Read koorete 1Qorontoosaxituse 2 Bible Online

1Qorontoosaxituse 2 - koorete bible

1Qorontoosaxituse 2

¹Nuundo nayshito! Hinuko ta yoodo wogga e aallicira axi erese danda'uwa Wonto maxo[1] hinumba ta erusoniya zeere sooqussi hinuse zeerenaara keddaydese erana go'uttenaara erusso baasso.

²Hinunaara ta yechoniya Yesuusi Kristosa gisha fetto suxhutti haydha esusewo baaka feda ta zeeruwannike mela maxoko ta keengicha.

³Hinunaara ta yecho wogga gafaxe maaddhi jhashishiniyara orjena kobursiniyarako ta yecha.

⁴Yoonase hi aadexoy axi erana eedhesesa e maaddho baane Wonto osana eedhesesa e maaqoronike ta zeerdosani maaqqe ta eruso katoy Wonto Ayaana osana kiidhuttesesa baaka axi eranaara axuse sooqussi zeere uqusenaara maaquwadiko e yecha.

⁶Yeydi e maaddhakoni Wonto ogiya uuxheseesituse eranako nu zeere. Ye erani ha saha bade era oo'oyne ha saha gara yese u bayoronike e maaddhese afana maagiti era maaquwasso.

⁷Nuni zeere eramay buro erutto badi aachutti yecha Wonto erako. Ye erani abani meddhutto baane buro Wontoy kuxa fuula nu degexenike burussi mati yechoshako.

⁸Ha saha ahichashitaafa ye era erdesesi ooneni baasso. Erdesesakoma kuxa fuula keenge Laaxe suxxhi wodhuwadiko u yecha.

⁹Hayla Fissharoy <<Axi aafey beedo baassa, axi washey siido baassa, axi muxhuroy masso baasako Wontoy be eeheesituse e naddhese>> yeydiko e hine.

¹⁰Nuusema Wontoy aachiya yechashe be Ayaana badena addussiko e yese. Wonto Ayaanay uddi base fetto axi e xhabhowa aandi ellusese danda'uwa aako maaqe Wonto maxoko hossi kessi arsi e beene.

¹¹Adeko be gawwaa yese maxo erese danda'esa baaka feday eruwasso. Ye esukewo Wonto maxo eresi Ayaana Geeshuwoko baaka ooneni erese danda'uwasso.

¹²Wontoy nuuse indo ingo kumena erese nu danda'oronike Wontokofa Ayaana nu ettosa baaka ha sahakofa maaqe ayaana etto baanxhiko.

¹³Nuni Ayaana oge gisha Ayaana keenge gerituse ohisine axi garafa bente erana e maaddho baanne Wonto Ayaanakofa bente eranako nu ohe.

¹⁴Wonto Ayaana keenguwa aximay Wonto Ayaanakofa ingutta ingo efese danda'uwasso. Ye esini ye e bisha ingoy aba e maaqesa sekke hanke arsi beyese Wonto Ayaana badena e maaqe gisha gaxhese danda'uwasso. Ususeni fetto muyoonteko e bishe.

¹⁵Wonto Ayaanana uuxhese axi uddi basuko arsi e beene, ye axema ooneni arsi beewasso.

¹⁶Ye esini <<Wonto muxhuro ooni erese danda'esa? Esani erusese danda'esi oonewa?>> yeydiko e diizuttese. Nunimay Kristosa muxhuroko nu keenge.