Read koorete 2Qorontoosaxituse 13 Bible Online

2Qorontoosaxituse 13 - koorete bible

2Qorontoosaxituse 13

¹Yoonase hinuko ta hangusune ha esi hayssoko. Yebo <<Uddi luufoy aade maaqenike e eruttesi lam'una oo'oyne haydzi atonako>> yeydiko e diizuttese.

²Lakko wogga hinumba beyese ta handoniya minsi ta otechonike hatteni assi zara yesine ha esume buro cubbo hantaasitusaara fedeesitusaara ta otechonike <<Sekke hinuko ta hamoroniya ooneseni higiluwasso>> hidiko ta ohe.

³Ta higiluwasini ta badena zeeresi Kristosa e maaqenike erese ato hi worge gishako. Esi hinuka hantisine osaxuko baaka gafaxe maaquwasso.

⁴Suxhutti e haydhosi gafaxe bisshi e maaddhakoni hattema Wonto osana en'a maaddhiko e yese. Nunini esaara wolko gafaxitako nu maaddhese. Gafaxe maaddhakoni esaara en'a maaddhi yesine Wontoy indo osanako hinuse nu hante.

⁵Aadexo ogiya hi yesesa erese hinumba hossi kessi arsi beewayte. Yeysi arsi hi beesune e ogiya dheeddasitawo baaka Yesuusi Kristosay hinuka yesesa ereko hinumba e worguse.

⁶Nunini numba hossi kessi beedi Wonto ogiya nu yesenike erdiko nu yese. Ye esa hi erenike gobbako ta gobbe.

⁷Hatteni abani iita hi hantuwannikeko Wonto nu shi'e. Wonto nu shi'esini <<Wonto ogiyakako nu yese>> hidi numba nasheshe maaquwasso. <<Wonto ogiyafa undiko u yese>> hidi hiyuttakoni modhe hanta hi hantoronikeko nu shi'e.

⁸Ye esini aademe hissine nu hantesa baaka aadey inxha'esa aban hantuwanxhiko.

⁹Nuni gafaxe maaqusune hinuni osaxe maaddhako maggako nu magge. Assi Wonto nu shi'esini facete keenguwasa hi maaqorosako.

¹⁰Zara yesine ha esa hinuse ta diizosi hinuko ta hangeniya ta keenge adeto osana ta go'utteesumeko. Laaxi taase adeto e indosi hinumba ta dichorosa baaka hinumba ta budorosa maaquwasso.

¹¹Yoonase nuundo nayshito, modhena yesuwayte, facete keenguwasa maaqese karduttuwayte, ta otosani siwwayte, bidzi maxona yesuwayte, wolla modhetena yesuwayte. Hikketeko eehaara modhetiyara inge Wontoy hinunaara wolko e yese.

¹²Indo nayshukeysi wola muuxxhi wola sawusuwayte.

¹³Haylaxita maaqeesiti uddi <<Modhiya sawa hi yese?>> hidiko u sawuse.

¹⁴Laaxi Yesuusi Kristosay axuse keenge maxo modhetey, Wonto eehay, Ayaana Geeshi inge bidzetoy hi uddiyara yesuwaye.