Read koorete Roomaxituse 5 Bible Online

Roomaxituse 5 - koorete bible

Roomaxituse 5

¹Yoonase aadexona nu gizzo geede nu Laaxi Yesuusi Kristosa badena Wontoseni nuuseni nu giddaa modheteko yesa.

²Wonto nu aadesoosuna Yesuusi Kristosa badenako Wontoy axuse keenge e maxo modhetese e shahaxe nu maaddho. Hatteni ye essaako nu yese. Wonto kuxa fuula shahaxe maaqese nu gobbusutto gobbenako maggana nu cee'utte.

³Ye esawo e maaddho baanne maddhaafa danda'oy bentenike nu ere gisha nu gara yoone maddhana maggako nu magge, cee'uttoko nu cee'utte.

⁴Danda'owafa miimete, miimetiyafa gobboy hidiko bentesa.

⁵Nuuse ingutta Ayaana Geeshi badena Wonto eehay nu muxhurowa e kundese gisha gobbiya nu yese gobboy numba borsusuwasso.

⁶Ni qino maarese danda'uwa gafaxe ni yesune Wontoy <<Maaquwaye>> yeydi hido wogga Kristosay cubbachiti gisha e haydho.

⁷Gizo axume hissine hay'e axe haliya maddhanawo degexesuko danda'uso, orjena modhe axume hissine hay'ese naassesi haliya bentesuko e danda'e.

⁸Yeydi e maaddhakoni cubbache maaddhi nu yesune Kristosay nuume hissine e haydho. Ye esuna Wontoy numba keddaysi be eehesa e beyso.

⁹Gizo ni maaddhosi Yesuusi Kristosa suuxuna e maaddho geede ye esumeni gardi Wonto huulaafa nu attesi fetto esunako.

¹⁰Nuni Wontowara iilaxe maaddhi yechine e yele haybona esaara wolko naquttiko nu yese. Hatte Wontowara nu naqutto geede Wontoy numba loolusesi fetto be yele yesonako.

¹¹Ye esawoni e maaddho baanne Wontowara numba naddha nu Laaxi Yesuusi Kristosa badenako Wontona nu cee'utte, nu magge.

¹²Bidzi axukafa dendasuna cubboy ha saha gara yoodinne ye cubbona hayboy yoodo. Ye ogenako axi uddi cubbo hantine hayboy uddi axe ello.

¹³Muse wogay inguttosume e buro cubboy ha saha gara yesako e yecha. Wogay badechoniya <<Ha esi cubboko>> hidi hiyoy eruttuwadiko yecha.

¹⁴Maaquwaye baaka Addaamiyafa ayti Muse aallo yechashituse hade Addaame gardonike Wonto woga gardi cubbo hanto baasiti garani fetto hayboy e kaatto. Addaamey yoone Kristosako e bishicha.

¹⁵E bisshakoni Wontoy axuse keenge maxo modhetey Addaame cubboke yesesa maaquwasso. Ye bidzi axi Wonto woga gardosuna laga axi u haydho geede, fetto bidzi axe maaqe Yesuusi Kristosanaara Wontoy axuse keenge modhete maxonaara benta ingoy lagaadese orjena laddi inguttiko e yese.

¹⁶Wontoy axuse mikkewo hanto hantay bidzi axi cubboke yesesa maaquwasso. Bidzi axi Wonto woga garsosuna yaa'utta yaa'ay axi gara <<Baysiko hi yese>> yeydi hinesako e oodo. Lagaadey Wonto woga gardoosume e geedema Wontoy axe mikkewo gizo e mato.

¹⁷Bidzi axi Wonto woga gardosafa densi ye axi badena hayboy axe iisshi e kaatto. Wontoy axuse be keenge maxo modhetena e hanto hantamay ye esume garoko e gare. Wontoy axuse mikkewo hanti axe gizo e mato. Ye esa ekkeesiti uddi bidzi Yesuusi Kristosa badena uddi abako iisshiko u yese.

¹⁸Yebo, bidzi Addaamey Wonto woga gardosuna yaa'ay uddi axi gara yaa'uttonike yeydiwo bidzi Yesuusi Kristosa gizete hantana uddi axi yaa'aafa attiko yeso u degexe.

¹⁹Addaamey woosutte dheeddosuna laga axi cubbache maaddhonikeko yeydiwo Kristosay woosuttosuna lagaaditi u gize.

²⁰Wogay yoodosi cubboy lagorosako. Laguwaye baaka cubboy laddonikewoko fettona gardi Wontoy axuse keenge maxo modhetey e laddo.

²¹Yoonase cubboy haybo oomo axe mahena kaattonikeko nu Laaxi Yesuusi Kristosa badena koolo makkina yesoy e bentoronike Wontoy be keenge maxo modhetena axe uddi gizetese e oomo mahena e kaate.