Read koorete Galatiya 4 Bible Online

Galatiya 4 - koorete bible

Galatiya 4

¹Hatte ta hinesi biyade dhaalesi yele oddhe yesine fetto ye wodunte gara uddi ade e maaddhakoni maalame shahuttesesa maaquwasso.

²Esadey oto woggay yoodi elloro aallo biya dicheeshitusaara ye wodunte aykeesitusaara u oomoko e yese.

³Yeydiwo nuni aadesso badi nu yechoniyaka ha saha woga oomo aqisine e maalitako nu maaqicha.

⁴Ohuttecha woggay elloniyaka Wonto nayshe maaqese nu danda'oronike wogase e oomo yecha numba wozese hissine be yele e anso. Maachi garafa e yelutto, wogaseni e oomo e maaddho.

⁶Wonto nayshe hi maaqe gisha Wonto <<Abbayo, abbayo!>> hidi xheyge be yele Ayaana ansi nu muxhurowa e gaddo.

⁷Ha e gisha ha makkina sekke Wonto yeleko neni baaka maala maaquwannako. Wonto yele ne maaddho gisha Wontoy be nayshushe naddhesesa uddiko ne ekke.

⁸Buro Wonto erdo badi yesine beese Wonto maaquwadi yechashitusuko maala maaddhi hi woosutticha.

⁹Hattema Wonto hi erdo geede Wontoy fettoni hinumba erdo geede ye gafaxitukuwara go'uwa ha saha wogitukowara waanidini sekke hi maaqe? Waanidini sekke ye u maalita maaqese hi worge?

¹⁰Wontaafa, agunnaafa, bargowafa, bonowafa, beraafa yeysi shati hi kuxe.

¹¹Hinume hissine ta gattecho hantay haliya yahowa e atteni hissineko hi gisha ta hoodde.

¹²Nuundo nayshito! Tani woga eresa maaqichine hinumba bishonike hatteni hinunini <<Tamba bishuwayte!>> hidiko hinumba ta shi'e. Hinuni fetto taase iita hi hantoy baasso.

¹³Hi erenike, acha wogga modhe odo hinuse ohese godo ta degessosi hardi hinunaara ta yechoshunako.

¹⁴Fetto abani ta hargena taa efe dheebese danda'ichine haasso baytako, taa darri hidobaytako. Hade Wonto woosaxuke matiko fetto hade Yesuusi Kristosake matiko tamba hi motto.

¹⁵Ha e buro hi keengicho maggay uddi ay e baado? Hinuse e danda'uttako fetto hi aafe hi garafa kessi taase ingako hi ingaane. Tani ye esuse atoko.

¹⁶Hinne hatte hinuse aade ta oto gisha iilaxe maaddhiya ta bento?

¹⁷Hi buro bayse axiti hi gisha eedhi maxesako u bishe. Ye u maxoy modhe hantese maaquwasso. U worgesi ususe eedhi hi maxoronike nu garafa hinumba shahesuko.

¹⁸Tani hinunaara yeseniyawo e maaddho baane uddi woggaakawo bidzi abakoy modhe maaddhoyna esuse eedhi maxey modheko.

¹⁹Ta nayshito! Kristosa garawo hi miimoro aallo sekke hi gisha zerso maddhake orjenako ta maddhunge.

²⁰Hatte hi gidda benti burosume arsi fede ogena hinuko zeerese orjena worgoko ta worgicha. Aba hinuse ta hantesi ta buro e baanne maddhundiko ta yese.

²¹Hinuno woga oomo aqe worgeesito, haaya mee, taase ohuwayte. Wogay ohesa siido baytuwa?

²²Fissharowa Abrahaamey lam'i na'axhe e yellonike diizuttiko e yese. Bidzo yellanni maakiyo maaqichanniyoko lakko yellanni maakiyo maaquwadecha indoko.

²³Ye maaki'i yeley yeluttosi axi maxona maaqusune ye maakiyo maaquwadechanni yelemay Wontoy <<Ingako ta inge>> hidi gobbusechoshuna yeluttasuko.

²⁴Ha lam'i indowaxhiti lam'i caaqo beysesako u maaqicha. Bidzi Aggaareko. Isini Sinna bakkaa maaddha caaqoko i beyse. Maaketose maaqe nayshuko i yele.

²⁵Aggaarey Arabe wude yese Sinna bakka beysesa maaqisine hatte ha saha gara yese Yerusaleeme gisha maaddhiko i bente. Isini be nayshitaara maaketowako i yese.

²⁶Maakiyo maaquwa indoy beysesi afaa yese maakiyo maaquwa Yerusaleemeko. Isoko numba yella indoy.

²⁷Ha esini <<Neno nayshe yelluwanniye meendesenniye magguwa! Neno zersi eruwaniye ililli hiwwa! Ade keenge indome i adey iso dhaddese indoko laga nayshe keengesa>> yeydiko e diizuttese.

²⁸Nuundo nayshito! Hinunini hade Yissaaqeke Wontoy <<Ingako ta inge>> hidi gobbusechooshuna yelutta nayshitako.

²⁹Yenniyani axi maxona yeluttechashi Wonto Ayaana maxona yeluttechashe waayye beysonike hanzoni yeydiwoko.

³⁰Hayla Fissharoy abaydina hine? Hayla Fissharoy <<Maaki yello yeley maakiyo maaquwa indoy yello yeliyara fetto e dhaaluwa gisha maakiyo i yelliyara goodduwa!>> yeydiko e hine.

³¹Ha e gisha, nuundo nayshito, nuni maakiyo maaquwa indo nayshitako baaka maaki nayshita maaquwanxhiko.