Read koorete 1Qorontoosaxituse 7 Bible Online

1Qorontoosaxituse 7 - koorete bible

1Qorontoosaxituse 7

¹Hatte ye diizzi tamba hi oycco zeerese ta hinesi macho efe dheebey modheko.

²Modhe e maaddhakoni laggetti cubbo be hanteeme be bidzi bidzinawo asanxi be macho keenguwaye, be bidzi bidzinani indowaxhiti be ade keemuttuwaye.

³Adey be machiyara muhe inxhadhoppe, yeydiwo machini be ade oossoffayya.

⁴Machi be acho gara adeto keenguwanniko, i acho gara adeto keengesi i adeko. Yeydiwo adey be acho gara adeto keenguwasso, e acho gara adeto keengenni e machiko.

⁵Wonto shi'ena oseyese hi lam'una wolla hi kundo woggasewo baaka wola oossofita. Ye e geede sekke wola muhuwayte. Yeysi hi matako Humbayey <<Hi col'a garafa hinumba kattobaytako>> hidi cubbo hi hantoronike hinumba mahese danda'uwasso.

⁶Ha esa hinuse ta ohesimay <<Yeydi maaquwayte!>> hidi woose e maaddho baane hi worgo'ayko waydi hi yesoro oge hinumba beysesuko.

⁷Axi uddi taanke macho etto badi yessako eehako ta eehicha. Maaqe baa axuse e bidzi bidzise Wontoy shahuttese ingoko e indese. Bidzise bidzi bisha ingo fedase fede bisha ingo yeysiko e indese.

⁸Gello baasitusaara u adey baadese indowaxhitusaara ta hinesi etto badiyara gello badiyara taanke u yessako modheko.

⁹Danda'e dheeba'ayko efuttuwaye geluttuwaye. Ye esini col'ana eexheeme geley efey bisheshako.

¹⁰Gelli yeseesitusaara etti yeseesitusaara taynesi Laaxukofa baaka taakofa maaquwasso. Ye esini gella indoy be adesofa kese wordofayya.

¹¹Shahutto'ayko gele baa yesuwayya oo'oyne be adiyara naquttuwayya. Yeydiwo adeni be macho dafe wordoppe.

¹²Fedeesituse ta ohesi taakofa baaka Laaxukofa maaquwasso. Aadesese bidzi adey aadesso baa indo keema'ayko esaara wolla yesese i worgo'ayko dattoffe.

¹³Aadesese indoy aadesso baa ade keema'ayko isaara yesese e worgo'ayko essofa kessofayya.

¹⁴Ye esini aadesso baasa maaqe adey aadesese be machina haylondiko e yese, aadesso baa indoni aadesese be adena haylondiko i yese. Yeydi maaqe e dheeddako hi nayshiti tuneydiko u yesaane, hattema haylondiko u yese.

¹⁵Aadesso baa indoni maaqqe aadesso baa adey shahuttese worgo'ayko shahuttuwaye. Ye e bisha zeerey yoodakoma aadexiya yese adeni maaqqe indo uso tuce basi baasso. Ye esini Wontoy nuu e xheydosi modhetena nu yesorosako.

¹⁶Neno aadexiya yese inde, aadexuwasa maaqe ne adey haliya ne badena loolesa e maaqo'ayko am ne ere? Neno aadexiya yese ade, aadexuwa ne machi haliya ne badena loolesa i maaqo'ayko am ne ere?

¹⁷Axi be bidzi bidzina Wontoy biya xheydoniya be yechonike yesuwaye. Be godowa godowa yese Wonto zawa axituse ta gaddo wogay ye esako.

¹⁸Ooneni gada utti yesune Wontoy esa xheydesso gada be utto baannike maaqese wordoppe. Gada utto badesine xheyguttessoni gada uttoppe.

¹⁹Gada utteni maaqqe gada utte dheebey wooma keenguwasso. Wooma keengesimay Wonto woga kafeko.

²⁰Ye e gisha axi be bidzi bidzina Wontoy biya xheydoniya be yechonikewo yesuwaye.

²¹Wontoy niya xheydoniya maalaa ne maaqicha? Maala maaddhakoni aban massofuna. Maaketowafa shawo kese degexa'ayko shawo kesuwa.

²²Ye esini maala e maaqusune Laaxi xheydosi shawo maaqe Kristosasuko. Yeydiwo shawo yesine xheygutta axi Kristosa maalako.

²³Wontoy wooma shandiko hinumba e woondese. Ye e gisha axi maalita maaddhofita.

²⁴Yoonase nuundo nayshito! Hi bidzi bidzina Wontoy hinumba xheydoniya hi yechonike Wontowara yesuwayte.

²⁵Hatte, etto baasitusaara gello baasitusaara Laaxi Yesuusakofa ta etto woossoy baasso. Maaqe baa Laaxi taa maardo gisha hade <<E otosa aadeko>> hidi axi ekkenike hidese axuke maaddhiko ta maxo ta ohe.

²⁶Hatte essaa nu yesesi maddhunxe wogga e maaqe gisha hatte hi yesenikewo hi yessako modheko taa e bishe.

²⁷Macho etti yesso dafese wordoppu, macho etto badi yessoni efese wordoppu.

²⁸Macho ne ettako cubbo hanto baannako. Yeydiwo bidzi woduroy ade gellako cubbo hanto baanniko. Maaqe baa ekkeesita geleesita ha saha yesowaka laga maddhako uso muhesa, ye esunako maddhay hi gara yoowanike ta worge.

²⁹Nuundo nayshito! Ta maxo siwwayte. Hay, beray aalesuko hine, ha makkina sekke macho keengesi macho keenguwasuke yesuwaye.

³⁰Higilesi be higiluwannike, maggesi be magguwannike maaddhi yesuwaye. Abako woongesi ye be woonge abako <<Taase maaquwasso>> hidi hiwayye.

³¹Ha saha bakka yese abakona go'utte axi be maxoni be muxhuroni e garawo gaddoffe. Ye esini hanzo yese ha sahay be yesenikeko e baane.

³²An basi maxonani maddhundo badi hi yesorosako ta worge. Macho etto baa axi Laaxi Yesuusa maggusese be worge gisha be muxhuro Laaxi hanta garako e gade.

³³Macho etta aximay be macho maggusese be worge gisha be muxhuro ha saha zeere garako e gade.

³⁴Ye e bishanako e muxhuroy lam'e shahuttese hidi hiyoko. Yeydiwo gello baa indoy oo'oyne woduroy be garanaara be maxonaara haylondi Laaxuse maaqe be worge gisha be muxhuro i gadesi Laaxi hanta garako. Gellese indomay be ade maggusese be worge gisha be muxhuro ha saha zeere garako i gade.

³⁵Ha esa hinuse ta zeeresi hinumba go'ese wordiko baaka hinumba maddhunxese maaquwasso. Ta maxoy hi muxhuroy shahutto badi Laaxi hantana miindi esuse e worgusenike hi yesorosako.

³⁶Bidzi axi efe masso badi yesune esuse aykuttecha bushoy gelese elli i beray gariya yesesa maaddhakowara be acho col'a iicheshe danda'e be dheeddosuna efese maxa'aykowara ekkuwaye. E ettako abani cubbo hanto baasso.

³⁷E eforonike esa mahe abakoy dheeddako be ekkuwannike danda'o keendi <<Tani ekkuwasso>> hidi mela maxo be mato geede efe dheebey modheko.

³⁸Ha e gisha macho ekkesi modheko e hante, ekkuwasimay gardese modheko e hante.

³⁹Machi i adey en'a yese aallo be gelunxi wogana tufuttiko i yese. I adey baadakoma be eehesa gelesuko i danda'e. Gela'aykoni aadexesa geleko iso e worguse.

⁴⁰Ade gello badi i yessako gardesesako maggisine i yese. Ha esi ta maxoko, taaseni assi Wonto Ayaanay taara yesesako taa e bishe.