Read koorete 2Qorontoosaxituse 11 Bible Online

2Qorontoosaxituse 11 - koorete bible

2Qorontoosaxituse 11

¹Hade muyake oddhe ta zeeresa ta muyoonte danda'uwayte. Aadewoni taa dandadhiko hi yese.

²Wontoy hinuse karduttenike tanini hinuse karduttoko kardutte. Hinuse ta karduttesini hade biya kattese woduroy bidzi na'use aykuttenike Kristosase hinumba ta aytese gisha e garafa hi atteesumeko.

³Shooshi be fayanketena Hewaane qaarussonike haliya hi maxoy iitti Kristosase hi keenge gizo eehaara geejhetiyaara hi dhaggeni hidiko ta hoodde.

⁴Bidzi axi hinuko yoodi hinuse nu otechosha maaquwasa Yesuusa gisha feda e otako oo'oyne hi ettecho Ayaana maaquwasa fede ayaana hi eforonike e matako oo'oyne hi siidecho modhe odo e maaddho baane fede modhe odo e otako mikkidiko etti hi dhagge.

⁵<<Ha anxuttaasiti mallako>> yeydi hiineesitume yekke tani eeruwasso hidiko ta maxe.

⁶Modhe zeeraxe maaqe dheeddakoni fetto era dheegguwasso. Ye esani laga woggako laga ogena hinuse e gelenike nu otese.

⁷Abani hi garafa etto badesine Wonto modhe odo hinuse ta otosuna hinumba keddaysi tamba ta ullaysoosuna cubboko ta hanto yeydi hiyowa?

⁸Hinumba marese hissine seya haya yese Wonto zawaxiti garafa taase miijhe etti uso bon'iko ta yese.

⁹Hinunaara yesine miijhe taa e worgusoniya Maqadooniyafa yooda nuundo na'axhiti miijhena taa u mardo gisha ooneni maddhunso baasso. Hatte aalloni hinumba maddhunso baasso, buro garani hinumba maddhunxuwasso.

¹⁰<<Buro garani hinumba maddhunxuwasso>> hidi ta cee'uttuwannike tamba tuceshe danda'esi ooneni Akkaya wudiya baasso. Kristosay aade ta zeeroronike tamba e matosunako aade ta zeere.

¹¹<<Hinumba maddhunxuwasso>> yeydi taynesi abasuna? Hinumba ta eehuwa gisha? Hinumba ta eehesa Wontoko eresa.

¹²<<Nuni anxutta Phawlosekeko nu hante>> yeydi cee'utte fediti esuna u cee'uttesa uso dheebusese hatte hinumba ta maddhunxuwannike buro garani maddhunxuwasso.

¹³Ye usuke yese axiti Kristosay ansechooshita biya bishusshi <<Anxuttaasitako nuni>> hidi zaadaxe maaqeesitaara qaarussi hante hantaxitaarako.

¹⁴Ha esi micushe zeere maaquwasso. Fetto Humbaye fo'e woosaxe bemba mati uqusese danda'ako e danda'e.

¹⁵Ha e gisha Humbayese hanteesiti gizetese hanteesita biya u bishusshako micushuwassho. Aalliciraaka be hantakeko u degexe.

¹⁶<<Ooneni hade muyake taa beedoffe>> hidi hissineko sekke mati hinuse ta ohe. Hade muyake taa beeta'ayko oddhe cee'uttese ta danda'oronike muyake mati tamba ekkuwayte.

¹⁷Cee'utte gisha ta zeerusune hade muyake baaka Laaxi maxoke maaquwasso.

¹⁸Laga axiti ha saha zeerena u cee'utte gisha tanini cee'uttoko ta cee'utte.

¹⁹Hinuni hinuse gaxaxita maaddhiyanema Wonto buro muyita maaqeesita dandadhi hi ekkesi?

²⁰Ooneni hade maalake hinumba matako, ooneni hinumba <<Taa muussuwa, taa usshuwa!>> hidi e maddhunsako, ooneni biya go'esa hi garafa e ettako, ooneni hinumba haasako, ooneni hinumba e eersako ususe siitako hi siine.

²¹Nunimay fetto ye esa hantese eehuwasita nu maaqichosha borsisiniya ta ohe? Ooneni naassi cee'uttese wordako tanini naassiko esuke ta cee'utte. Yeydini ta hinesi hatte muya bisshiko.

²²Usi Ibraxituwa? Tanini Ibraxuko. Usi Isra'eelaxituwa? Tanini Isra'eelaxuko. Usi Abrahaame fira fiixha? Tanini Abrahaame fira fiixhako.

²³Usi Kristosase hantaxituwa? Tanini usume gare Kristosa hantaxuko. Ha esani hade goojheshe axuke maaddhiko ta zeere. Tani usume gardiko hanti ta gatto, usume gardiko laga woggaaka ta tufutto, usume gardiko laga woggaaka ta durutto, usume gardiko laga woggaaka haybo nuunaafa ta atto.

²⁴Ayhudaxiti jhiraafena ichichi woggaa haydzi tamma odduppe haydzi tamma odduppeysi taa u oxxho.

²⁵Haydzi woggaani kallona ta oxhutto, bidzi wogga shuchuna ta icutto. Essaa ta hangicho markabiti haydzi wogga medho, bidzi wogga markabey medhine qama wonta bagade gara ta yecha.

²⁶Laga wogga oge hamena, waaxi kixuna, fuulona, katama giddaannani maaqqe saha melaakani bagade garani maddhundiko ta yecha. Ta bade maaqe Ayhudaxitani maaqqe Ayhuda maaquwasiti taa maddhunsiko u yecha. Yeydiwo <<Aadexeesitako nuni>> hidi hine zaadaxitini taa maddhunsiko u yecha.

²⁷Lagako ta kardutto, lagako ta gatto, laga woggako gehunxe ta dheeddo, ta naaydo, ta sazzo. Laga wogga kaxani ta dheeddo, toyyanani maa'o dheebenani ta maddhundo.

²⁸Ha esume feda taa ella maddha yaha dhaddi wontana wontana taa deexhesi uddi seya haya yese Wonto zawa axiti gisha maxeko.

²⁹Bidzi axi gafaxe maaqusune tanini esaara gafaxuko maaqe. Bidzi axi cubbona ungusune taa huulusako e huuluse.

³⁰Cee'utte worgo'ayko ta cee'uttesi ta gafete beyse zeeritunako.

³¹Koolo makki aallo galatuttese nu Laaxi Yesuusi Kristosaade maaqe Wontoy ta zaaduwannike erako e ere.

³²Damasiqo katamaa ta yechoniya kaati Aretaase oomona ye katama ahichashi taa aykese wordiko katama suma aallo e kafusicha.

³³Axiti shuchi qeyshi maskootiyaanna taa kofaa gaddi u hossine e kuchiyafa ta tulxho.