Read koorete Roomaxituse 2 Bible Online

Roomaxituse 2 - koorete bible

Roomaxituse 2

¹Neno fede axi gara yaa'eyo! Neese ne gara e yaa'uttuwannike ne goynge abako keenguwannako. Ye esini neni axi gara yaa'isineko ye e gara ne yaadho axi hante iita abako neese ne hante. Ye e gisha <<Feda garako ta yaa'e>> hidi hissine mati ne gara yaa'iyako ne yese.

²Iita hante axiti gara Wontoy e yaa'esi bishesha e maaqenike erako ni ere.

³Neno axo! Yeysi hante axi gara yaa'isine u hante abako neese hantisine Wonto yaa'aafa ne tulxhesuwa nemba e bishe?

⁴Hinne Wontoy neese modhete e hantosi ne cubbo dhaddi ne maaqoronike nemba e mahesa erdo badi e modhete, e gawwo aakete, e danda'o lagete haassuwa ne haasse?

⁵Yebo neni ne muxhuro miimetenaara ne hanta iitetiyafa dhaddi maaqe dheebenaara Wonto huulaara gizo e yaa'aaray addeyne wonte e huulay ne gara kedda e hiyoronikeko mahiya ne yese.

⁶Wontoy u bidzi bidzuse u hantakeko u wooma e inge, u garani e yaa'e.

⁷Modhe hanta miindi hanti Wontokofa bente kuxaara, e kuxa fuulaara, koolo makkina yesuwara worgeesituse koolo makkina u yesoronikeko e mahe.

⁸Be qinosewo massi aade dhaddi iita geede hangeesitusema Wontoy u gara huulako e huule, yaa'ako e yaa'e.

⁹Iita hanteesiti gara uddi burona Ayhudaxiti gara ye e geedeni Ayhuda maaquwasiti gara maddhaara jheetiyarako yoonesa.

¹⁰Modhe hanteesitusema uddi burona Ayhudaxituse ye e geede Ayhuda maaquwasituse kuxani, kuxa fuulani modheteni Wontoy ususe ingako e inge.

¹¹Wontoy oone garani e aafusha beedi yaa'uwasso.

¹²Muse woga siido badi cubbo hantaasiti uddi wogay dheeddakoni be cubbonako u baane. Muse woga siidesine cubbo hantaasitusema uddi ye wogako u gara yaa'esa.

¹³Ye esini Wonto buro gizo maaddhi benteesiti wogay otonike hanteesitako baaka woga siidi dhaggeesita maaquttuwasso.

¹⁴Muse woga siido baa Ayhuda maaquwasiti be meddhuttonikewo yesine beesewo erdi wogay ohesa u hantusune wogay ususe dheeddakoni beese u meddhuttowafa u muxhurowa yese wogako yesa hidi hiyoko.

¹⁵U yesoy Muse wogay ohe abakoy uddi u muxhurowa gadutti e yesenikeko e beyse. Ye esuseni u sorgey atoko. Ye esini bidziya bidziya uso e gayle, bidziya bidziya uso e kiiddhe.

¹⁶Ha modhe odo ohisine ta erusenike Wontoy axi muxhuro giddaa aachutti yese abako Yesuusi Kristosa badena e yaa'e wonteko addaa e kesse.

¹⁷Yebo neni <<Tani Wonto bade maaqe Ayhudaxuko. Muse woganako ta yese>> hidiko Wonto axe ne maaqesuna ne nashutte.

¹⁸Wontoy aba ne hantoronike worgesa erako ne ere. Muse woga ne erdese gisha a'esi modhe hanta maaqesa erako ne ere.

¹⁹Neenna nemba <<Bal'ita durkesi aadewo tambako. Cenchaa yeseesituse fo'ey aadewo tambako>> hidiko ne hine.

²⁰Neni hinesi <<Eraara aadiyara wogaafa ta erdese gisha eruwasitako tani eruse, nayshi giddhitani ta eruse>> hidiko ne hine.

²¹Fedeesita erusisine hine ame sekke mati nemba ne erusuwaane? <<Kayssofita>> hidiko ne hine, neesema ne kayse.

²²<<Laggettofita>> hidiko ne hine, neesema ne laggete. Kuchena naquttese wontita <<Darriko ta hine>> hidiko ne hine, neesema u hayla zawita bon'i neese ne ekke.

²³Neni woganako ne cee'utte, cee'uttuwa baaka woga kafe inxha'ena Wontoko ne eerse.

²⁴Ye esini <<Hinumba Ayhudaxitunako Wonto sunxi Ayhuda maaquwasiti giddaa e cashutte>> yeydi e diizuttechonikeko.

²⁵Gada uttey e go'esi Muse woga ne kafeteko. Woga kafe ne dheeba'ayko gada ne uttosi hade gada ne uttobaannikeko e maaqe.

²⁶Yebo, gada utto baa Ayhuda maaquwasi Muse wogay woossosa kakkesa e maaqo'aykete gada e utto baasa hade gada e uttonike Wontoy mahuwaye mee?

²⁷Neni Muse woga erdi gada uttesesa maaqisine woga kafe ne dheeddako gada utto badi yesine woga kattasi ne gara yaa'ako e yaa'e.

²⁸Yoonase sunxusewo Ayhudaxe maaddhesesi aade Ayhudaxe maaquwasso. Wudena acho gara maaqe gada uttey aade gada utte maaquwasso.

²⁹Aadena Ayhudaxi gawwaanna Ayhudaxe maaddhi bentesako. Aadena gada uttey Muse wogana e diizuttesenike be acho bursi gada utte e maaddho baanne Wonto Ayaanana maaddhese be muxhuro Wontose gizuseko. Ye e bisha axe kedda kedda hisesi axe e maaddho baanne Wontoko.