Read koorete 1Qorontoosaxituse 4 Bible Online

1Qorontoosaxituse 4 - koorete bible

1Qorontoosaxituse 4

¹Yoonase uddi axi numba Kristosa hantaxukiyara e aallicira erese axi danda'uwa Wonto maxo ohese adeto ettesesukiyara mati beewaye.

²Wonto maxo ohese adeto ettesesi muxhuraxe maaddhi benteko esa e worguse.

³Hinumbani maaqqe fede axi ta gara yaadhakoni taase abani maaquwasso. Fetto tani ta gara yaa'uwasso.

⁴Tani erenike ta muxhurowa <<Iitako ne hanto>> hidi hinesi baasso. <<Iitako ne hanto>> hidi hinesi dheeddosuna aadewo gizo ta maaqenike eruttiya baasso. Ta gara yaa'esi Laaxi Yesuusawoko.

⁵Ha e gisha Laaxi Yesuusay yaa'ese yoonesume burona oone garani yaadhofita. Be yooneniyani esi cenchaa aachuttechashe fo'iyako e kesse. Axiti be muxhurowa aashecho maxoko e adduse. Yenniyako Wontoy e bidzi bidzina e muxhuro maxo beedi e suuze.

⁶Nuundo nayshito! Hinumba go'ese hissineko taara Aphilosiyara beedi nu garafa hi eroronike ha ta otosa uddi numba bishushi ta uqusso. Ere hinumba e worgusesi <<Diizuttecha woga gara kossofuna>> yeydi hinesako. Ha e gisha bidzi axuna cee'uttisine fede axe haasse hinumba worgusuwasso.

⁷Neni fedeesitume abanani ne gare? Ne keengesaafa Wonto garafa ne etto baasi burowafa ayti neesewo maaqesi a'esana? Hinne ne keengesi uddi ne ettosawo e maaddho geede hade <<Olowafa ayti ha esi taasuko>> hidi hine axuke ame ne cee'utte?

⁸Hatte <<Numba worgusesa uddi degessiko nu yese, wodundiko nu yese>> hidima hiinesi? Nuni kaatto baanne kaattima hi yesesi. Yebo, hi kaatesi aade e maaddhesako eehako ta eehicha. Nunini hinunaara wolkoko nu kaataane.

⁹Wontoy numba anxuttaasita hayboy u gara yaa'utto axituke uddi assaafa geede aalliciraaka e essesesako taa e bishe. Ye esunanako sahaakani afaakani uddi Wonto woosaxituseni maaqqe axiti buroni hade kaasusaara miichushaara maaddhi nu bento.

¹⁰Nuni Kristosame hissineko muyita nu maaddho, hinunimay <<Nuni Kristosana eraxitako>> hidiko hiine. Nuni gafaxitako, hinunimay <<Osaxuko nuni>> hidiko hiine. Hinuni <<Nuni kuxuttesesako>> hidiko hiine, nunimay haassutteseesitako nu maaddho.

¹¹Hatte aallo nu naaye, nu saze, nu gunduse, nu durutte, essaa nu yese zawani dheeddi nu maddhunge,

¹²nu kuchena hantisineko nu gakke. U aacushune suuzoko nu suuze, waayye nuu u beysusuneni danda'ako nu danda'e,

¹³nu sunxe u baysusune modhe zeereko ususe nu zeere. Hatte aallo ha saha fittiyara dafuttese iita abakitaara maaddhiko nu yese.

¹⁴Ha esani hinuse ta diizosi hade ta eehe ta nayshituke mati hinumba murese wordi baaka hinumba borsusese hissine maaquwasso.

¹⁵Kristosa ogiya hinumba dicheeshita fetto tammi kumana taabutteesita hi keendakoni hinumba yella adey bidziwoko. Ye esini modhe odo hinuse ohena Yesuusi Kristosaara bidzo maaddhi hi yesoronike hinumba yellay tambako.

¹⁶Yoonase tamba beedi taanke hi yesorosako odde hidi hinumba ta shi'e.

¹⁷Ha e gisha Laaxuna ta yellese muxhuraxe maaqe ta eehe Xhimootooseko hinuko ta ansese. Uddi be godowa godowa yese Wonto zawaxita eruse eraara wolko hangesa Yesuusi Kristosaara wolko ta yesoy waydi e maaqenikeko hinumba e maxuse.

¹⁸Hinukaafa bidzi bidziti tani hade hinuka hanguwasa uso e bisshinneko u nashutte.

¹⁹Tanimay Laaxi maxo e maaddhako ukkeko ta hange. Ye woggaaka ye nashutteesituse ye u nuunaafa kesesa siyewoni e maaddho baanne u osani beyeko ta worge.

²⁰Ye esini Wonto kaatetey esuna eruttesi axi nuunafa kese zeerena e maaddho baanne Wontoy be osana hantusuneko.

²¹Hatte, hi worgesi abani? Hinumba murese wurce etti ta hamorosuwa hi worgeni? Oo'oyne eehanaara shenonaara ta hamorosani hi worge?