Read koorete 1Qorontoosaxituse 13 Bible Online

1Qorontoosaxituse 13 - koorete bible

1Qorontoosaxituse 13

¹Axi nuunanani maaqqe Wonto woosaxiti nuunana zeere ta erdako fetto eeha ta keenguwasa hade wol gara giire laakake yesesaara mikkidi koyse shaashatake yesesaarako tani.

²Kaayo zeere ta dandadhakoni aachuttesesani uddi ta erdakoni era uddi ta keendakoni bakkani e godofa densi ooxe aadexo ta keendakoni eeha ta keenguwasa tani go'uwa axuko.

³Ta keengesani uddi jhi'ituse ta indako tamba tamana meggese garsi ta indakoni eeha ta keenguwasa abani tamba go'uwasso.

⁴Eehay danda'esako, jhergesako, eehay dhiiddhuwasso, nashuttuwasso, waaruwasso.

⁵Eehay woga keenguwasa maaquwasso, biyawo beenesa maaquwasso, eehay ukke huuluwasso, be miidhutto miidha taagguwasso.

⁶Eehay aade maaqe abakona e maggesa baaka iita maaqe abakona magguwasso.

⁷Eehay uddi base iddiko e danda'e, uddi abako <<Aadeko>> hidiko e hine, uddi woggako gobbo e keenge, uddi woggako miindi e ee'e.

⁸Eehay koolo aalloko e yese. Kaayoni e maaddhako e ooxutte woggay yootako e yoone, kille nuuna zeereni e maaddhako e atte woggay yootako e yoone, erani e maaddhako e ooxutte woggay yootako e yoone.

⁹Ye esini eraafani shahuttesesako nu ere, kaayowafani shahuttesesako nu zeere.

¹⁰Facete keenguwasi yooneniyaka shaho maaqichashiti ooxuttoko e ooxutte.

¹¹Yele yesine yelekeko ta zeericha, yelekeko ta maxicha, yelekeko arsi ta beecha. Orje axe ta maaddho geede yelete yeso ta garafa ta oosso.

¹²Hatte hade daw'atana nu beenenikeko jhemmi jhemmissi nu beene, yenniyama uddi abako tiddhissiko nu beene. Hatte ta ere eray faceko, yenniyaka Wontoy tamba erenikeko tanini facete keenguwasa ta ere.

¹³Yoonase aadexoy, gobboy, eehay, ha u haydzi miindiko u yese. Ussaafa garesi eehako.