Read koorete 2Qorontoosaxituse 8 Bible Online

2Qorontoosaxituse 8 - koorete bible

2Qorontoosaxituse 8

¹Nuundo nayshito! Wontoy be maxo modhetiyafa dendasuna Maqadooniya seya haya yese be zawa axituse aba e hantosa hi erorosako nu worge.

²Uso ella maddhay orje maaddhakoni keddaysiko u maggicha. Jhi'ita maaddhakoni ye maggaafa dendasuna jherdi lagako u indo.

³Be danda'esi gennowo e maaddho baane be danda'ome afana garsi be eehana u indonike ye esuse tani atoko.

⁴Yuuda wudiya yese aadexeesita marese be massechoshi atteesumeko minsi numba u shidho.

⁵U hantosi nu massechoshume garesako. Burussi bemba Laaxuse u indo, sekkeni Wonto maxoke bemba nuuse u indo.

⁶Ha hanta buro hantusichashi Tito maaqicho gisha hatte jherdi hi inge ingo bhikkilli e alsoronikeko esa nu shidho.

⁷Hinuni aadexenani maaqqe zeerenani, eranani maaqqe uddi ogena oseyenani numba hi eehe eehanani uddi basuna keddaydiko hi bentese. Ye esuke jherdi ingena oseydi hi bentorosako odde hidi hinumba ta hine.

⁸Ha esa yeydi taynesi hinumba woose maaquwasso. Woosekofa fedeesiti ingese worgenikewo hinuni an aallo ingese hi worgesa wol da'aa gaddi beedi ingese hi worge eehay aade e maaqenike eresuko.

⁹Nu Laaxi Yesuusi Kristosay axuse be keenge maxo modhetiyafa densi aba e hantosa erako hi ere. Woduma maaqichine hinume hissine e jhidho, e jhi'etey hinuni Wonto buro woduma maaqorosa e mato.

¹⁰Ha zeere gara hinuse go'esa ta ohesi hante hi aytesesa hanti hi alsoronikeko. Zimbere ingesewo e maaddho baane burona massaasiti hinumbawoko e maaqicha. Yenniya oseydi hi zeerdechonike hatte hi keengesi makko oseydi hanti alsuwayte.

¹²Ingese maxo modhe ni keema'ayko Wontoy <<Modheko ne hanto>> yeydi e hinesi nu keengesi makko nu ingusuneko baaka nu keenguwasa ingese nu karduttusune maaquwasso.

¹³Yeydi ta ohesi hinuni maddhungete <<Fedeesituse bissheere>> hidi hiyo e maaddho baanne hi uddina wol genno hi maaqorosako.

¹⁴Hinuni maddhungeniya laga u keengesi hi maddhase hinumba maroronike hatte laga hi keengesi u maddha marese maaquwaye. Ye esunako hi keenge abako woluse wol genno hi shahe.

¹⁵Ha esini <<Laga bhikkilasuse gardi atto baasso, oddhe bhikkilasuse eerdi facco baasso>> yeydiko e diizuttese.

¹⁶Tani hinuse maxenike Titoy hinuse maxoronike mata Wontoy galatuttuwaye.

¹⁷Titoy handosi nu shidhosa eetiwo e maaddho baane, beese hamese orjena be wordecho gisha be maxonaarako.

¹⁸Modhe odo ohena seya haya yese Wonto zawaxiti uddi <<Esi modheko>> hidi hine indo na'uko esaara nu ansese.

¹⁹Ye eruttewoni e maaddho baanne ingo etti nu hangusune nuura e hamoronike seya haya yese Wonto zawaxiti esa xhardiko u yese. Ye ingoni etti nu hangesi Laaxi kuxuttorosaara fedita nu marenike nu maxo modhete beysesaarako.

²⁰Bhikkilutta miijhe nu aykusune bidzi haasseni nu gara benteemeko nuu nu kakke.

²¹Nu maxoy Laaxi burowo e maaddho baane axi buroni haasse keenguwasa hantesuko.

²²Assi laga wogga laga bisha hanta e hantoronike u matine oseydi hantese naqutti bentese nu indo na'e usaara wolkoko hay nu anxe. Modhe hi hantenike e eezuwa gisha hatteni oseydi hantese e keenge maxoy burome gardesesako.

²³Tito gisha oyceshi yesa'ayko esi taara wolla hantiya yese hantaxuko. Ha nu indo na'axhiti gisha oyceshi yesa'ayko usi seya haya yese Wonto zawaxiti ansositaara be hantana Kristosa kuxeesitaarako.

²⁴Yoonase aade eeha hi keengenikiyara nuni hinumba nashe nashoy aade e maaqenikiyara seya haya yese Wonto zawaxiti eroronike ususe addusuwayte.