Read koorete Roomaxituse 9 Bible Online

Roomaxituse 9 - koorete bible

Roomaxituse 9

¹Kristosana yesine zeeriya ta yese zeerey aadeko baaka zaaduwasso. Ayaana Geeshuna durkuttiya yese ta muxhuroy zaadiyaka ta baannikeko taase e adduse.

²Orje higilsaara taa maddhunxiya yese danda'uttuwa maxowarako ta muxhurowa yesa.

³Tayndo nayshitume hiyoni yeluttena ta baditume hissine tani taase aacuttesesaara Kristosa garafa shahutti dafuttesesaara maaddhakoni fetto eehako ta eehicha.

⁴Ta iginiti Isra'eelaxitako, Wontoy xhardi uso be nayshe e mato, be kuxa fuulani ususe e addusso. Ususe abako be hantenike e caadho, esuna u yese be woga e indo, aade ogena bemba u kuxoronike beysi usoni e gobbusso.

⁵Uso yellasi orje maaqe olo adiyaxhitako, Kristosani axe e maaddhosa nu beesune usukaako e yelutto. Esini uddime afana maaqe koolo makkina axiti esa kedda keddayse Wontoko. Ameen.

⁶Yoonase Wontoy otechoshi aade maaddho baasso yeydi hiyo maaquwasso. Ye esini Isra'eele shawey uddina aade Isra'eele maaquwasso.

⁷Abrahaamey uso yello gisha <<Usi uddi Wonto nayshitako>> yeydi hiyese danda'uttuwasso. Hidakoni Wontoy Abrahaameko << <Ne shaweko> hidi e xheyguttesi Yissaaqe badenako>> hidiko e hidese.

⁸Ye essaafa erese nu danda'esi Abrahaame shaweko yeydi taafutteesiti Wontoy gobbusecho gobbona yeluttaasitako baaka axi maxona yeluttasi Wonto nayshe u maaquwannikeko.

⁹Ye esini Wontoy gobbussecho gobboy <<Langute ha woggaako ta yoone, Saarani na'uko i yele>> yeydi hiyuttechashuko.

¹⁰Ye esawoni e maaddho baanne Ribqay bidzi ade garafa yeydi hiyoni numba yella nuuse ade maaqe Yissaaqe garafa mente be xhiiqusso woggaaka

¹¹Wontoy be xharoy hantana e maaddho baanne xheydaasuna e maaqenike addusese wordi mentiti haga yelutto badi iitani modheni hanto badi u yesune Ribqako <<Angussi barsusuko e oomo maaddhi e aqe>> yeydi e oto.

¹³Ye esini <<Yayqoobe eetiko ta yese, Eesa'oma inxhadhiko ta yese>> yeydi e diizuttonikeko.

¹⁴Yoonase abaydiw ni hiye? <<Wontoy axi aafusha beediko e hante>> yeydiya ni hiye? Oo'o, Wontoy fetto yeysi hantuwasso.

¹⁵Wontoni Museko <<Maarese ta worgesa ooneni maarako ta maare, esuse higile ta worgesuse ooneseni higilako ta higile>> yeydiko e hidecha.

¹⁶Ye e gisha Wontoy axe xharesi axi gafanaara maxonaara e maaddho baanne beese be maaronako.

¹⁷Ye esini Hayla Fissharowa e diizuttonike Wontoy Faroonese[1] <<Ne gara ta osa beysesaara ta sunxi ha saha gara uddi eruttoronike mahesaara nemba kaatesiko ta yese>> yeydiko e hidecha.

¹⁸Yoonase Wontoy maarese be wordosa e maare, woosutte e worguwannike mahese be worgesa e woosuttuwannike e mahe.

¹⁹Yebo <<Axi iitani modheni hantesi uddi Wontoy otonikewo e maaddho geede hine abasuna Wontoy axe <Baysiko ne yese> yeydi e hine?>> yeydi hinesi yesesuko e danda'e.

²⁰Neno axo! Wontowara wolko hanke mati bersese aba godowa ne keenge? Sahaafa meddhutta miijhey bemba meddha hantaxe <<Ame yeysi tamba ne meddho?>> hidi hittaa hine?

²¹Sahaafa meddhe hantaxi ye meddhese be etto bidzi sahaafa bidzi miijhe kuxase fede miijhe assi acheysha yaha esuna go'uttorosa mati meddhese adeto keenguwaye? Yeydiwo Wontoni adeto keemako e keenge.

²²Be huula beysese be osa addusese wordiko e yecha. Bayese naqutteseesita u gara be huuleesita orjenako e dandadhese.

²³Yeysi e matosi burussi kuxase be naddhoosita maaroy ususe maaqeesituse be kuxa lagetey addeyoronikeko.

²⁴Nini e xheydositukako ni yese, e xheydoositi Ayhuda badewo e maaddho baanne Ayhuda maaquwasitaaraysiko.

²⁵Ye esini Hosa'e fissharowa <<Ta axita maaquwadechashe <Ta axitako> hidiko ta hine, eehuttuwadecha axita <Eehutteseesita> hidiko ta hine>> yeydiko e hine.

²⁶Assi <<Usini <Hinuni ta axita maaquwaytako> yeydi hiyuttecha ye godowa <En'a Wonto nayshe> yeydiko u hiyutte>> yeydi hiyuttechashuko.

²⁷Isayaseni Isra'eele gisha be kato keddaysi ohisine <<Isra'eele nayshi taafoy hade bagade manchake laga u maaddhakoni usukaafa Wontoy maaresimay oddhewoko.

²⁸Ye esini Wontoy sekke be yaa'uwasako ukkena ha saha axiti gara e yaa'e>> yeydiko e hido.

²⁹Yeydiwo Isayasey <<Osa keenge Wontoy hamuca maardoy dheeddako hade Sodome katamay baadonikiyara hade Gamora katamay baadonikiyarako nu maaqaane>> yeydi hissine zeerdiko e yese.

³⁰Yoonase abaydina nu hiye? Gizetese kardutto baa Ayhuda maaquwasiti gizo u maaddho. Ye gizeteni aadexowafa bentesako.

³¹Isra'eelaxitimay <<Woganako gizete nu degexe>> hidi karduttisine woga kafe danda'e be dheeddosuna gizetiya aange oge degexutto baasso.

³²<<Abasuwa gizetiyaka handi elle u dheeddo?>> hidi e hiyuttako gizete degexese u wordosi aadexona e maaddho baane hantana e maaqicho gishako. Ye e bishanako dhumose yese shuchuna u dhumutto.

³³Ye esini Hayla Fissharowa <<Hay, axita dhunge shuchuko Xhiyooniya ta gade, ye shuchini axita dhundi olle shuchuko. Esa aadexesimay ooneni borsuwasso>> yeydiko e diizuttese.