Read koorete 2Qorontoosaxituse 1 Bible Online

2Qorontoosaxituse 1 - koorete bible

2Qorontoosaxituse 1

¹Wonto maxoke Yesuusi Kristosase anxuttase maaddha Phawlosekofaara nu indo na'i Xhimootoosekofaara; Qorontoosiya yese Wonto zawa axitusaara yeydiwo kume Akkaya wudiya yese uddi haylaxita maaqeesitusaarako ha woosso nu anxe.

²Nuuse ade maaqe Wontowara Laaxi Yesuusi Kristosaaray axuse keenge modhe maxowara modhetiyaray hinuse maaquwaye.

³Nu Laaxi Yesuusi Kristosase Wontowara esadiyara maaqe esuse galatay maaquwaye. Maaroy esukofa bente adiyara uddi ogena <<Oseywayte>> hidi minxe Wontowaray esako.

⁴Wontoy nu maddhungeniya uddi <<Oseywayte!>> hidiko numba e minxe. Nuni assi ye ogenako Wontoy numba minsonike maddhungesa uddi <<Oseywayte!>> hidi minxese nu danda'e.

⁵Kristosase nu maaqe gisha maddhay nu gara laddonikeko Kristosa badena Wontoy numba <<Oseywayte!>> hidi lagussi numba e minxe.

⁶Maddhay nu gara yoosune hinuni minxowara loolowarako hi degexe. Wontoy numba <<Oseywayte!>> hidi minxusuneko hinuni yahafa minxo hi degexe. Ye minxoni nu gara yooda maddhay hi gara yooneniya dandadhi hi garoronike e mahe.

⁷Nu gara yooda maddhay hi gara yooneniyaka Wontoy numba <<Oseywayte!>> hidi be hidonike hinumbani <<Oseywayte!>> hidi e minsesenike nu ere gisha maddhana hi miingenike fetto eezuwanxhiko.

⁸Nuundo nayshito! Isiya wudiyaka nu gara ellecha maddha hi eroronikeko nu worge. <<Baadunxhiko!>> hidi nu hiyoro aallo iddese nu danda'uwa deexho maddhako nu gara elli yecha.

⁹Fetto nu hay'oronike nu gara e yaa'uttonikeko nuuse e bishicha. Ye esini uddi nu gara e ellosi <<Haydhase denxe Wontoko ha essaafa nuu kessesa>> hidi nu hiyoronike baaka <<Nu osako nuu kessesa>> hidi nu hiwanikeko.

¹⁰Esi haybose aandi elluse orje danowafa numba kessiko e yese, buro garani numba kessako e kesse. Assini numba e kessenike nu gobbesi esako.

¹¹Hinunini Wonto shi'ena numba hi marorosako e worguse. Laga axi shi'ena Wontokofa maro nu degexusune laga axituko nu gisha Wonto galatesa.

¹²Ha saha gara nu yesune fettoni hinunaara nu yesune Wontokofa nu degesso geejhetenaara aadaxe maaqenaarako durkutti nu yesso. Ye esini axi erana e maaddho baanne Wontoy axuse keenge maxo modhetenako. Ye ogena nu cee'uttesi nu muxhurowa <<Iitako ne hanto>> yeydi hinesi baasunako.

¹³Zeerusesaara gaxhesaara hi danda'uwasa feda abani hinuse diizuwanxhiko. Laaxi Yesuusay yoone wonte nuni hinunnana cee'uttenike hinunini nuunna hi cee'uttoronike hatte nu gisha shati eriya hi yesenike buro gara kumena hi gaxhorosa gobbako nu gobbe.

¹⁵Ha ta otosa <<Aadeko>> hidi ta hido gisha lam'i wogga suuse hi degexorosa hissine burowo hinumba beyese massiko ta yecha.

¹⁶Ye esini Maqadoone garisine hinumba ta beenesaara Maqadoonefa Yuuda wude ta hangusune tamba hi maroronike hinuko maaddhi yoowesaara massiko ta yecha.

¹⁷Hamese ta massoniya modhussi ta muxhurowafa masso badiya ta yecha? Ye ta massosa hade ha saha gara sekke hanke hine axuke hanzo <<Maaqoko e maaqe>> hidi guta <<Maaquwasso>> hidi hinesuwa hinumba ta bishe?

¹⁸Wontoy be zeerdosa arxuwannike nuni hinuse nu zeerdo zeere hatte <<Maaqoko e maaqe>> hidi guta <<Maaquwasso>> hidi arxuwanxhiko.

¹⁹Taani maaqqe Sillaasiyara Xhimootoosiyaray hinuse e gisha nu oto Wonto yele Yesuusi Kristosay <<Maaqoko e maaqe>> hidi be hidosa <<Maaquwasso>> hidi arxesa maaquwadiko e yecha. Esimay uddi wogga <<Maaqoko e maaqe>> hidi hinesako.

²⁰Wontoy gobbusso gobboy uddi <<Maaqoko e maaqe>> yeydi e hiyuttesi Kristosanako. Ha e gisha nunini Wonto kuxase <<Ameen>> hidi nu hinesi e badenako.

²¹Yoonase numbani hinumbani Kristosana miindi nu ee'orosa matasi Wontoko, nimbani tisshashini esako.

²²Esuse nu maaqenike addusesa nu gara gaddasi esako. Assi buro gara nu degexe abako nuuse e ingenike esuna nu eresa Ayaana Geeshe nu muxhurowa gaddasi esako.

²³Hanke maaddhi Qorontoose hinuko yoowe ta dheeddosi hinumba ta higilseesumeko. Ye esuse Wontoko ta atoy.

²⁴Hi aadexona miindi hi eedhese gisha hi maggorosa hinunaara wolla nu hantesa baaka hi aadesoosuna hi gara nu adetona go'uttuwanxhiko.