Read koorete Roomaxituse 10 Bible Online

Roomaxituse 10 - koorete bible

Roomaxituse 10

¹Nuundo nayshito! Ta muxhurowa yese orje col'aara Wonto shi'iya ta yesesaaray Isra'eelaxita Wontoy maarorosako.

²Wontose u karduttenike tani ususe ato maaqese danda'ako ta danda'e. Karduttuwaye baaka u karduttesi aade era keendi maaquwasso.

³Wontoy axe gizuse oge ere be dheeddosuna beese be bade u handosa baaka Wontoy <<Axi ha ogenako gize>> yeydi hido badena hamutto baasso.

⁴Wonto aadexeesiti be uddina u gizoronike Muse wogay oycichosha Kristosay ittusiko e yese.

⁵Woga geede hamiyafa bente gizete gisha Musey diizisine <<Woga kakkesi be uddina ye woganako yeso degessi u yese>> yeydiko e hido.

⁶Wontoy axe e aadexowafa densi gizuse gisha <<Ne muxhurowanna <Ooni afaa kesesa?> hidi hidofuna>> yeydiko e diizuttese. Yeydi hiyoni <<Kristosa degessi hoxesuko>> hidi hiyoko.

⁷Assi <<Ne muxhurowanna <Ooni yekke haydheseesiti giddaaka hodhesa?> hidi hidofuna>> yeydiko e diizuttese. Yeydi hiyoni <<Kristosa haybowafa denxesuko>> hidi hiyoko.

⁸Maaqe baaka <<Wonto katoy ne da'aakako e yese. Fetto ne nuunaakaara ne muxhurowakaarako e yese>> yeydiko dizzutti e yese. Ye katoni ohiyaka nu yese aadexo gisha zeere katoko.

⁹Yesuusay Laaxe maaqenike ne nuunana ne otakowara Wontoy Yesuusa haybowafa densonike ne muxhurona ne aadesakowara Wontoy nemba loolusako e looluse.

¹⁰Ye esini axi be muxhurona Wonto aadessako gizoko e gize. <<Yesuusay Laaxuko>> hidi be nuunanani e otoyna Wontoy esa haybowafa maarako e maare.

¹¹Ye esini <<Esa aadexesi uddi borsuwasso>> yeydiko Hayla Fissharowa e diizuttese.

¹²Bidzi Laaxi uddiyadese e Laaxe maaqe gisha Ayhudaxiti giddaakaara Ayhuda maaquwasiti giddaakaara shahoy baasso. Esi beese woduma be maaqe gisha biya shi'eesituse uddi lagussiko e inge.

¹³Ye esini <<Laaxi bemba maaroronike massi e sunxe xheygesa Wontoy uddinako e maare>> yeydiko e diizuttese.

¹⁴Hinne be aadexuwasa waakidiwu bemba e maaroronike esa shi'ese danda'uso? E gisha be siido baasa waakidiwu aadexuso? Modhe odo otay baane waysiw siyese danda'uso?

¹⁵Be anxutto baasa waysiw modhe odo ohese danda'uso? Ye esini <<Modhe odo ohese yooneesiti tokey waydi maggusesani>> yeydi e diizuttonikeko.

¹⁶Isayasey ohisine <<Laaxo! Nu otinne be siidosa ooneni ettesa?>> yeydi e zeerdonike modhe odo u ettosi be uddina maaquwasso.

¹⁷Yoonase aadexoy e bentesi modhe odo siyefako. Modhe odoy Kristosa gisha erusutte erunxuko.

¹⁸Mee, hinumba ta oycceeshe, Wonto kato siyutto baasso yeydi hiyu? Fissharowa <<U zeerusune ha saha gara uddi e sinto, u katoni saha wosula aallo e ello>> yeydi e diizuttonike aadewo siidiko u yese.

¹⁹Assi ta oycceeshe, Isra'eelaxiti ye kato erutto baasso yeydi hiyu? Yeydi e hiyutteesume Musey burussi zeerisine <<Haassuttecha axita suuziko hi dhiiddhoronike ta mahe, muya maaqe axitunako hi huuloronike ta mahe>> yeydiko e hidese.

²⁰Isayaseni <<Taa wordo baasituse ta bento, <Wontoy ay yese?> hidi taa oycco baasituseni ta addeydo>> yeydiko naassi e zeerdese.

²¹Assi Isayasey Isra'eelaxiti gisha zeerisine <<Taase woosuttuwasitusaara taa inxha'eesitusaarako hanke taako u yooworonike wonta kume ta kuche ta buddo>> yeydiko e hine.