Read koorete Roomaxituse 16 Bible Online

Roomaxituse 16 - koorete bible

Roomaxituse 16

¹Kinkira'oose yese Wonto zawase kurare maaqe ni indo busho Feebene modhe aafena hi beyoronike oddeydiko hinumba ta shi'e.

²Isi tambani maaqqe fede laga axitani mardechanniyoko. Ha e gisha hinuni hayla maaqe Wonto zawa axiti borsa mokkisine mahe e worgusenike Laaxi sunxuna iso motti isuse worguse basuna uddi hi maroronikeko hinuse ta ohe.

³Yesuusi Kristosa hanta wolko hantiya nu yecho Pharsiqilasaara Aqilasaara ta sawo ohuwayte.

⁴Usini taameysine hay'ese fetto naquttiko u yecha. Ye esuna uso galatesi tawoni e maaddho baane be godowa godowa yese uddi Wonto zawa axe maaqe Ayhuda maaquwasitini galatako u galate.

⁵Wonto shi'ese uso bhikkilutte Wonto zawa axituseni ta sawo ohuwayte. Isiya wudiyafa acha Kristosa aadessa ta eehe Efetoosese ta sawo ohuwayte.

⁶Hinuse keddaysi hanti gatta Maaramese ta sawo ohuwayte.

⁷Taara wolko tufutti yecha ta iginituse Andironiqosesaara Yooniyasesaara ta sawo ohuwayte. Usini anxuttaasiti giddaaka keddaydi erutteseesitaara taame buro Kristosa aadesaasitaarako.

⁸Laaxuna ta eehe Anfiliyaxhoseseni ta sawo ohuwayte.

⁹Kristosase wolko nu hanticho Orbaanosesaara ta eehe Istaakosesaara ta sawo ohuwayte.

¹⁰Kristosase e keenge aadexoy naa'utti beyutti hine galatuttese Afelesese ta sawo ohuwayte. Aristobolose zawa axituse ta sawo ohuwayte.

¹¹Taase igina maaqe Herodiyonese ta sawo ohuwayte. Narsise zawa axittaafa Laaxe aadeseseesituse ta sawo ohuwayte.

¹²Laaxuse oseydi hantiya yese indowaxhuse Tirufaynasaara Tirufozasaara ta sawo ohuwayte. Laaxe marese orjena gatti yese iso ta eehe Farseseni ta sawo ohuwayte.

¹³Laaxuse hantena eruttese Rufosese ta sawo ohuwayte. Tamba hade be yelekeysi eehicha esindoseni ta sawo ohuwayte.

¹⁴Asinkirotoseseni, Filogoneseni, Hermeeneseni, Patrobaseseni, Hermaaseseni usaara wolko yesine Wonto aadexiya yese indo nayshusheni ta sawo ohuwayte.

¹⁵Filologoseseni, Yuliyaseseni, Neriyaseseni esindo bushosheni, Olumfaseseni yeydiwo usaara wolko yese aadexeesituseni ta sawo ohuwayte.

¹⁶Indo nayshukeysi wola muuxxhi wola sawusuwayte. Be godowa godowa yese Kristosase maaqe Wonto zawa axiti uddiko hinuse sawo u uquse.

¹⁷Nuundo nayshito! Hi erdo era inxhadhi shahuwaara hi aadexona hi miinguwanikiyara maheesiti garafa hinumba hi kaforonikeko oddeydi hinumba ta shi'e. U garafa dhaddi zaruwayte.

¹⁸Ye u bisha axiti beese be col'ake u hantesa baaka ni Laaxi Kristosase hanteesita maaquttuwasso. Modhe zeeresa bisshiko sooqussi zaadena axe nasshi axi doomete shati eruwa geeshi axita u qaaruse.

¹⁹Ha modhe odose woosuttesa hi maaddhosa axi uddi erdo gisha hinuunna maggako ta magge. Yeydiwo modhe zeerese gaxaxe iita zeerekofa hinumba kattese geeshita hi maaqoronikeko ta worge.

²⁰Yeysi hi maho'ayketese axuse modhete inge Wontoy Humbaye hi toke oomoko ukkena dhiila e mahe. Nu Laaxi Yesuusay axuse keenge maxo modhetey hinuse maaquwaye.

²¹Taara wolko hanta gara yese Xhimootoosey <<Modhiya sawa hi yese?>> hidiko hinumba e sawuse. Yeydiwo Ayhudaxita maaqe ni iginiti Lukiyoosey, Yaasooney Sosfatroseydiko hinumba sawusesa.

²²Ha woosso Phawlosey otonike diizza tani Tertiyosey Laaxi sunxunako hinuse sawo ta uquse.

²³Tambani motti yese Wonto aadexeesitini esso bhikkilutte Gaayoosey hinumbako e sawuse. Katama miijhe aykesa maaqe Erasxhoosiyara niindo na'i Qwartosiyaray hinumba <<Modhiya sawa hi yese?>> hidiko u sawuse. [

²⁴Ni Laaxi Yesuusi Kristosay axuse keenge modhe maxoy hi uddiyara wolko yesuwaye. Ameen.]

²⁵Yoonase Wontose kuxay maaquwaye. Esini Yesuusi Kristosa gisha ta odusso modhe odonaara olowafa ayti laga bera aallo addeydo badi yechine hatte addeyda aadenaara hi aadexona miindi hi ee'oronike hinumba mahesuko e danda'e.

²⁶Ye aadey hatte kaayaxiti fissharo badena tiddhiya addeydiko e yese. Uddi axi esa aadessi woosuttoronike koolo makkina yese Wontoy otosuna axeydosi be uddina esa eroronike maaddhiko e yese.

²⁷Esawoy be gooshuna eraxe maaqe Wontose Yesuusi Kristosa badena koolo makkina kuxay elluwaye. Ameen.