Read koorete 1Qorontoosaxituse 14 Bible Online

1Qorontoosaxituse 14 - koorete bible

1Qorontoosaxituse 14

¹Yoonase eehana yesese karduttuwayte, Ayaana Geeshi ingeesita fetto kaayo zeereni oseydi worguwayte.

²Kille nuunana zeere axi e zeeresi Wontoko baaka axuko maaquwasso. Aachiya yesesa Ayaana Geeshi esa zeeruse gisha e zeeresa eresi baasso.

³Kaayo zeeresimay fede axuko dicheshe osusese minxese e zeere.

⁴Kille nuuna zeere axi bembawoko e diche, kaayo zeeresimay Wonto zawa axita u uddinako e diche.

⁵Hi uddina kille nuuna hi zeerdako eehako ta eehicha, ye esume garsi kaayo hi zeerdakoko ta eehicha. Wonto zawa axiti dicoronike kille nuunana zeere axi e zeerdosi birchutteko e worguse. Birchutte e dheeba'ayko kille nuunana zeereesume kaayo zeere axuko garesa.

⁶Yoonase Nuundo nayshito! Hinuko ta hangeniya kille nuunana hinuse ta zeerdako am hinumba ta go'e? Gardesesa hinumba ta go'esi addeydo badechashe adduseni, erani, kaayoni, erunxeni etti ta handakoko.

⁷Hade shuushulekiyara zimbekiyara yese lubbo keenguwa esuna zingaluso miijhiti fetto esuna shahutti be erutte zingale kato u dheeba'ayko u inge katoy aba e maaqesa waanidi e erutte?

⁸Assi marachoy axi eruwa ogena uwwuttako toorase ooni biya naqesa?

⁹Yeydiwo hinuni kille nuunana zeerisine axi eruwa ogena hi zeerdako hi zeeresa ooni erese danda'esa? Mikke agexuse zeeresako hi maaqe.

¹⁰Ha saha gara zeerutte nuunay lagako, be uddina birche keemako u keenge.

¹¹Yoonase taako zeerutte nuuna eruwasa ta maaddhako taako zeere axuse borsako ta maaqe, esini taase borsako e maaqe.

¹²Hinunini Ayaana Geeshi ingita orjena hi worge gisha hinuse e lagorosa keddaysi col'e hinumba e worgusesi aadexeesita diche ingitako.

¹³Ha e gisha kille nuuna zeere axi ye be zeeresi birchuttorosa Wonto shi'uwaye.

¹⁴Ye esini kille nuunana Wonto ta shi'eniya Wonto Ayaanay ta muxhurowanna shi'oko e shi'e, ta sorgemay aykuwasso.

¹⁵Hine am hante taa e worguse? Wonto Ayaanana ta muxhurowanna ta shi'e, assi ta sorgenani ta shi'e hidiko. Wonto Ayaanana ta muxhurowanna ta zingale, assi ta sorgenani ta zingale hidiko.

¹⁶Yeydima maaqe e dheeddako shi'isine Ayaanana Wonto ne galatusune ne ohesa eruwa borsay Wonto ne galate galatase <<Ameen>> hidi hiyese waydini e danda'e?

¹⁷Aadewo Wonto galatese ne hicho galatay modheko maaqicha, hidakoni fede axi ye ne galate galatana dicuwasso.

¹⁸Hi uddime garsi kille nuunana ta zeere gisha Wontoko ta galate.

¹⁹Hidakoni aadexeesiti bhikkilo giddaa kille nuunana tammi kuma kato ta zeereesume fedeesita erusese hissine ichichi kato erutte nuunana zeereko taase bishesha.

²⁰Nuundo nayshito! Iita abakose hade iita eruwa xhaheke maaquwayte baaka hi gaxuna xhahe maaddhofita, fetto hi gaxuna uuxheseesita maaquwayte.

²¹Ha esini Woga Fissharowa << <U eruwa nuunanaara fede wude axi nuunanaarako ha gerituse ta zeere; ta zeerdakoni fetto siyuttuwasso> yeydiko e hine Laaxe maaqe Wontoy>> yeydiko e diizuttese.

²²Yoonase kille nuunana zeeresi Wonto osay eruttoronike ato e maaqesi aadesso baa axitusuko baaka aadexe axituse maaquwasso. Kaayo zeeremay ato maaqesi aadexe axituse baaka aadesso baa axituse maaquwasso.

²³Aadexeesiti be bhikkilutteniya be bidzi bidzina kille nuunana u zeerusune borsiti hidi hiyoni aadesso baa axiti yoodako ye zeeriya yeseesita <<Ha geriti goojhiko yese>> hidi mee hiyuttuwaye?

²⁴Maaqe baa be bidzi bidzina kaayo u zeerusune borsa maaqe axi hidi hiyoni aadesso baa axi yoodako e siine katoy uddi be cubbo e eroronikeko e mahe. Yeydiwo e siine katoy uddi Wontoy e gara yaa'enike e erorosako e mahe.

²⁵Be muxhurowa fasshi be gaddechoshako e adduse, be deemonani sahaa undiko <<Aadewo Wontoy hi giddaako yese!>> hidi hissine Wonto buro e disse.

²⁶Nuundo nayshito! Yoonase am hante e worguse? Wonto kuxese hi bhikkilutteniya hinukafa bidzi zingale e zingale, feday erunxe e eruse, feday Wontoy esuse beyse abakoko e adduse, fedani kille nuunana e zeere, fedani assi ye kille nuunana zeeruttechashe e birche. Yebo, ha esiti uddi aadexeesita dichesha maaqeko e worguse.

²⁷Kille nuunana zeereesiti yessa'ayko lam'e oo'oyne laga'ayko haydze maaddhi bidzi zeerdi alsoyna feday assi zeeruwaye. Ye usiti zeeresani fede axi birchuwaye.

²⁸Birche axi dheeba'aykoma kille nuunana zeeresi ye bhikkilowaka mikku hiwaye, beesaara be Wonto gooshushaarawo zeeruwaye.

²⁹Kaayo zeereesiti lam'e oo'oyne haydze maaddhi zeeruttuwaye, fedeesitimay ye zeeruttase haysi arsi beyuttuwaye.

³⁰Hi bhikkilowaka bidzi axi zeerusune fede axuse Wontoy bidzi abako e addussako ye acha zeeriya yecha axi mikku hiwaye.

³¹Hi bidzi bidzina era hi degexoronikiyara hi miingoronikiyara hi uddina bidzi zeerdi alsoyna feday assi kaayo zeeresuko e danda'e.

³²Kaayo inge Ayaanay kaayaxi bemba eruwannike mahuwasso, ye kaayaxusuko e woosutte.

³³Ye esini Wontoy modhete eehe Wontoko baaka koyse eehe Wonto maaquwasso. Be godowa godowa yese hayla maaqe Wonto zawa axiti uddi mahenike

³⁴indowaxhiti bhikkilo giddaa mikki hiyuttuwaye. U woosuttoronike baaka u zeeroronike ususe ingutto baasso. Muse wogani u woosuttoronikeko e ohe.

³⁵Bhikkilo giddaa indowaxhi zeerdako borsusesa e maaqe gisha bidzi bidzi abakita ere worgo'aykete be ade be zawaa oycuttuwaye.

³⁶Hinne, Wonto katoy bentosi hinukaafa? Oo'oyne Wonto katoy yoodosi hi goshushewa?

³⁷<<Tani kaayaxuko>> oo'oyne <<Tani Ayaana ingo keengesako>> yeydi hine axi yessa'ayko ha ta diizzosi Laaxi woosso maaqesa beese ereko esa e worguse.

³⁸Ha esa eruwa axi yessa'ayko axini esa erdoffe.

³⁹Ha e gisha Nuundo nayshito! Kaayo zeerese oseydi worguwayte, kille nuunana zeeresani tuccofita.

⁴⁰Maaqe baa uddi abako e bishe ogenaara woganaara mahuwayte.