Read koorete Anxuttaasiti 9 Bible Online

Anxuttaasiti 9 - koorete bible

Anxuttaasiti 9

¹Ye esi yeydi maaqiya yesune Sawley Laaxi oge hangeesita wodhese hatteni kashishine kahinituse afana adeko e hando.

²Laaxi oge hange axita asanxeni maachoni degexa'ayko tutti Yerusaleeme be ooworonike Damasiqo katamaa yese Ayhuda Bhikkilo Zawituse diizuttese woosso e ingorosa ye kahinituse afana ade e oycco.

³Hangisineni Damasiqo e uddhesune e masso baane e googe afaafa fo'ey iitana e faddho.

⁴Sahaa e undo, <<Sawle, Sawle, ame waayye taa ne beyse?>> yeydi hine kato e siido.

⁵Sawleni <<Laaxo, neni oonena?>> hidi e oycco. Esini <<Tani waayye beysiya ne yese Yesuusako.

⁶Hatte dendi katamaaka hanguwa. Hante niya e worgusesa yahako ne siye>> yeydi e hido.

⁷Esaara oge hangicha axiti ye kato siidi ooneni beye dheeddi be nuuna ayti micci u eedho.

⁸Sawley sahaafa dendi aafe e dodhine beyeni esa iissho. Esaara yechashitini e kuche ayti durkisine Damasiqo u aando.

⁹Beedo badi yesineni haydzi wonte e feyssho. Ye e aallo muudoni baasso ushoni baasso.

¹⁰Damasiqo Hanaaniya sungicha bidzi adey Laaxi oge hangichashi e yecha. Harajiya e yesune Laaxi <<Hanaaniya!>> hidi esa e xheydo. Esini <<Yee, Laaxo!>> hidi e koto.

¹¹Laaxini <<Dendi <Gizo> hidi hisso oge hanguwa. Yuuda zawaani <<Sawle>> hissoosa bidzi Xharsesaxe oycci degexuwa. Hatte Wonto shi'iyako e yese.

¹²<<Hanaaniya>> hidi hisso axi e yese godo gelli e aafey beyorosa e gara be kuche gadusune harajena beediko e yese>> yeydi e hido.

¹³Hanaaniyay <<Laaxo, ha axi Yerusaleeme ne axita maaqe haylaxiti gara aanxhi iita e hantosa lagiti garafako ta siidese.

¹⁴Hayani ne sunxe xheygeesita uddi tufese kahinituse afana maagiti garafa adeto ettiko e yoodese>> yeydi sekke e mato.

¹⁵Laaxini <<Ha esi Ayhuda maaquwasiti buro kaataxhe buro Isra'eele geriti buroni ta sunxe e erusorosa taase e hantorosa ta xhardo axe e maaqe gisha neese hanguwa.

¹⁶Tanini taameysine aanxhi maddha efe esa e worgusenike beysako ta beyse>> yeydi e hido.

¹⁷Hanaaniyani dendi ye zawa handi gello. Be kucheni e gara gaddi <<Nuundo na'e Sawle, ne yoosune ye ogiya neese addeyda Laaxi Yesuusako sekke ne beyorosaara Ayaana Geeshi neeka kumorosaara taa ansa>> yeydi e hido.

¹⁸Yenniya hade uro bishay e aafiyafa undine e beedo. Dendini e xhamaqutto.

¹⁹Kaxani muudi e oseydo. Sawley Damasiqo yecha Laaxi oge hangeesitaara wolko oddhe wonte e decco.

²⁰Yenniyawo Yesuusi Kristosa gisha <<Ha Yesuusay Wonto yeleko>> hidi Ayhuda Bhikkilo Zawittaa ohe e ayto.

²¹Siidasiti be uddina micci <<Ha esi Yerusaleeme Yesuusa sunxe xheydi kuxichashita baysichashe maaquwaye? Uso tufussi kahinituse afana maagituse aamese maaquwaye haya e yoodosi?>> yeydi u hido.

²²Sawley be hantana miindi e hando. Damasiqo yecha Ayhudaxituse Yesuusay Mesihe e maaqenike ato uqussi e erusinne u buro e baanne, be ohesa u dheeddo.

²³Laga wontay gardo geede Ayhudaxiti esa wodhese wolla u kundo.

²⁴Sawley be gara u kundosa e erdo. Esa wodhese hissine qama wonta katama sumaa uddi u kakkicha.

²⁵Kafuttuwaye baaka e erusichoshiti esa qama etti handi katama googe qeyjhuttese shuchi qeyshaanna garsi kofana sahaa u hosso.

²⁶Sawley Yerusaleeme be ello wogga Laaxi oge hangichashitaara worquttese e wordine Wonto oge e hangenike aade e maaqesa uso bishe e dheeddinne esa u jhassho.

²⁷U jhashakoni Barnabasey anxuttaasituko esa uqussi ogiya Laaxi waakeydi esuse addeydonikiyara esuse e zeerdonikiyara Damasiqoni Yesuusa sunxuna naassi e erusonike ususe e oto.

²⁸Laaxi Yesuusa sunxuna naassi zeerisine Yerusaleeme usaara wolko gela kesso e hicha.

²⁹Grike nuunana zeerisine dicca Ayhudaxitaara zeeriyakaara bersiyakaara e yecha. Hinne usi esa wodhese u maxicha.

³⁰Esaara yecha aadexichashitini esa wodhese u hinesa erdi Qesaariya etti u hando. Yahafa Xharsese u anso.

³¹Yuuda wude, Galila wude Samariya wude yese Wonto zawa axiti modhena u yeso, u osaxho. Wonto jhashishiniyara Ayaana Geeshuna oseysiniyara hangisine u taafoy laddo.

³²Yenniya Phexhrosey uddi godo seya haya hantisine Liida katamaa yecha Wonto haylaxituko e hando.

³³Yaha hazzuppi bera aallo be hixiya woy'iya yecha Eeniya sunge bidzi ade docci hamese danda'uwasa e beedo.

³⁴Phexhroseni <<Eeniya, Yesuusi Kristosay niya loolusako e looluse, dendi ne hixe mahuwa>> yeydi e hido. Yenniyani e dendo.

³⁵Liida katamakaara Sarone wudiyakaara yeseesiti be uddina esa beedi Laaxuko dhaddi u yoodo.

³⁶Xhabbita sunge Laaxi oge hangichanni Iyophe katamaa i yecha. I sunxi birchey Grike nuunana <<Dorqako>> yeydi hiyoni <<Genesse>> hidi hiyoko. Axituse modhe hantesaara jhi'ituse jhergesaarako i maaqicha.

³⁷Ye woggaa hardi i haydho. Axiti i aha shoti fooqiya u woyso.

³⁸Liida katamay Iyophese ukke e maaqicho gisha Phexhrosey yaha yesesa siidi esuko woosso <<Odde, dece baaka ukke nuuko yoowwa!>> hidi hissine lam'i axita u anso.

³⁹Dendi Phexhrosey usaara e yoodo. E yoodo woggaa fooqiya u kesso. U adey baadese indowaxhiti be uddina Dorqay usaara yesine ususe i hantecho be bishana bishana yese maa'ita uddi beysisine Phexhrose gooddi yeefiya u yecha.

⁴⁰Phexhroseni u uddina wude kessi bocunti Wonto e shidho. Sekke ahako maaddhi beedi <<Xhabbita, denduwa!>> yeydi e hido. I aafeni dodhi beedo. Phexhrose be beedo wogga dendi i utto.

⁴¹I kuche ayti e denso. Wonto haylaxitaara u adey baadi yecho indowaxhitaara xheydi en'a i maaddhesune usuko e indo.

⁴²Ye esini Iyophe katamaa uddi e sinto. Laga axitini Laaxe aadesso.

⁴³Phexhrosey Iyophe katamaa Simoone sunge kom'e aace bidzi axi da'aa e dooddo.