Read koorete Roomaxituse 8 Bible Online

Roomaxituse 8 - koorete bible

Roomaxituse 8

¹Yoonase ha e geede Yesuusi Kristosaara wolko yeseesiti gara yaa'uttuwasso.

²Ye esini Yesuusi Kristosana yeso inge Ayaana Geeshi wogay cubbowara haybowara ooda woga garafa tamba shawo kessiko e yese.

³Axi be meddhuttowafa gafaxe maaddhi bentosafa dendasuna wogay mahese dandadho baasa Wontoy beese matiko e yese. Wontoy cubbo keenguwa be yele cubbaxe maaqe axe bishushi cubbose kaasha e maaqoronike anxenako cubbo gara e yaadho. Yeysi be matosuna be yele achona cubbo e oosso.

⁴Ha esa yeysi e matosi axi maxona e maaddho baane Wonto Ayaana maxoke yese nuuka wogay oyce gizetey kumena kafuttesesa e maaqoronikeko.

⁵Be acho maxoke yese axiti beesuko u maxe, Ayaana maxoke yeseesitimay Ayaanasuko u maxe.

⁶Achoshe maxe sorgey hayboko e oone, Ayaanase maxe sorgemay yesowara modhetiyarako e oone.

⁷Ye esini beese be achoshe maxe axi Wonto wogase be woosuttuwa gishaara woosutteseni be danda'uwa gishaara ye axi Wonto iilaxuko e maaqe.

⁸Be acho maxoke durkutteesiti Wonto maggusese danda'uttuwasso.

⁹Hinunimay Wonto Ayaanay hinukaaka yese gisha Ayaana maxoke baaka hinuse hi acho maxoke yesuwaytako. Kristosa Ayaana keenguwa axi ooneni Kristosa bade maaquwasso.

¹⁰Kristosay hinukaaka yesa'ayko hi garay cubbowafa dendasuna hay'esa maaddhakoni Wontoy hinumba gizusso gisha fede badena hinuni en'ako.

¹¹Yesuusa haybowafa densa Wonto Ayaanay hinukaaka yesa'ayko Kristosa haybowafa densa Wontoy hinuka yese be Ayaana badena hay'e hi achosheni yesoko e inge.

¹²Yoona, Nuundo nayshito! Ni oycuttese basuko yesa. Nimba e oyceshi achoshe maaquwasso, acho maxokeni yese worgusuwasso.

¹³Hinuse cubbaxe maaqe hi oonuntekewo yesa'ayko hay'oko hi hay'e. Ayaana Geeshi osanama hantiya hi yese iita hanta wodha'ayko en'ako hi yese.

¹⁴Wonto Ayaanana durkutteesiti uddi Wonto nayshitako.

¹⁵Ye esuna <<Nuwadde, abbayo!>> hidi ni xheyge e yele esuna hi maaqe Ayaana hi ettosa baaka sekke jhashena yesese maaketowa aange ayaana etto baytako.

¹⁶Wonto Ayaanay niira wolko bidzo maaddhiko Wonto nayshe ni maaqenike ato maaddhi e ohe.

¹⁷Yoona, Wonto nayshe ni maaddho geede e ingesa ekkesako ni maaqe. Yeydi hiyoni Wontoy ingesako ni ekke, Kristosaara wolkoko ni ekke. Hatte Kristosaara wolko maddha nu ettoyna hannina esaara wolkoko ni kuxutte.

¹⁸Hatte essaa nu yese bera giddaa yese nu waayyey hannina addeydi nuuse maaqe kuxa fuulaara wol da'aa gaddi nu beedako abanani wol makko maaqese e danda'uwannikeko mati ta beene.

¹⁹Meddhoy be uddinako Wonto nayshi addeynesa beyese wordi orje sazana e kakke.

²⁰Ye esini meddho maxoke e maaddho baanne Wontoy <<Meddhoy be uddina go'uwasa maaquwaye>> hidi e masso gisha meddhoy be uddina go'uwasa maaddhiko e yese. Yeydi e maaddhakoni gobboy yesako yese.

²¹Ye gobboni meddhoy beese be uddina haydhi e sangoronike mahe maaketowafa Wonto nayshaara wolko kuxa fuulay essaaka yese shawo u kessoronikeko.

²²Meddhoy be uddina ha e aallo hade zersoke yesesuna aykutti irfiyaka e yesesa erako nu ere.

²³Irfiyaka yesesi meddho gooshewo maaquwasso. Acha ingo maaqe Ayaana Geeshe etta nunini Wonto nayshe nu maaqoronike yeydi hiyoni bente nu garay shawo kesoronike beyese wordi orjena kakkisine nu gawwaanna irfisineko nu yese.

²⁴Ye esini nuni loollosi ye gobbonako. Nu gobbe abakomay bento geede gobbey atoko e atte. Yese abako <<Buro garako ta degexe>> hidi ooneni gobbuwasso.

²⁵Nu beewwa abako nu goddo geede ye esa beyese wordiko dandadhi orjena nu kakke.

²⁶Yeydiwo waysi Wonto shi'e numba e worgusenike nu eruwa gisha gafaxe nu maaqusune Ayaana Geeshi numba marako e mare. Axi nuunana zeeruttese danda'uwa ogenako irfisine nu gisha Wonto e shi'e.

²⁷Ayaana Geeshi haylaxituse Wonto maxowara wolko hangesa Wonto e shi'e gisha axi muxhuro arsi beene Wontoy Ayaana Geeshi maxoy aba e maaqenike erako e ere.

²⁸Wonto eeheesitusaara e maxoke xheygutta axitusaara uddi abakoy ususe go'esa e maaqoronike Wontoy mahesa erako ni ere.

²⁹Laga indo nayshi giddaa e yeley angusse maaqoronike uddi abako e maaqeesume buro be xhardechoshituko <<Ta yele bishuwayte!>> hidiko e hido.

³⁰Buro <<Ta yele bishuwayte>> hidi be hidechoshita e xheydo. Ye be xheydosita e gizusso, be gizussosita e kusso.

³¹Yoonase ha zeerese am nu ohe? Wontoy nuura yessako ooni nu gara dendesa?

³²Wontoy bidzi be yele <<Ha esi e gara elloppe!>> hidi higillo badi uddi nuumeysine garsi be indo geede ye be yele nuuse be indonike esaara wolko uddi base nuuse e ingenike eezuwanxhiko.

³³Wontoy xhardosita ooni luufese danda'esa? Esako beese uso gizusesa.

³⁴Hine u gara yaa'esi oonena? Kristosay u gara yaa'aa e yaa'e? Oo'o, yaa'ekofa nu gisha haydhi haybowafa dendi Wonto oshishaa uttiko nu gisha Wonto e shi'e.

³⁵Ye e gisha Kristosa eeha garafa numba shahese danda'esi ooneni baasso. Jheeteni, maddhani, waayyaara goodowarani, naayeni, gunduseni, danoni, satatana hay'eni abani shahese danda'uwasso.

³⁶Ta hinesi Hayla Fissharowa <<Ne gishako wontaaka kumena nu hay'esi, hade shufutte doruke maaddhi nu taabuttesi>> yeydi e diizuttesenikeko.

³⁷Wonto eeha garafa shahuttekofa numba eeta Kristosana haanxhi zeere uddi iisshi iicheeshitume garoko nu gare.

³⁸Ye e gisha haybo e maaddhakoni, yeso e maaddhakoni, afaase Wonto woosaxita u maaddhakoni, afaase afana maagita u maaddhakoni, hatte yesesa u maaddhakoni, geede yoonesa u maaddhakoni aba bisha osaxita u maaddhakoni,

³⁹meddhuttassaafa kedda e maaddhakoni, ulla e maaddhakoni, meddhuttase ooneni e maaddhakoni nu Laaxi Yesuusi Kristosa badena nuuse ingutta Wonto eeha garafa numba shahese danda'esi abani e baannike tani fetto eezuwasso.