Read koorete 1Qorontoosaxituse 6 Bible Online

1Qorontoosaxituse 6 - koorete bible

1Qorontoosaxituse 6

¹Hinukafa bidzi fede aadexesaara zeere e keendako Wonto zawa axiti zeerena beyoronike maheeme luufose aadesso baasiti buro hamese waydi e naasse?

²Hayla maaqe Wonto zawa axiti ha saha gara u yaa'esa eruwaytuwa? Hinne ha saha gara hi yaa'esa e maaqusune oddhe abako gara yaa'ey waani hinumba e iissho?

³Wonto woosaxiti garani fetto ni yaa'esa eruwaytuwa? Hine ha saha gara ni yesune nii muhe abakiti gara waani gardesesa yaa'ese ni danda'uwaane?

⁴Yoonase hi yesuwa hinumba muhe abakiti gara Wonto zawa axiti uso haasse geri buro uddhi waydini wola hi luukke?

⁵Fetto ha esi hinumba borsusuwaye? Aadexe hi giddaaka indo nayshe naqesi gaxe keenge axi bidzini bentuwaye?

⁶Hinne indo na'i beyndo na'e luutti etti fetto Wonto aadexuwa yaa'axiti buro hamaa e hamaane?

⁷Yoonase sekke hanke wola hi luukesi aadewo hi undosako e beyse. Luufekofa hi miidhuttako bishuwaye? Yeydiwo be ekkesa hi garafa qaarussi e ettako bishuwaye?

⁸Ye esukofa hinuni fedeesita hi miidhe, fedeesiti garafa qaarussi hi ekke. Ha esa yeysi hi hantesi hinindo nayshiti garako.

⁹Wonto buro gizo maaquwa axiti Wonto kaatetiya u geluwannike eruwaytuwa? Hallofita, bishuwa ogena maacho col'i ye be col'a kunxeesiti, Wonto maaquwasa wonto mati kuxeesiti, laggeteesiti, asanxaara wolko laggete asanxiti,

¹⁰kayseesiti, uddi abakose habbu habbu hineesiti, usshi goojheeshiti, axi sunxe bayseesiti, bonqeesiti Wonto kaatetowa godo keemuttuwasso.

¹¹Hinukafani bidzi bidziti yeenke yesesako hi maaqicha. Hattema Laaxi Yesuusi Kristosa sunxunaara nu Wonto Ayaananaara cubbowafa shohuttiko hi yese, Wontose shahuttese hayla axita maaddhiko hi yese, gizete degessiko hi yese.

¹²<<Ta eehe abako ta hantuwannike tamba tuceshi baasso>> yeydiko e hiyutte. Hidakoni uddi abakomay taa go'esa maaquwasso. <<Ta eehe abako ta hantuwannike tamba tuceshi baasso>> yeydiko e hiyutte. Hidakoni bidzi abakoni be oomo tamba mahuwannike inxhadhiko ta yese.

¹³<<Kaxay gawwosuko, gawwoni kaxasuko>> yeydiko e hiyutte. Yebo, Wontoy kaxani gawwoni baysako e bayse. Ni garay Laaxi Yesuusasuko baaka laggetose maaquwasso. Laaxi Yesuusani ni garase worguse abakoko e mahe.

¹⁴Wontoy Laaxi Yesuusa haybowafa densiko e yese, numbani be osana haybowafa denxako e denxe.

¹⁵Hi garay be sunxuna sunxuna yese Kristosa garaafa bidzo e maaqesa eruwaytuwa? Hine Kristosa garaafa etti zaakoyndo garaafa bidzi gara mahuwa ta mahe? Fetto yeydi maaquwasso.

¹⁶Hayla Fissharowa <<U lam'i bidzi axuko u maaqe>> hidi e diizuttesenike zaakoyndiyara wola muhesi isaara wolla bidzi axe e maaqenike eruwaytuwa?

¹⁷Laaxi Yesuusaara bemba bidzo mahe axi esaara be muxhurona bidziko e maaqe.

¹⁸Ha e gisha laggetowafa zaruwayte, axi hante fede cubboy uddi e hantuttesi axi garame areko, axi gara tunusuwasso. Laggetena cubbo hante aximay be garako e tunuse.

¹⁹Hi garay Wontokofa hi ettosaara hinuka yesesaara maaqe Ayaana Geeshi essa yese hayla zawa e maaqesa eruwaytuwa? Yoonase hinuni Wontosuko baaka hinuse maaquwaytako.

²⁰Wooma shandiko hinumba e woondo. Ha e gisha hi garana Wonto kuxuwayte.