Read koorete 1Qorontoosaxituse 15 Bible Online

1Qorontoosaxituse 15 - koorete bible

1Qorontoosaxituse 15

¹Hatteni nuundo nayshito! Hinuse ta otecho modhe odo hinumba maxusesuko ta worge. Ye modhe odoni hi ettechoshaara esuna miindi hi eedhechoshaarako.

²Hinuse ta oto kato minsi aytako ha modhe odonako hi loole. Ye esi dheeddakoma hi aadesosi yahoko.

³Uddi abakome afana maaqesa taase ta etto geede hinuse zeerdiko ta yecha. Ye esini Hayla Fissharowa e diizuttesenike Kristosay nu cubbo gishako e haydho,

⁴e moogutto, Hayla Fissharowa e diizuttesenike haysso wonte haybowafa e dendo.

⁵Yeydiwo Phexhroseni esa beedo, ye e geedeni e erusicho tamma lam'i esa u beedo.

⁶Ye e geedeni biya aadexicha ichichi xhiixe gareesituse bidzi woggaawo e bento. Ye usaafa lagiti hatte aallo yesako u yese, bidzi bidzitimay haydhiko u yese.

⁷Ye e geedeni Yayqoobey beedo, anxuttaasitini be uddina esa u beedo.

⁸Aalliciraaka hade kessake yese taase assi e bento.

⁹Ye esini tani anxuttaasitume uddi eeroko. Wonto zawa axita waayye beysesa ta maaqicho gisha <<Anxuttasuko>> hidi xheyguttese bishuwassho.

¹⁰Hidakoni hatte ha esa yeydi ta maaddhoy Wontoy axuse keenge modhe maxowafako. Wontoy taase keenge modhe maxoy yaho atto baasso. Fetto fedeesitume uddime garsi lagussi hantiko ta yese. Yeydi ta hantosini taa e maaddho baane Wontoy be maxo modhetiyafa dendasuna taaka gaddosunako.

¹¹Yoonase taani maaqqe ye usiti ohesi ha modhe odoko. Hinunini <<Aadeko>> hidi hi ettosi ha esawoko.

¹²<<Kristosay haybowafa dendiko yese>> yeydi ohuttesa e maaddho geede hinne abasuna hinukaafa bidzi bidziti <<Haydhay denduwasso>> yeydi u hine?

¹³Haybowafa dendey dheeba'aykoma Kristosay haybowafa dendo baasso yeydi hiyoko.

¹⁴Kristosay haybowafa dendo baasa e maaddhako nu erusesini yahoko e maaqe, hi aadexoni yahowoko.

¹⁵Haydhecha axiti haybowafa u dendesi aade maaqe e dheeddako Wontoni Kristosa haybowafa denso baasso yeydi hiyoko. <<Wontoy Kristosa haybowafa densiko yese>> hidi nu erusosuna fetto zaadena Wontose atteydasita maaddhiko nu yese hidi hiyoma!

¹⁶Ye esini haydhecha axiti haybowafa denduwasa u maaddhako Kristosani haybowafa dendo baasso hidi hiyoko.

¹⁷Kristosay haybowafa dendo baasa maaddhako hi aadexoy yahowoma! Hinuni hatte aallo hi cubbowafa maarutto baytako yeydi hiyoko.

¹⁸Yeydi e maaqo'ayko Kristosa aadessi haydhasiti baadiko u yese yeydi hiyoma!

¹⁹Kristosa gara gobbo nu keengesi ha saha gara nu yese yesosewo e maaddhako axume uddi nuuse higilusoositako nuni.

²⁰Hattema Kristosay haydhi dendeesitukafa burona dendase maaddhi aadena haybowafa dendiko e yese.

²¹Ye esini axi hay'oronike bidzi axi badena e maaddhonike axi haybowafa dendesini e maaddhosi bidzi axi badenako.

²²Axi uddi Addaame badena e hay'enike yeydiwo axi uddi Kristosa badenako yeso e degexe.

²³Ye esini maaqesi be woggana wogganako. Haybowafa acha denday Kristosako. Ye e geedeni e yooneniya esuse maaqeesiti haybowafako u dende.

²⁴Ye e geedeni ha saha aalliciray e maaqe. Yenniyani Kristosay maagetoni, adetoni, osani uddi iisshi baysi kaateto ade maaqe Wontose e inge.

²⁵Ye esini Wontoy iilaxita uddi e adeto oomo be mahe aallo Kristosay kaatoronikeko esa e worguse.

²⁶Iilaxitaafa aallicira iichutti baanesi hayboko.

²⁷Ye esini <<Wontoy uddi abako Kristosa adeto oomoko e matese>> yeydiko e diizuttese. Hidakoni <<Uddi abako e adeto oomoko e matese>> hidi e hiyuttusune uddi abako e adeto oomo mata Wontoy beese Kristosa oomo e maaquwannike addako.

²⁸Uddi abakoy Kristosa adeto oomo maaddho geede ade maaqe Wontoy bidzini atto badi uddi basi gara adeto keengoronike yeley beese uddi base be adeto oomo mataasuse esuse assi e adeto oomoko e maaqe.

²⁹Yoonase haydha axiti denduwasa u maaddhakoma haydhasitume hissine xhamaqutteesiti u xhamaqutte xhinqatey aba birchena e keenge? Fetto denduwasa u maaddhakoma axiti u gisha abasuna u xhamaqutte?

³⁰Nunichi? Uddi wogga nu lubbose nu jhasshoshi abasuwa?

³¹Nuundo nayshito! Uddi wonteko tani ta hay'e aallo ta kardutte. Ha esani hinuse ta ohesi Laaxi Yesuusi Kristosa badena hinunnana ta cee'utte gishako.

³²Efesoone hade bo'oke yese axitaara ta karduttosini ha saha yesosewo e maaddhako taase bentesi aba ommani? Haydha axiti haybowafa denduwasa maaddhako <<Guta nu hay'e gisha nu miyyeese, nu ussheeshe>> yeydi hine axituke maaqema!

³³Hallofita! Iita axaara feyshey axi maxo modheko e iise.

³⁴Hinumba erdi maaquwayte, gizetena yesuwayte. Ha e geede sekke cubboni hantofita! Hi giddaa Wonto eruwasitako bidzi bidziti yesa. Ha esani ta ohesi hi borsorosako.

³⁵Bidzi axi <<Haydhecha axiti u dendesi waanidini? Haybowafa u dendoyna u garay waakidesesana?>> yeydi hissineko oyceshe e danda'e.

³⁶Doo neno muya! Ne ayle mor'ey be haydho baassa wokke mu'uwasso.

³⁷Neni gosani maaqqe fede kaxa aylisine e aafeko ne aylesa baaka geede mudhi bente mazzaara e aafiyara maaquwasso.

³⁸Wontoy ye aylutta mor'ese be eehenikeko gara e inge. E bidzi bidzi mor'eseni be bishana be bishana yese garako e inge.

³⁹Achoy uddi bidzi bisha maaquwasso. Axi achoy bidzi bishako, keemosaara bo'itusaaray fede bishako, kafiti achoy fede bishako, gulxhe achoy fede bishako.

⁴⁰Afaa yeseesiti beese be bisha garako u keenge, sahaa yeseesiti beese be bisha garako u keenge. Afaa yeseesiti be bisha kuxa fuulako u keenge, sahaa yeseesitini fede bisha kuxa fuulako u keenge.

⁴¹Qoossi keenge kuxa fuulay bidzi bishako, agunnay keenge kuxa fuulay fede bishako, assi xhoolintey keenge kuxa fuulay fedako. Bidzi xhoolintey fetto fede xhoolinteme shahuttese kuxa fuulako e keenge.

⁴²Haybowafa dende axiti aba u bisheshako hinuse ta ohe. Axi garay sangesa maaddhi e moogutte, sanguwasa maaddhi e dende.

⁴³Kuxa keenguwasa maaddhi e moogutte, kuxa fuula keengesa maaddhi e dende. Gafaxe maaddhi e moogutte, osaxe maaddhi e dende.

⁴⁴Ha sahaafa be maaqesuna e moogutte, afaase be maaqesuna e dende. Ha sahaafa maaqe garay yessa'ayko afaafa maaqe garay yesako e yese.

⁴⁵Ye esini <<Buro axe maaqicha Addaamey yeso keengesa e maaddho>> yeydiko e diizuttese. Geede Addaamey yeso inge Ayaanako e maaddho.

⁴⁶Buro yoodasi afaafa maaqesa maaddho badi e yesune sahaafa maaqesako, ye e geedeni afaafa maaqesi e yoodo.

⁴⁷Buro yooda axi sahaafa benta ha sahaafa meddhutta axuko. Lakkunxo axi afaafa yoodasuko.

⁴⁸Ha sahaafa maaqeesiti ha sahaafa meddhutta axuko u bishe, afaafa maaqeesiti afaafa yooda axuko u bishe.

⁴⁹Ye sahaafa meddhutta axe ni bishonike yeydiwo ye afaafa yooda axeni bishako ni bishe.

⁵⁰Nuundo nayshito! Hinuse ta ohesi achowara suuxaara maaqe garay Wonto kaatetiya geluwasso. Yeydiwo sange garay sanguwasa degexuwasso.

⁵¹Yebo, aachiya yechine hatte addeyda bidzi basuko hinuse ta ohe. Nu uddina nuni hay'uwanxhiko, nu uddinama artoko nu arte.

⁵²Nu artesini aallicira marachoy uwwutteniya hade aafe qibheke bidziyakawoko. Ye esini marachoy uwwutte, haydhecha axitini sanguwasa en'a maaddhi u dende, yenniyani nu arte.

⁵³Ye esini sangesi sanguwassaa hay'esini hay'uwassaa arteko e worguse.

⁵⁴Sangesi sanguwassaa hay'ichashi hay'uwassaa e arte woggaaka <<Hayboy iichutti e baado! Haybo, ne iichichoshi ayn yese? Haybo, axe miidhicha ne osay ayn yese?>> yeydi diizuttechashi yenniyako e ite.

⁵⁵

⁵⁶Hayboy axe esuna be miidhe osa e degexesi cubbowafako. Cubboy osa e degexesi wogaafako.

⁵⁷Hattema nu Laaxi Yesuusi Kristosana iicho nuuse inge Wontoy galatuttuwaye.

⁵⁸Yoonase ta eehe nuundo nayshito! Miindi ee'uwayte, bidzi abakonani sekke hanke hidofita, Laaxi hantase hi gakkesi yaho e maaquwasa erdi uddi woggaa Laaxi hanta hantese oseywayte.