Read koorete 2Qorontoosaxituse 10 Bible Online

2Qorontoosaxituse 10 - koorete bible

2Qorontoosaxituse 10

¹Tani Phawlosey hi da'aa yesine <<Naassuwasako>> hi da'aafa are yesine <<Axi gara boheynesako>> hidi hiyuttasi Kristosay taase indo shenonaara ullaydi hiyenaarako hinumba ta shi'e.

²Hinumba ta shi'esini ta yooneniya naassi hinuse zeerese taa e worgusuwannike hi mahoronikeko. Axi maxoke nu hantenike mati maxe bidzi bidzi axiti buroma naassi zeeresuko ta danda'e.

³Fetto axe maaddhi ha sahaa nu yessakoni nu dargesi axi dargese lossesenike maaquwasso.

⁴Esuna nu dargutte toora miijhey toorase naquttese shuchi deeme woddusese danda'esa Wonto osa keengesa baaka ha saha gara yese axi esuna dargeesuke yesesa maaquwasso.

⁵Wonto era gara dendi <<Ta erako garesa>> hidi hissine bemba nashe maruwa e maxowara e bersaara uddiko nu bude. Axi be bidzi bidzina maxe maxo uddi didhiko Kristosase e woosuttorosa nu mahe.

⁶Hinuni bidzoni shahe baaka hi woosuttesa nu beedo geede bidzi abakonani woosuttuwasi ooneni yessako murese naquttiko nu yese.

⁷Zeere gara hi yaa'esi wudena yesesawo beediko. Ooneni <<Tani Kristosasuko>> hidi hidako nunini esukewo Kristosase nu maaqesa eruwaye.

⁸Laaxi nuuse indo adetona nashuttusoosumeni gardi ta nashuttako ye esuna borsuwasso. Adeto nu ettosi hinumba dicheshe baaka hinumba budese maaquwasso.

⁹Diizzi ta anso woossituna hinumba jhashusheshe e maaqenike hinumba bishofe.

¹⁰Bidzi bidziti <<E diizzo woossiti deexhesaara miimowarako, esimay nu giddaa deemona bentisine beese gafaxuko e bishe, be zeereniyaka eraxiti zeerenike zeeruwasso>> yeydiko u hine.

¹¹Yeydi hine axiti zara yesine diizzi nu anso woossituseni usaara yesine nu hante hantaseni e gidda shahoy baassa eruttuwaye.

¹²Beenna biya galate bidzi bidzi axitaara numba wol da'aa gaddi beyese worguwanxhiko. Usimay <<Ha esi modheko, ha esi iitako>> yeydi hiyese fede axe beenke yesesako u beene. Beenke yese axaara wol badiya gaddiko biya arsi u beene. Yeysi be matosuna gaxe be keenguwasako biya u beyse.

¹³Hinumba handi nu ello aallo Wontoy <<Ha e aallo hantuwayte>> hidiko nuuse hanta e indo. Ye esunako nu cee'uttesa baaka ye esume gardi maaquwasso.

¹⁴Ha hi yese godoy essaa nu hante aallo e maaqe gisha Kristosase ohe modhe odo ohese hinuko nu handoniya <<Ha e aallo hantuwayte!>> hidi hiyutta godofa gardo baanxhiko.

¹⁵Wontoy nuuse indo godofa gardi fedeesiti hantana nashuttuwanxhiko. Ye esukofa hi aadexoy dicishine e hangusune nu hante hantani Wontoy otese makki aallo hi giddaa gardese ogena e dicorosako gobbiya nu yese.

¹⁶Yoonase fede axi hantoronike maaddhese godowa gelli buro hantuttecha hantana nashutte baaka hinume are yese wuditi giddaa modhe odo ohese danda'ako nu danda'e.

¹⁷<<Cee'uttese worgesi Wontona cee'uttuwaye>> yeydiko e diizuttese.

¹⁸Axi galatuttese handi e ellesi Wonto galatisine baaka beenna biya galatisine maaquwasso.