Read koorete 2Qorontoosaxituse 2 Bible Online

2Qorontoosaxituse 2 - koorete bible

2Qorontoosaxituse 2

¹Yoonase hinuko yoodi hinumba ta gaylusune hi higileesume hissineko hanke hinuko yoowe ta inxhadho.

²Hinumba ta higilsako taa minxese hi danda'uwa gisha taa minxese danda'esa ooni feda ta keenge?

³Garda wogga yeysi hinuse ta diizosi hinuko ta hamete taa maggusese danda'icha axiti taa u higilseeme hissineko. Ye esini ta maggay hi uddise magga maaqenike eezuwasso.

⁴Yenniyani ta muxhurowa higilsiniyara orjena maddhungisiniyara iitana yeekisiniyarako ta diizo. Ta diizosini fetto orjena hinumba ta eehesa hi erorosako baaka hi higilorosa maaquwasso.

⁵Axe higilsa bidzi axi yessako ta goshewoni e maaddho baanne ha e aallo maaqe e dheeddakoni hinumbani uddi higilsiko e yese. Yeydi ta hisune zeere kedda kedda hisse maaquwasso.

⁶Hinukaafa lagay yeenke yese axuse <<Yeydi maaquwaye>> hidi esuse mura hi indosi ellako e elle.

⁷Ye e gisha ye adey fettona higilli haliya gobbo e burseeme esuse <<Attuwaye>> hidi hi hiyorosaara hi minxorosaarako e worguse.

⁸Esa hi eehesa e eroronike aadena hi eehesa hantana esa beysuwayte hidiko odde hissine hinumba ta shi'e.

⁹Garda woggaa ye woosso hinuse ta diizosi naa'utti beyutti uddi abakona woosuttesa hi maaqesa erese wordiko.

¹⁰Hinuni esuse <<Attuwaye>> hidi hido axuse tanini <<Attuwaye>> hidiko ta hine. Aadewo <<Attuwaye>> hiyutte zeerey yesa'ayko Kristosa buro <<Attuwaye>> hidi ta hinesi hinume hissineko.

¹¹Humbaye maxo nu ere gisha <<Attuwaye>> hidi nu hinesi esi nuu iicheshe essaanna be gele wula e degexeesume hissineko.

¹²Kristosa modhe odo Xhiro'ada katamaa ohese ta handoniya laga hanta ta hantoronike Laaxi suma taase dodhiko e yecha.

¹³Do'uwaye baaka nuundo na'i Tito yaha degexe dheeddiko muxhuroy taase utte e dheeddo. Ye e gisha aadexichaashita <<Modhena yesuwayte>> hidi hissineko Maqadooniya dhaddi ta hando.

¹⁴Numba uddi wogga Kristosa badena iichesha mati be durke gishani maaqqe moddhi sawwe dhehay uddi godowa ellenike uddi godowa axi Kristosa eroronike nuunna be go'utte gisha Wontoy galatuttuwaye.

¹⁵Ye esini nuni looleesiti giddaakani maaqqe baaneesiti giddaakani Kristosay Wontose uquse hade modhe sawwe dheha keengesuke yesesako.

¹⁶Baaneesituse wodhe zeekuko nuni, looleesitusema yeso inge modhe sawwe dhehako nuni. Hinne yeenke yesesuse ellesesi oonena?

¹⁷Nuni hade abako zal'ese gadhesa gawwaanna sekke hanke woxhe laga axituke maaddhi Wonto kato oheesita maaquwanxhiko. Wontoy anso axuke maaddhi Kristosase hantisine aadaxe maaddhiko hade Wonto buro ee'e axuke Wonto kato nu ohe.