Read koorete Galatiya 6 Bible Online

Galatiya 6 - koorete bible

Galatiya 6

¹Nuundo nayshito! Bidzi axi aba bisha cubbowani gelli e bentako Wonto Ayaana keenge hinuni yeenke yese axe shenona hanke maheko e worguse. Neese yeenke yesesuna naa'utti ne ungeeme niya kakkuwa.

²Wol idda idduwayte. Yeysi mahenako Kristosay woossese woosso hanta gara hi feyshe.

³Axi ooneni fedeesume be gare abakoy baasa <<Tani fedeesita garoko ta gare>> yeydi e massako biyako e qaaruse.

⁴Be bidzi bidzina axi be hanta arsi beewaye. Yenniyani be hantaafako esuna be cee'uttesa e degexe. Fedaara wol badiya bemba gaddi beye worgusuwasso.

⁵Ye esini be bidzi bidzina be yesose maaqe basita beese iddeko e worguse.

⁶Wonto kato eriya yese axi ooneni ye bemba erusiya yese axuse modhe abako uddi shaheko e worguse.

⁷Hallofita! Axi be ayllosa e ace gisha ooneni <<Wontoy tani maxenikeko e maxe>> yeydi Wonto gara qozoozzako bishuwassho.

⁸Be achoy col'esa alsesi ye be col'a iitetiyafa hayboko e degexe. Ayaanay worgesa alsesi Ayaanakofako koolo makkina yeso e degexe.

⁹Modhe hantese gobbo burso badi dandadhi nu miindako ye modhe hanta aafe nu degexe woggay yoone gisha modhe hanta hantese gatofunxhi.

¹⁰Yoonase nu hantorosa woggay bentoniya axituse uddi fetto aadexona zawa axita maaddhaasituse modhe hanta nu hantoose.

¹¹Waakidese orje diizzo beytana ha esa hinuse ta kuchena ta diizosa beewayte.

¹²Acho gara maaqe wudena bente zeerena cee'utteesiti ooneni gada hi uttoronike hinumba maddhunxeesitako. Yeysi hantesi suxi mixi gara haydha Kristosa gisha waayyey u gara yooneesume hissineko.

¹³Usi acho gara maaqe wudena bente abako hi alsosuna hinunnana cee'uttese hissineko gada hi uttorosa u worgesa baaka gada uttaasita maaqisine beese woga kafuttuwasso.

¹⁴Nu Laaxi Yesuusi Kristosay e gara suxhutto suxi mixe baaka feday esuna ta cee'uttesi yesoppe. Ye suxi mixi gara tani haydhi ha saha maxo garafa shahuttiko ta yese, ha saha maxoni haydhi ta garafa shahuttiko e yese.

¹⁵Gada utteni maaqqe gada utte dheebey aban maruwasso. Maresi kille meddhutta axe maaqeko.

¹⁶Ha ohuttaasuna yeseesitusaara Wontose maaqe Isra'eelaxitusaara modhetiyara maaruwaray maaquwaye.

¹⁷Yesuusa hantaxe ta maaqesa tamba beyse e gisha ta durutto beytay ta gara yese gisha ha e geede sekke ooneni taa maddhunsoppe.

¹⁸Nuundo nayshito! Nu Laaxi Yesuusi Kristosay axuse keenge maxo modhetey hi uddiyara wolla yesuwaye. Ameen.