Read koorete 1Qorontoosaxituse 11 Bible Online

1Qorontoosaxituse 11 - koorete bible

1Qorontoosaxituse 11

¹Tani Kristosa beedi hantenike hinuni tamba beedi hantuwayte.

²Uddi woggaaka taa hi maxe gishaara hinumba ta eruso erunxe minsi hi ayke gishaara <<Wontoy hinumba suuzuwaye>> hidiko ta hine.

³Yeydi hidakoni hi erorosa ta worgesi uddi asanxi gara adeto keengesi Kristosa, be zawayndo gara adeto keengesi ade, Kristosa garani adeto keengesi Wonto e maaqenikeko.

⁴Be qino fasshi shi'e oo'oyne kaayo zeere asanxi uddi be gara adeto keenge Kristosako e eerse.

⁵Yeydiwo be qino fassho badi shi'e oo'oyne kaayo zeere indoy uddi be adeko i eerse. Ye esini be qino fassho baanni hade meedusanike yesesako.

⁶Indoy be qino fashuwasha maaqo'ayko be qino shafushuwayya, maaqe baa be qino shafushey oo'oyne meedey iso borsusesa e maaqo'ayko be qino fashuwayya.

⁷Asanxi Wonto bishaara Wonto kuxa fuulaaray e garana e bente gisha be qino fashey esuse bishesha maaquwasso. Maachimay asanxi kuxa fuulay i garana bentesako.

⁸Ye esini maachi asanxi garafa i bentosa baaka asanxi maachi garafa bento baasso.

⁹Yeydiwo maachi asanxuse meddhuttosa baaka asanxi maachishe meddhutto baasso.

¹⁰Ye e gisha Wonto woosaxi gisha maachi be ade adeto oomo be yesesa beysese be qino fasheko iso e worguse.

¹¹Laaxi Yesuusana nu keenge yesona maachi baasa asanxe hidi hisso sunxi baasso, asanxi baasa maacho hidi hisso sunxi baasso.

¹²Ye esini maachi asanxi garafa bentonike yeydiwo asanxini yeluttesi maachi garafako. Abakoy uddi bentesimay Wontokofako.

¹³Haayya, hinumbawoy zeeruwaye. Maachi be qino fassho badesine Wonto i shi'esi bisheshuwa?

¹⁴Asanxi be qino ufuxe galalsako haassusesa e maaqenike meddhutta abako bishay hinumba erusiya baye?

¹⁵Maachimay qino ufuxi isuse inguttosi be qino i fashorosa e maaqe gisha be qino i galalsako isuse kuxako.

¹⁶Ha zeerese berse worge axi yessako nunini oo'oyne feday uddi Wonto zawa axiti ha esukofa fede losso keenguwanxhiko.

¹⁷Hi bhikkiluttey miidha e oonesa baaka moddhese e maaquwa gisha hatte hay ohiya ta yesesuna hinumba galatuwasso.

¹⁸Ye esini burussi hinuse ta ohesi hi bhikkilutteniya hi giddaa shahoy yesesa siidiko ta yese. Ye ta siido zeereni essaafay aade maaqesa erako ta ere.

¹⁹Aade maaqe aadexona aadexeesiti oone u maaqesi shahutti eruttoronike hi giddaa shahoy yeseko e worguse.

²⁰Bidzi godo hi bhikkilutteniya hi muunesi Laaxi qamete maaquwasso.

²¹Ye esani hi muuneniya hi bidzi bidzina feda katto badesineko alleydi hi gooshuna hi muune, bidzi naayusune feday e goojhe.

²²Fetto hinuse essaa hi muune zawa essaa hi ushe zawa keenguwaytuwa? Abasuna Wonto zawa axiti bhikkilo hi haasse? Abasuna keenguwasita hi borsuse? Hine am hinuse ta ohhe? <<Ha esa modheko hi hanto>> hidiya ta hiye? Fetto <<Modheko hi hanto>> hidi hiwwasso.

²³Laaxi qamete gisha hinuse ta otechoshi Laaxi garafa ta ettechoshako. Laaxi Yesuusay gardi be ingutto qama boora etti

²⁴Wonto be galatto geede meyssini <<Hii'eyte, ha esi hinuse maaqe ta achoko[5]. Tamba maxese ha esa mahuwayte!>> yeydi e hido.

²⁵Yeydiwo qamete geede essaafa ushushoosha densi <<Ha usshi ta suuxuna ee'e kille caaqoko. Hi usheniyani tamba maxese ha esa mahuwayte>> yeydi e hido.

²⁶Ye esini ha boora hi muune woggakaara ha usshe hi ushe woggakaara uddi Laaxi Yesuusay yoone wogga aallo e hayboko ohiya hi yese.

²⁷Yoonase ooneni bishuwa ogena Laaxi boora e muudako oo'oyne Laaxi usshe e usshako Laaxi achosaara Laaxi suuxusaara oychuko e keenge.

²⁸Ha e gisha ooneni ha boora miyemiyara ha ushe ushemiyara burona biya arsi beewaye!

²⁹Ye esini ooneni Laaxi achoy aba e maaqesa shati erdo badi Laaxi boora e muudakowara Laaxi usshe e usshakowara be garako yaa'a e oone.

³⁰Hi giddaafa lagiti u gattosaara u hardosaaray bidzi bidzitini haydhosi ye e gishako.

³¹Nuni numba arsi beedessako yeydi nu gara yaa'uttuwadiko e yecha.

³²Maaqe baa hannina ha saha axitaara nu yaa'utteeme Laaxi hatte yaadhiko nuu e mure.

³³Ha e gisha nuundo nayshito! Laaxi qametese hi bhikkilutteniya wola katti muuwayte.

³⁴Hi bhikkilutteniya Wontoy hi gara yaa'eesume hinukaa naaydese axi yessako be zawaa muuwaye. Attaasita hinuko ta hamoroniyako ta eruse.