Read koorete 1Qorontoosaxituse 8 Bible Online

1Qorontoosaxituse 8 - koorete bible

1Qorontoosaxituse 8

¹Hatte, Wonto maaquwasuse kaashutta acho miye gisha ta ohesa siwwayte. <<Nu uddina erako nu keenge>> yeydi nu hinesi eruttesesako. Hidakoni eray waarusuko e waaruse, eehamay dichako e diche.

²<<Erako ta keenge>> yeydi maxe axi yessako e worguse aallo erdo baasso.

³Wonto eehe axema Wontoy erako e ere.

⁴Yoonase Wonto maaquwasuse kaashutta acho miye gisha ta hinesi ha saha gara kuchena naqutta <<wontoko>> hidi hiyuttesi maruwasa e maaqenikiyara bidzi Wonto baaka fede wontoy baanikiyara erako nu ere.

⁵Laga be bishana bishana yese <<wonto>> hidi xheygutteesitaara <<laaxe>> hidi xheygutteesitaarako yesa. Afaakani maaqqe sahaakani <<wonto>> hidi xheygutteesiti yessakoni

⁶nunimay uddi abako meddhase maaqesaara nunini esuse yese ade maaqe bidzi Wontowarawoko nu keenge. Yeydiwo uddi abakoy esuna meddhuttosaara nunini esuna yese bidzi Laaxi Yesuusi Kristosaarako nu keenge.

⁷Fede Wontoy baanikiyara nu erdakoni uddi aadexeesiti ha esa eruttuwasso. Bidzi bidziti be aadesso aallo Wonto maaquwa wonto kuxe buro be losso gisha u muune achoy aadewo osa keenge Wonto maaquwasituse e kaashuttonike matiko u beene. Ye esuna u muxhurowa <<Muudofuna!>> yeydi e hine gisha <<Tuneydiko ne yese>> hidiko e hine.

⁸Kaxay Wontoy modhe aafena numba beyorosa mahuwasso. Miye nu dheeddakoni nuuse face basi baasso, nu muudakoni nuuse kose abakoni baasso.

⁹Kaashutta acho hoodde baaka hi muunesi aadexona miindo baasituse dhumo e maaqeeme hinumba kakkuwayte.

¹⁰<<Am ta hoodde?>> hidi hissine era keendi kaasha zawaa kaashuttese acho ne muusune e muxhurowa <<Muudofuna!>> yeydi e hine axi niya beedako ye ne hantay ye axi kaashashe kaashuttechashe e miyoronike esa naassusuwaye?

¹¹Ye e gisha <<Tani eraxuko>> hidi ne hidosuna Kristosay esuse haydhecho be aadexona miindo baa aadexichashi baattako e baane yeydi hiyoko.

¹²Ye esuna aadexe hinindo nayshita miidhenaara <<Muudofuna!>> yeydi hine u muxhuroy hooddoronike mahenaara Kristosako hi miidhe.

¹³Yoonase aadexicha nuundo nayshaafa bidzo kaxay dhumusesa maaqo'ayko esa ta dhumuseesume hissine koolo makkina acho muuwasso.