Read koorete Galatiya 3 Bible Online

Galatiya 3 - koorete bible

Galatiya 3

¹Hinuno gaxe keenguwa Galatiya axito! Ooni hinumba qayda? Yesuusi Kristosay suxhuttosi hade hi burowa e suxhuttonikewo tiddhiya hinuse addusutto badiya e yecha?

²Hinukofa bidzi basuwoko erese ta worge. Ayaana Geeshe hi ettosi woga kafenani hinuse ohutta modhe odo siidi aadexenaara?

³Hinuni Ayaana Geeshuna hante hi aytechosha achona hanti itusesuwa hi worge? Yebo, ha makki aallo hinuni gaxe keenguwasituwa!

⁴Modhe odo gisha hi gara yooda maddhay mikkewa e yoodo? Yeysi hi matesso aadewo hi gara mikkewoko e yoodo!

⁵Wontoy hinuse be Ayaana e indosaara hi giddaa micushe hanta e hantosaaray woga hi kattosunani oo'oyne modhe odo siidi hi aadexesunaara?

⁶Haaya mee, Abrahaame beewayte. <<Abrahaamey Wonto e aadesso. Be aadexona gizo maaddhi e taabutto>> yeydiko e diizuttese.

⁷Yoonase aadexeesiti Abrahaame nayshe maaqesa eruwayte!

⁸Hayla Fissharowaaka Wontoy Ayhuda maaquwasita aadexona be gizusenike burussi otiko e yese. Abrahaameko <<Axiti uddi nennako u suuzutte>> yeydi modhe odo otiko e yese.

⁹Yoonase Abrahaameni Wonto e aadesso, Wontoni esa suuzzo. Ye esuke biya aadexeesita suuzoko e suuze.

¹⁰<<Wonto woga fissharowa diizuttese woossita bidzoni shato badi kakkuwasita Wontoy u uddina aaciko e yese>> yeydi e diizuttese gisha <<Woga kafenako nu gize>> yeydi hineesiti uddi aaccutteseesitako.

¹¹<<Gizo axi be aadexonako yeso e degexe>> yeydi e diizuttese gisha woga kafena ooneni Wonto buro gizuwassi addako.

¹²Wogaara aadexowaray wola muho keenguwasso. <<Axi wogana yesese e danda'esimay wogay ohe woosso uddi kafenako>> yeydiko e diizuttese.

¹³<<Mixi gara suxhutti hay'eesiti uddi Wontoy aacesheeshitako>> yeydi e diizuttese gisha Kristosay nuumeydi aacuttesesa maaddhi woga kafe dheebena nu gara ellecha aachukafa numba e wozzo.

¹⁴Numba e wozzosini Wontoy Abrahaamese indecho suusi Yesuusi Kristosana Ayhuda maaquwasituse e elloronikiyara Wontoy <<Ingako ta inge>> hidi hidese Ayaana Geeshe aadexona nu eforonikiyarako.

¹⁵Nuundo nayshito! Axi gidda lossuttese zeere bidzo hinuse ta ohheese. Bidzi axi caaqo caadho geede ooneni ooxese oo'oyne e gara koseseni danda'uwasso.

¹⁶Ye esuke Wontoy Abrahaamiyara esukofa yeluttesaara e gobbusso. Fissharowa hade lagaade gisha zeerdanke <<Esukofa yelutteseesituse>> hidi e maaddho baane hade bidzi axi gisha zeerdanke <<Esukofa yeluttesuse>> hidiko e hido. Ye <<Esukofa yeluttesa>> hidi hiyuttasi Kristosako.

¹⁷Hay, tani hinuko hinesi buroko Wontoy Abrahaamiyara wolko e caadhecha. Hine e caadhowafa oyddi xhiixe haydzi tammi bera geede e indo wogay buro caadhi e indecho gobbo baysese danda'uwasso.

¹⁸Wontoy inge tago efese danda'usoosi woga kafena e maaddhessako e ingesa gobbisine katti efey attoko e attaane. Wontoy <<Ingako ta inge>> hidi be gobbusecho gobbo badenako Abrahaamese e indo.

¹⁹Hine wogay inguttosi abasuwa? Wogay inguttosi Abrahaamekofa yeluttarasi Wontoy esa gobbusesesi bente aallo iita hantay aba maaqesa beysesuko. Wogay inguttosi woosaxi badena feeqaaka sekke hanke hante bidzi axunako.

²⁰Feeqaaka sekke hanke hante axi yesso geede lam'i bade axi yeseko e worguse. Wontomay bidziko.

²¹Yoonase Muse badena ingutta wogay Wontoy gobbusecho gobboy hantuwannike mahuwa e mahe? Oo'o, fetto mahuwasso. Aadewo wogay e inguttosi yeso ingesa e maaddhesesako gizetey woga badenako e bentaane.

²²Yesuusi Kristosa aadexena bente gobboy aadexeesituse e inguttoronike Hayla Fissharoy ohenike saha gara yese axi be uddina cubbose e oomo tufaxe maaddhiko u yese.

²³Axi Kristosa aadesoosume e buro woga badena tufaxe maaddhi aadexoy addeyne aallo tufuttiko nu yecha.

²⁴Ye ogena aadexona nu gizorosa wogay numba disshi Kristosako aangesako.

²⁵Hattema aadexoy yoodo geede woga oomo nu diccichoshi attiko yese.

²⁶Hi uddina Yesuusi Kristosa hi aadexe gisha hinuni Wonto nayshitako.

²⁷Ye esini Kristosaara bidzo maaqese xhamaquttese hinuni hi uddina Kristosa maa'oke maadhiko hi yese.

²⁸Hi uddina Yesuusi Kristosaara bidzo hi maaqe gisha Ayhudaxituseni Ayhuda maaquwasituseni u gidda maalaseni laaxuseni u gidda asanxuseni maachisheni u giddani abani shahoy baasso.

²⁹Yoonase Kristosase hi maaddhoniya hinuni Abrahaame fira fiixhako. Abrahaame gobbusutto gobbo badena Wontoy ingesa ekkeesitako.