Read koorete Roomaxituse 13 Bible Online

Roomaxituse 13 - koorete bible

Roomaxituse 13

¹Wontoy maagesso baa afana maagay baa gishaara hatte yese afana maagiti Wontoy maagesesesa u maaqe gishaara axi be uddina kaati maagesso maagituse woosutteko e worguse.

²Ye e gisha afana maaga inxha'esi uddi Wontoy <<Yeydi yesuwayte>> hidi hidosako e inxha'e. Inxha'eesiti be gara e yaa'uttoronikeko mahiya u yese.

³Ye esini gate aheesiti u jhashusheshi iita hanteesita baaka modhe hanteesita maaquwasso. Uso jhashe dheebe worguwa ne worge? Jhashe dheebe worgo'ayko modhe hantuwa, nemba galatako u galate.

⁴Ye esini afana maagay neese modhe hantese maagetese Wonto hantaxuko. Satata e gixhesi yaho e maaquwa gisha iita hantesa maaqo'ayko jhashuwa! Usini iita hanteesiti gara Wontoy huulli aytecho gano kesse e hantaxitako.

⁵Ye e gisha kaati maagase woosuttey hinuse worguse basuko. Esume hi woosuttesini Wonto huula jhashenawo e maaddho baane hi muxhurowanna <<Iitako ne hanto>> yeydi hinesi yesuwannike hidi hissineko.

⁶Wontoy gaddese afana maagita u maaqe gishako gaalo usuko hi gaale. Esume be maagetosa hantisine Wonto hantako u hante.

⁷Uddi kaati maagituse worguse base mahuwayte. Gaalo esuse e worguse godo gaaluwayte, qaraxha esuse e worguse godo qaraxhuwayte, esa jhashe e worgusesa jhashuwayte, kuxa esuse e worgusesa kuxuwayte.

⁸Feda eehe axi woga kattase e maaqe gisha wola eehame feda hi oycutte abakoy hi gara yessoppe.

⁹Ye esini <<Laggettofuna, axe woddhofuna, kayssofuna, fedase maaqe abako bidzoni col'ofuna>> yeydi hine woossitaara fede woossitaara uddinako <<Fede axe uddina niya ne eehenkeysi eehuwa>> yeydi hine woossoy be oomoko e ayke.

¹⁰Eeha keenge axi feda gara iita hantuwasso. Ye e gisha axe nu eetoyna woga kattiko nu yese yeydi hiyoko.

¹¹Hatte essa ni yese bera erdi ha esa hantuwayte. Buro Wonto ni aadessoniyame ni loolo wontay hatte yoodi e uddhese gisha gehunsaafa nu birke woggay ellosso.

¹²Qamay garesuko hine, wontani uddhiko yese. Yoonase cencha hanta ni garafa kessi oossi fo'ese maaqe toora miijhe nu gara nu aykkoose.

¹³Wontaaka sekke hanke hante axuke e worgusenike nu hantoose. Tato naddhi iitana usshi goojhi ose doome, usshi goojhe, laggete, iita achoy col'esa col'e, berse, dhiidhe numba worgusuwasso.

¹⁴Yeysi mahekofa Laaxi Yesuusi Kristosa maa'uwayte baaka hinuse hi acho col'a alsi doojheshe wordofita.