Read koorete Roomaxituse 1 Bible Online

Roomaxituse 1 - koorete bible

Roomaxituse 1

¹Anxuttase maaqese xheygutti Yesuusi Kristosa maala maaddhi Wontoy anso modhe odo ohese shahutti kessa tani Phawlosey ha woossoko hinuse ta anxe.

²Ha modhe odoy buro kaayaxituna Hayla Fissharowaka gobbusuttechashuko.

³Ye modhe odoni Wonto yele maaqe nu Laaxi Yesuusi Kristosa gisha ohesako. Esini axe e maaddhosa nu beesune Dawite fira fiixhaafako e yelutto. Hayla maaqe e wontunte nu beesune Ayaana Geeshunaara keddaydese be osanaara haybowafa denxena be yele e maaqenike Wontoy addusso.

⁵Wontoy be maxo modhetiyafa dendasuna Kristosa badenako anxuttase maaddhi ta hantoronike taa e mato. Yeysi e matosunako Kristosa sunxi gisha uddi ha saha gara yese axiti Wonto aadexoronikiyara esuse u woosuttoronikiyara mahese ta hante.

⁶Hinunini Yesuusi Kristosase u maaqorosa Wontoy xheydositi giddaako hi yese.

⁷Rooma katamaa yese hinuse Wontoy eeteseesitusaara hayla axita hi maaqoronike e xheydeseesitusaara uddi ha woossoko ta anxe. Nuuse ade maaqe Wontowara Laaxi Yesuusi Kristosaaray axuse keenge modhe maxowara modhetiyaray hinuse maaquwaye.

⁸Hi aadexo ha saha gara yese axi uddi siidosuna Yesuusi Kristosa badena burussi hi gisha uddi ta Wontoko ta galate.

⁹Wonto ta shi'eniyaka uddi wogga burse baaka hinumba ta maxenike e yelese ohe modhe odo gisha erusisine bidzi muxhurona esuse ta hante Wontoy taase atoko.

¹⁰Hinuko hamese uddi wogga Wonto ta shi'usune buro hamese taase bishe e dheeddakoni hatte ta hamoronike <<Odde, Wonto, ne maxo e maaqo'ayko ta oge gizusuwa!>> hidiko shi'iya ta yese.

¹¹Hi aadexona hi oseyoronike Ayaana badena bente suuse hinuse shahesuko hinumba ta aafena beyese orjena ta worge.

¹²Yeydi ta hisune tani hi aadexona hinunini ta aadexona sekke hanke wolla ni osusoronikeko.

¹³Nuundo nayshito! Hinuke Ayhuda maaquwa fedituko handi erussi Wonto u aadexoronike mati laga ta degessonike yeydiwo hinuko handi erussi Wonto aadexarasita degexese wordi laga woggaako hinuko hammese ta hidecha. Yeydi tani hidakoni hay hatte aallo tucutti ta yesenike hi erorosako ta worge.

¹⁴Be wude yesona buro gardeseesitusaara geede atteseesitusaara, erana dicesheeshitusaara erana dicco baasitusaara uso eruse ta dhagguwannike woosuttiko ta yese.

¹⁵Ha e gisha ta danda'e aallo Rooma yese hinuseni modhe odo ohese iitanako ta wordese.

¹⁶Modhe odona borsuwasso! Ye modhe odoni burona Ayhudaxiti giddaafa sekkeni Ayhuda maaquwasiti giddaafa Wonto aadexeesita uddi looluse Wonto osako.

¹⁷<<Gizo axi Wonto aadexenako yeso degessi e yese>> yeydi e diizuttesenike ha modhe odoy Wontoy axe e gizusesi fede oge keenguwasa aadexonawo e maaqenikeko e adduse.

¹⁸Axi doometiyafa dendasuna aadey eruttuwannike maheesituse u cubbonaara u doometenaara Wontoy afaafa u gara huuliya be yesenike addussiko e yese.

¹⁹Ye esini Wontoy axi bemba eroronike biya addusese gisha Wonto essaanna erusoosi ususe addako.

²⁰Uddi basi meddhuttowafa ayti axuse bentese danda'uwa Wonto oonuntey, ye esini koolo makkina e keenge e osaara e wontuntiyaray e meddho abakitunako e erutte. Ye e gisha axiti be goynge abako keemuttuwasso.

²¹Ye esini Wonto erisine Wonto e wontunteke kuxutto baasso, galatutto baasso. Ye esukofa u maxe maxoy go'uwasa maaddho. Gaxe keenguwasa maaddhi u muxhuroy e ceendo.

²²<<Gaxaxuko nuni>> hidi hissine muya u maaddho.

²³Koolo makki aallo yese Wonto kuxekofa hay'e axita, kafita, oyddi tokena hangeesita, gawwona hanteesita kuchena hanti kuxe u gello.

²⁴Ye e gisha Wontoy borsuse ogena wolko u muhoronike tunay essaaka kundese iita be col'ase u woosuttoronike uso beedi e dhaddo.

²⁵Wonto aade zaadiyaka u arso. Meddhasukofa meddhuttase wonto mati u kusso, esuseni u woosutto. Meddha Wontosema koolo makkina galatay elluwaye, ameen.

²⁶Axiti yeysi matosuna Wontoy borsuse maxo u maxusune uso yaha beedi e dhaddo. Indowaxhiti fetto losso maaqicha asanxaara muho oge dhaddi lossutti eruwadecha muho ogiya u arso.

²⁷Yeydiwo asanxiti indowaxhaara muhoy losso e maaqichoyne dhaddi beese wolko muhese iitana u meggutto. Asanxi asanxaara wolko seefuse abako u hanto. Be haliyafa dendasuna beese bishe yaa'a be gara u oodo.

²⁸Axiti <<Wonto erey numba go'uwasso>> yeydi u hido gisha u sorgey go'uwasa maaddhinne bishuwa abako u hantusune Wontoy uso beedi yaha e dhaddo.

²⁹Axiti laga be bishana bishana yese doometenaara iitetenaara kundesesako. Usini uddi abakose habbu habbu hineesita, u hantesi iita maaqesa, dhiiddheesita, axe wodheesita, feda inxha'eesita, qaaruseesitaara miidheesitaara, gunceeshita,

³⁰axi sunxe bayseesita, Wonto inxha'eesita, casheeshita, nashutteesitaara cee'utteesitaara, iita hantese kille oge worgeesita, bemba yella geruse woosuttuwasita,

³¹gaxhuwasita, be zeerdecho zeere wodduseesita, eeha keenguwasita, higilsa keenguwasitako.

³²<<Haanxho hanteesiti be uddina hay'uwaye>> yeydi hine Wonto woga erisineko ye esa e uddina u hante. Hantewoni e maaddho baane ha e bisha hante axita <<Modheko hi hanto>> hidiko u osuse.