Read koorete 2Qorontoosaxituse 7 Bible Online

2Qorontoosaxituse 7 - koorete bible

2Qorontoosaxituse 7

¹Yoonase ta eehe ta badito! Haanxhi uddi numba gobbusso gisha bente nu achowara bentuwa nu oonuntiyara tunuse uddi abako garafa numba nu geesshooshe. Wonto jhasshishine nu haylonte bidzoni facete keenguwasa nu mahheese.

²Hi muxhuro nuuse do'uwayte. Ooneni miidho baanxhiko, ooneni bayso baanxhiko, oone garafani qaarussi etti eruwanxhiko.

³Ha esa taynesi <<Modhe hanto baytako>> hidi hinumba hiyese maaquwasso. Ha e buro hinuse ta otonike nu muxhurowakako hi yese, ye e gisha yessakoni haydhakoni hinunaarako nu yese.

⁴Hi gara eezo keenguwasso, hinunnanako orjena ta cee'utte. Yeydiwo orjenako ta miindese, ta oseydese, maddhaakani yesineni orjenako ta magge.

⁵Maqadoone nu handoniya laga ogena maddhay nu gara e ellosa baaka abani kaxe etto baanxhiko. Bidzi badena iilaxaara karde fede badena muxhurowanna jhasheko nu keengicha.

⁶Hidakoni higile axita minxe Wontoy Tito yoowenako numba e minso.

⁷Nu miindosini e yoowenawo e maaddho baane, hinunaara muti e miindosunaarako. Hinuni taa hi sazzesaara taase hi higillosaara hi maddhungesaara nuuko e otineko burome garsi ta maddo.

⁸Ha esume buro ta diizzosuna hinumba higilsakoni taase ye esuna higiluwasso. Oddhe woggasewo hinumba ta higilsosa ye woosso ta diizzosuna aadewo higilliko ta yecha.

⁹Hattema maddiko ta yese, ta maddosini higilli hi cubbo dhaddi Wonto gara hi maaddho gisha baaka hinumba ta higilsosuna maaquwasso. Yoonase hi higilsay hade Wonto maxoke maaqicho gisha nuni abanani hinumba miidho baanxhiko.

¹⁰Wonto maxoke yese higilsay axi loolo degexoronike be cubbo dhaddi maaqoronikeko e mahe. Yeydi e maaddho geede axi <<Ame Wontoko ta maaddho?>> yeydi hiwasso. Axi Wontoko maaqorosa mahuwa higilsay hayboko e oone.

¹¹Wonto maxoke yese higilsay an bisha aafe hinumba e kassonike beewayte. Ye esini hi oseynesa hi beysoronike, ye cubbowa hi gello baannike hi addusoronike, iita zeere gara hi huuloronikeko e mato. Waydese jhashe, waydese saza, waydese modhe zeere gisha ee'e, waydese cubbaxe murew hinumba e kasso. Ha zeerese uddi badena geeshe hi maaqesa hinumba beysiko hi yese.

¹²Yoonase tani diizosi nu gisha hi eedhesesa Wonto buro hi eroronike baaka miidha axusaara miidhutta axusaara maaquwasso.

¹³Ye esunako nu oseydo. Nu oseydosumeni gardi Titoy maddosuna nunini orjenako nu maddo. Ye esini hi uddina esa hi doojhushoshunako.

¹⁴Tito buroko hinumba ta nasshecha. Hinunini taa borsusobaytako. Uddi wogga aadewo hinuse nu otonike Titoko hinumba ta nasshoshi aade maaddhi bentiko e yese.

¹⁵Hi uddina esuse hi woosuttonikiyara jhasshishine kobursine esa hi mottosaara Titoy be maxeniya e keenge eehay miindi bentiko e yese.

¹⁶Tanini aba bisha zeere e maaddhakoni hi gisha eezo ta keenguwa gisha maddiko ta yese.