Read koorete Galatiya 1 Bible Online

Galatiya 1 - koorete bible

Galatiya 1

¹Axukofa oo'oyne axuna e maaddho baanne Yesuusi Kristosanaara haybowafa esa densa ade maaqe Wontonaara anxuttase maaddhi maagetta Phawlosekofa.

²Taara uddi taara yese indo nayshaaray Galatiya wudiya be godowa godowa yese Wonto zawa axituko ha woosso nu anxe.

³Nuuse ade maaqe Wontowara Laaxi Yesuusi Kristosaaray axuse keenge modhe maxowara modhetiyaray hinuse maaquwaye.

⁴Nuuse ade maaqe Wonto maxoke ha iita sahaafa numba kessese Kristosay nu cubbo gishako biya garsi e indo.

⁵Koolo aallo Wontose kuxay maaquwaye. Ameen.

⁶Kristosa badena axuse be keenge maxo modhetiyafa densi hinumba xheydecha Wonto dhaddi fede modhe odo hidi hiinessaa alleydi artiya hi yesesi micushako taa e micushe.

⁷Hi buro bayseesitaara Kristosa gisha ohe modhe odo arxese worgeesitaaray bidzi bidzi axiti u yesesa baaka aadewo fede modhe odoy baasso.

⁸Nuuni e maaddhako oo'oyne afaafa yooda Wonto woosaxeni fetto e maaddhako nuni hinuse otecho modhe odome fede modhe odo hidi hiyuttesa hinuse e oho'ayko ye esi aacuttesesa maaquwaye.

⁹Ha esume buro nu otechonike hatteni kossiko ta ohe. Hinuni siidi hi ettecho ha modhe odome fede modhe odo hidi hiyuttesa ooneni hinuse oho'ayko aacuttesesa maaquwaye.

¹⁰Hine tani worgesi axi tamba nashorosuwani Wontoy tamba nashorosani? Tani worgesi axe maggusesuwa? Axe maggusese wordessakoma Kristosa maala maaquwadiko ta yecha.

¹¹Nuundo nayshito! Hinuse ta oto modhe odoy axukofa bentase e maaquwannikeko hi erorosa ta worge.

¹²Ye esani taase addusay Yesuusi Kristosako baaka axukofa etto baasso, axini tamba erusso baasso.

¹³Buro bidzi muxhurona Ayhuda wogana ta yechonike siidiko hi yecha. Wonto zawa axita higilsa keenguwasa uso waayye beysi baysese ta worgicha.

¹⁴Ta yecho beraa ta makko maaqicha laga Ayhudaxitukafa woga kafena uso uddi garoko ta garicha. Nuwadiyaxhiti woga gishani usume gardi eedhesesako ta maaqicha.

¹⁵Wontoy ta yelutto baanneko burowo taa e xhardo. Ayhuda maaquwasituse e yele gisha modhe odo ta ohorosa be yele taase addusese be wordo wogga be keenge maxo modhetena taa e xheydo. <<Hatte am ta hanto?>> hidi esaara wolko maxo ta arsosi baasso.

¹⁷Yeydiwo taame buro anxuttaasita maaqichashitaarani wolla muhese Yerusaleeme hando baasso. Usuko hamekofa Arabe wudeko ta hando, yahafani maaddhi Damasiqo hanke ta yoodo.

¹⁸Haydzi bera geede Phexhrose beyese Yerusaleeme handi e da'aa tamma ichichi wonta aallo ta decco.

¹⁹Esaara Laaxi Yesuusayndo na'e maaqe Yayqoobiyara ta beedosa baaka anxuttaasittaafa feda ooneni beedo baasso.

²⁰Wontoy erenike ha esa hinuse diizisine ta ohesi aadeko zaadduwasso.

²¹Ye e geedeni Sooriya wudiyakaara Kilqiya wudiyakaarako ta hando.

²²Kristosa aadessi Yuuda wudiya be godowa godowa yese Wonto zawa axiti taara muti deemona taa eruwadiko u yecha.

²³<<Buro numba waayye beysicha axi baysese be hicho aadexo gisha hatte erusiyako e yese>> yeydi hine odowoko u siidecha.

²⁴Ta gishani Wonto u galaticha.