Read koorete Roomaxituse 3 Bible Online

Roomaxituse 3 - koorete bible

Roomaxituse 3

¹Hine Ayhudaxe maaquwasitume Ayhudaxe maaqey am e mare? Gada uttey am e go'e?

²Ayhudaxe maaqey laga ogenako e go'e. Bidzoydi hiyuttesi Wontoy be kato ususe <<Odde>> hissine e indosako.

³Hinne Ayhudaafa bidzi bidziti Wonto be aadexichosha dhaddako ye u dhaddosuna Wontoy axe be gobbusicho gobbo dhaba e dhagge?

⁴Koolona dhagguwasso. Ye esini <<Ne zeere zeeriyafa dendasuna aadaxe ne maaqe, nemba luukichasheni sekke mati ne iiche>> yeydi e diizuttesenike axi be uddina zaadaxe maaddhakoni Wontomay fetto aadaxuko.

⁵Ni cubboy Wonto gizete addussi beysesa e maaddho geede hinne abaydiw nu hiye? <<Wontoy ni cubbo gisha ni gara e yaadhako aade yaadho baasso>> hidiya nu hine? Ha esa yeydi ta hinesi hade axi maxokeko.

⁶<<Wontoy aade yaadho baasso>> yeydi hiyese fetto danda'uttuwasso. Yeydi e maaddhakoma Wontoy waysi ha saha gara yaa'ese e danda'aane?

⁷<<Zaadaxe ta maaqesi Wontoy aadaxe maaqenike addusesa, e kuxa kosesa e maaddho geede hine ame <Cubbaxuko> hidi ta gara e yaa'utte?>> yeydi berse axi yesesuko e danda'e.

⁸<<Modhe abako degexese iita nu hantoose>> hidiya nu hiye? Bidzi bidzi axiti yeydi ta erusesa bishushiko tamba u luuke. Ha e gisha u gara yaa'utte yaa'ay aadeko.

⁹Hinne nuni Ayhudaxiti Ayhuda maaquwasita garuwa nu gare? Oo'o, fetto garuwanxhiko! Ayhudaxitani maaqqe Ayhuda maaquwasiti axi uddi cubbose e oomo u yesenike burussi otiko ta yese.

¹⁰Ye esini <<Bidzini gizo axi fetto baasso.

¹¹Gaxhe axi bidzini baasso, Wonto worgesi bidzini baasso.

¹²Be uddina Wonto ogiyafa dhaddi kessiko u yese, bidzina halliko u yese. Modhe hanta hantesi baasso, koolo bidzini baasso.

¹³U asshaafa kesesi hade do'uttese boossaafa kese zeeqoke yesesako. Nuunanako u qaaruse, u unxhure oomo hade shooshi esuna wodhe dhaleke yesesako yesa.

¹⁴U asshay axi muxhuro maduse iita aachuna kundesesako.

¹⁵U tokey axe wodhiya aamese allaxuko.

¹⁶Be hange godowa bayseesitaara waayye beyseesitaarako.

¹⁷Wolko modhetena yese eruttuwasso.

¹⁸Wonto jhashey u muxhurowa baasso>> yeydiko e diizuttese.

¹⁹Axi be uddina be goyngesa dheeddi mikku u hiyoronikiyara ha saha gara yese uddi axi gara Wontoy yaa'oronikiyara wogay esuse ohesi wogana yeseesituse e maaqenike erako nu ere.

²⁰Wogay e hantesi axi be cubbo eroronike e maaqe gisha ooneni Muse woga kafena Wonto buro gizese danda'uwasso.

²¹Hattema woga fissharowakaara kaayaxiti fissharowakaara be otonike Wontoy axe gizusesi wogana e maaddho baane fede ogena e maaqenike addussiko e yese.

²²Wontoy Ayhudaxitani Ayhuda maaquwasitani shaho keenguwasa Yesuusi Kristosa aadexeesita e uddinako u aadexona e gizuse.

²³Shaho u keenguwasini axi be uddinako cubbo e hantese. Wontoy esuse indecho kuxa fuulani e dheeddese.

²⁴Wontoy axuse keenge maxo modhetiyafa dendasuna mikkewo Yesuusi Kristosay wozzosunako u gize.

²⁵Yesuusi Kristosa aadexesi uddi e suuxuna u cubboy ucutti ooxuttoronike Wontoy esa kaasha mati e uqusso. Yeysi e matosi beese gizo be maaqenike addusesuko. Buro hantuttecha cubbo dandadhi gardi e badechonike mati

²⁶ha woggaakama be gizeteni ye esini beese gizo be maaqenikiyara Yesuusa aadexeesita be gizusenikiyarako e beyse.

²⁷Hinne esuna nu cee'uttesa am nu keenge? Abani keenguwanxhiko. Esume nu cee'uttuwasi abasuwa? Nu cee'uttuwasi gizete nu degessosi Yesuusi Kristosa aadexenawo baaka woga nu katto gisha maaquwasso.

²⁸Ye esini <<Wontoy axe gizusesi wogay <Hantuwa!> hidi hidosa hantena e maaddho baane aadexonako e maaqe>> hidiko nu hine.

²⁹Hinne Wontoy Ayhudaxitusewa? Ayhuda maaquwasituseni u Wonto maaquwaye? Ayhudaxitani maaqqe Ayhuda maaquwasita aadexona gizusesi bidzi Wontowo e maaqe gisha aadewo esi Ayhuda maaquwasituseni u Wontoko.

³¹Hinne nu aadesso geede <<Woga dhabako nu dhagge>> yeydi hiya? Oo'o, dhabekofa wogako sekke nu minxe yeydi hiyoko.