiya e yecha.

²⁹Ayaana Geeshi Filphoose <<Se gaareko uddhi esaara hanguwa>> yeydi e hido.

³⁰Hinne Filphoosey woxxhi esuko handi kaayaxi Isayase fissharo e zeerusesa siidi <<Ha ne zeerusesi neese gelaa e gele?>> yeydi e oycco.

³¹Esini <<Taase geluwasso, taa eruse axi baasa fetto taase geluwasso>> hidi beydo geede <<Hana kessi ta badiya uttuwa>> hidi e hido.

³²Zeerusiya e yecho Hayla Fissharo godoy <<Hade doruke shufuttese e ishutto, mara sel'ey be ufuxe shakkeesiti buro mikki hinenike fetto be nuuna do'e e dheeddo.

³³Esani u eerso, gizo yaa'ani e gara yaa'e u dheeddo. Ha sahaafani e yesoy ooxutto. E garafa yelutta axiti gisha ooni zeeresa?>> yeydi hinesako e maaqicha.

³⁴Ye afana maagani Filphoose <<Kaayaxi ha esa zeerdosi oonesuna? Beesuwani fedasuna? Mee, taase ohuwa>> yeydi e oycco.

³⁵Filphoosey zeere ayti ye e zeerusicho godofa densi Yesuusa gisha modhe odo e oto.

³⁶Oge hangisine waassaa u ello. Ye afana maagani <<Hay waaxi, ta xhamaquttuwannike ooxesi yesa yese?>> yeydi e oycco.

³⁷[Filphooseni <<Bidzi muxhurona ne aadessako xhamaquttese danda'ako ne danda'e>> yeydi e hido. Esini <<Yesuusi Kristosay Wonto yele maaqesa aadexako ta aadexe>> yeydi e hido.]

³⁸Ye afana maagay gaare ishichasheni <<Essuwa>> hidi e oto. Be lam'una Filphoosiyara afana maagaaray waassaa u gello, e xhamaqutto.

³⁹Ye waassaafa u kesso geede Laaxi Ayaanay Filphoose e da'aafa shoddi e etto. Afana maagay sekke lakko Filphoose beedo badesine maggisineni be oge e aadho.

⁴⁰Filphoosemay Azatoone katama e bento. Qesaariya hangisine sekke hanke arti katamittaa uddi modhe odo ohiya e yecha.