Read koorete 1Qorontoosaxituse 3 Bible Online

1Qorontoosaxituse 3 - koorete bible

1Qorontoosaxituse 3

¹Nuundo nayshito! Tani hinumba erusosi ha sahase maxeesitaara Kristosana miindo baa xhahitaara hi maaqenike baaka Wonto Ayaanana uuxhese axe mati hinumba erusese dandadho baasso.

²Uuxha axi muune kaxa miyese hi dandadho baa gisha tani hinumba usshoshi fetto maaxuko. Maaxewo baaka fede kaxa hinumba muusso baasso. Hatteni e maaddhako uuxha axi muune kaxa miyese yenawo danda'uwaytako.

³Yoonase hinuni yenawo hatteni ha sahase maxeesitako. Acheysha wola hi dhiiddhe gishaara hi berse gishaara ha sahasewo maxeesita maaquwaytuwa? Hinne hi hantay axi be maxowafa hante hantake yesesa maaquwaye?

⁴Hinukafa bidzi <<Tani Phawlosesuko>> fedani assi <<Tani Aphilosesuko>> hidi hiisune ha sahase maxe axuke hi maaddhosa maaquwaye?

⁵Hinne Aphilosey abani? Phawloseni abani? Hi aadexoronike mata woosutteesita maaquttuwaye? Be bidzi bidzina u hantesi Laaxi u bidzi bidzise indo hantako.

⁶Tani totto, Aphilosey waaxe ussho, dishashimay Wontoko.

⁷Ha e gisha keddaydi bentesi tofuttase diche Wontoko baaka tokesani maaqqe waaxe ussheshi abani maaquwasso.

⁸Tottaseni maaqqe waaxe usshashi wol genniko. Be bidzi bidzinawoko be hantake Wonto garafa moore u ekke.

⁹Ye esini hantaxe maaqe nuni Wontosuko wolko nu hante, hinunini Wonto wootaara e zawa mallaarako.

¹⁰Wontoy taase be keenge maxo modhetiyafa indo ingona hade modhussi keexe keexhe ere hantaxuke kaacho ta kaassho. Fedani ye ta kaassho kaachowa keexe e keexhe. Keexhakoni waysi be keexhenike biya kafeko e worguse.

¹¹Kaachutta kaacho baaka ooneni fede kaacho kaacheshe danda'uwasso. Ye kaachoni Yesuusi Kristosako.

¹²Ye kaacho garani ooneni worqena oo'oyne birrena oo'oyne e woomay keddaydese shuchuna oo'oyne mixuna oo'oyne xhinqana oo'oyne mazzana keexe keexha'ayko

¹³waydi e keexhonike beyuttoko e beyutte. Yaa'a wonteko addaa e kese, tamana e addeyne gisha axuse e bidzi bidzi hantay aba e maaqenike tamanako naa'utti e beyutte.

¹⁴Ooneni ye kaachowa e hantosa tamay miye dheeba'ayko mooreko e degexe.

¹⁵E hantay tamana meggutti baanesi moore degexuwasso, esama Wontoy maarako maare. E maaresini hade tamaafa tulxhi atta axukeko.

¹⁶Wonto Hayla Zawa hi maaqesaara Wonto Ayaanay hinuka yesesaara eruwaytuwa?

¹⁷Yoonase Wonto Hayla Zaway hayla e maaqe gisha ooneni ye zawa woddussako Wontoy esa woddusako e wodduse. Ye Wonto Hayla Zawani hinumbako.

¹⁸Yoona, ooneni bemba qaarusoppe, ha saha gara yese era badena <<Tani eraxuko>> hidi hitta'ayko ooneni aade maaqe Wonto era be degexoronike bemba muya mati beewaye.

¹⁹Ha saha axiti <<Ha esako eray>> yeydi u hinesi Wonto burowa muyoonteko. Ye esini Hayla Fissharowa <<Wontoy eraxita u iita fayanketenako uso e ayke>> yeydi e hiyuttonikeko.

²⁰Fede godoni <<Wontoy eraxiti maxoy yaho maaqesa erako e ere>> yeydiko e diizuttese.

²¹Yoonase uddi abakoy hinuse maaqe gisha ooneni axuna cee'uttoffe.

²²Phawloseni, Aphiloseni, Phexhroseni, sahani, yesoni, hayboni, hatte yesesini, geede yoonesini, uddi basi hinusuwoko.

²³Hinuni assi Kristosasuko, Kristosani Wontosuko.