Read koorete 2Qorontoosaxituse 6 Bible Online

2Qorontoosaxituse 6 - koorete bible

2Qorontoosaxituse 6

¹Wonto hanta wolla hantesa maaqisine <<Wontoy hinuse be keenge maxo modhetena esa hi aadexoronike matechoshi aafe e kaxhuwannike matofita!>> hidiko hinumba nu shi'e.

²Wontoy <<Ta eeto wogga ne shidhosa ta siido, ne loole wontay yoodine nemba ta mardo>> yeydiko e hine. Yoona, Wontoy eetese woggani hatteko, hay, ne loole wontani hatteko!

³Wontose nu hante hantay haassutteesume ooneseni dhumo maaqe worguwanxhiko.

⁴Ye esukofa Wontose modhe hantaxe nu maaqenikeko uddi badena nu adduse. Ye esini waayye, maddha, jheete orjenako nu danda'e.

⁵Nu durutte, nu tufutte, koysi nu gara dende, hantana nu gakke, gehunxe nu dheegge, nu naaye.

⁶Yeydiwo geejhetena nu yese, aade nu ere, nu danda'e, modhete nu beyse, Ayaana Geeshushe nu woosutte, awsha keenguwa eeha nu beyse,

⁷aade gisha ohe kato nu ohe, Wontoy nuuka be osana e hante, esuna be dargesani maaqqe esuna be garafa be tucesha aykusonike gizete aytiko nu yese.

⁸Kuxuttisineni oo'oyne ulla hissineni, haassuttisineni oo'oyne galatuttisineni yessiko nu yese. <<Zaadaxitako>> hidi nu hiyutte, nunimay aadaxitako.

⁹<<Eruttuwasitako>> hidi nu hiyutte, nunimay erutteesitako. <<Haydhiko u yese>> hidi nu hiyutte, nunimay en'a yeseesitako. Duruttesesa nu maaddhakoni haydho baanxhiko.

¹⁰Higillakoni uddi woggako nu magge, nuuse jhi'o maaddhakoni lagitako Kristosa badena woduma nu mahe. Abani keenguwasa nu maaqusune nuuse face basi baasso.

¹¹Hinuno Qorontoosaxito! Hinuse hay addussi zeerdiko nu yese, nu muxhuroni hinuse dodhi beysiko nu yese.

¹²Hinumbako nuuse hi keengicho eeha shawukusosa baaka nuni hinuse nu keengicho eeha shawukusso baanxhiko.

¹³Adey be nayshe zeerusenikeko hinumba ta zeeruse. <<Nuni hinuse matonike hinunini nuuse hi muxhuro dodhi beysuwayte!>> yeydiko hinuse ta hine.

¹⁴Woota woote maydaxhey woli gara tufuttenike aadexuwa axitaara bishuwa ogena wolko bidzo maaddhofita. Gizetiyara cubbowaray waydini wolko bidzo e maaqe? Fo'iyara cenchaaray wolko waydi yesese u danda'e?

¹⁵Kristosa maxowara Humbaye maxowaray abanani wola e ekke? Aadexesaara aadexuwasaaray abanani wolla bidzo u maaqe?

¹⁶Wonto Hayla Zawaara wonto maaquwasa Wonto mati kuxuttesaaray aba muhoni e keenge? Nunimay en'a maaqe Wonto Hayla Zawako. Yeydini Wontoy beennako e zeerdo. Esini zeerisine << <U giddaakako yeso ta mahe, ussaakako sekke hanke ta hante. Tani u Wontoko ta maaqe, usini ta axitako u maaqe.

¹⁷Ye e gisha u giddaafa shahutti kesuwayte> yeydiko ta hine tani Wontoy. <Tuna maaqe abako dollofita, dole hi dheeba'ayko hinumba taako efako ta ekke.

¹⁸Hinadeko ta maaqe, hinunini taase ta na'axhitaara ta bunaycitaarako hi maaqe> yeydiko ta hine tani uddi base danda'e Wontoy>> hidiko e hido.