Read koorete 2Qorontoosaxituse 5 Bible Online

2Qorontoosaxituse 5 - koorete bible

2Qorontoosaxituse 5

¹Hade asha zawake woggasewo maaddhese nu achoy haydhakoni axi kuchey keexxho baassa Wontokofa maaqe koolo makkina essaa yesuso zawa afaa nu keengenike erako nu ere.

²Afaafa ingutte gara maa'ese orjena wordiko <<Wushu!>> hidi maddhumiya nu yese.

³Aadewo ye gara maa'oke nu maadho geede gara keenguwasa attuwanxhiko.

⁴Hade ashake yese nu achowaka nu yesune orjena nu gara e deexhineko <<Wushu!>> hidi nu maddhunge. Ye esini hay'e achoy yesowa artorosa afaa yesesa maa'ese baaka hay'e nu achoy nu garafa ooxuttorosa maaquwasso.

⁵Ye e bisha arteseni numba naddhasi Wontoko. Buro gara nuuse mahese e hinesa esuna nu eresa Ayaana Geeshe nuuse inday esako.

⁶Ha e gishako uddi woggaa eezo keenguwasa gobbo burse baaka nu yese. Ha nu garay nuuso maaqe aallo Laaxuna nu degexe zawafa zardi nu yesenike erako nu ere.

⁷Nu yesesini aadexona baaka beyena maaquwasso.

⁸Essaa nu yese nu gara dhaddi handi Laaxuso yesese orjena wordiko eezo keenguwasa gobbo burse baaka nu yese.

⁹Ha e gisha ha saha gara yessakoni oo'oyne haydhakoni Laaxe maggusesuko nu kardutte.

¹⁰Ye esini nuni nu bidzi bidzina achona yesine nu hanto iiteteseni maaqqe modhetese nu hanto hanta wooma nu uddina efese yaa'ese uttese Kristosa buro uqeko nuu e worguse.

¹¹Wonto jhashey aba maaqesa nu ere gisha axiti nu ohesa eforonikeko mahese karduttiya nu yese. Wontoy nu oonunte kumenako e ere. Yeydiwo hinunini hi muxhurowanna numba hi erenike gobbako ta gobbe.

¹²Modhe hantaxe nu maaqenike sekke hinuse ohe e maaddho baanne nuunna cee'uttese hi danda'oronikeko hinumba nu mahe. Yenniya muxhurowa yese abakona e maaddho baanne wudena bente abakona cee'utteesituse sekke e baliya mahesuko hi danda'e.

¹³Goojhesha maaqo'aykoni Wontome hissineko. Goojho baasita maaqo'aykoni hinume hissineko.

¹⁴Bidziyaka Kristosay uddiyadese e haydhosaara uddiyadeni e haybo shahaxe maaddhosaaray <<Aadeko>> hidi nu hidese gisha Kristosay nuuse keenge eehako numba densi durkesa.

¹⁵En'a yeseesiti usume hissine haydhi haybowafa dendasuse u yesoronike baaka beeme hissine ha makkina sekke u yesuwannike Kristosay uddiyademe hissine e haydho.

¹⁶Ha e gisha sekke hade axi maxenike ooneseni yeysi maxuwanxhiko. Kristosa ha e buro axi maxoke beenesa nu maaddhakoni ha makkina sekke axi maxoke beewanxhiko.

¹⁷Ha e gisha ooneni Kristosaara bidzo maaddhako kille meddhuttiko e yese. Cima abakoy baadinne killey meddhuttiko e yese.

¹⁸Ha esini uddi e maaddhosi Wontonako. Esini Kristosa badena numba beera wolko naddhi esaara wolko axe nu naqoronikeko e mato.

¹⁹Ye esini Wontoy Kristosa badena beera wolko ha saha gara yese axita naqisine u miidha taaddo baasso. Numbani <<Axito! Wontowara wolko naquttuwayte!>> hidi nu hiyoronikeko e mato.

²⁰Ye e gisha nuni axituko Kristosay be gisha anxe woosaxitako. Wontoy nu badena axe beeko e xheyge gisha nunini <<Wontowara wolko naquttuwayte!>> hidiko Kristosa gisha nu shi'e.

²¹Nuni Kristosaara wolla bidzo maaddhi Wontona gizo nu maaqoronike Wontoy cubbo keenguwa Kristosa nu cubbo e iddoronikeko e mato.