Read koorete Efesoonaxituse 1 Bible Online

Efesoonaxituse 1 - koorete bible

Efesoonaxituse 1

¹Wonto maxoke Yesuusi Kristosase anxuttase maaddha Phawlosekofa. Yesuusi Kristosa ogiya miindesesa maaqe Efesoone yese haylaxituse anxutta woosso.

²Nuuse ade maaqe Wontowara Laaxi Yesuusi Kristosaaray axuse keenge modhe maxowara modhetiyaray hinuse maaquwaye.

³Kristosa badena uddi Ayaanakofa bente suuse nuuse afaaka inda nu Laaxi Yesuusi Kristosaade maaqe Wontoy galatuttuwaye.

⁴Ye esini haylaara haasse keenguwasaara maaddhi e buro nu bentoronike sahay meddhutto baanneko Kristosana numba e xhardo.

⁵Wontoy beese be maxonaara be eehanaara burussiwo <<Ta nayshuko ta mahe>> hidi be hidechonike Yesuusi Kristosana be nayshe numba e mato.

⁶Yeysini e matosi axuse e keenge kuxuttese e maxo modhete gisha axi esa galatorosako. Ye modhete be maxoni eehuttese be yele badenako niise e adduso.

⁷Ye be yele suuxuna nimba wozzi ni cubbo <<Attuwaye>> hidi e hido. Ye esini Wontoy axuse keenge orjena laddese maxo modhetiyafa maxowafa dendasunako.

⁸Axuse be keenge modhete maxo be gaxunaara be eranaara uddi orjusshi lagussi e indo.

⁹Wontoy modhe maxo keengesa be maaqe gisha Kristosa badena buro hantese be massechonike eruttese danda'uttuwadecha be maxo ni eroronike e mato.

¹⁰Wontoy mahese massesesi maaqese e worguse woggaaka afaakani maaqqe sahaaka yese abakiti uddi bidzi Yesuusi Kristosa adeto oomo e maaqoronikeko.

¹¹Uddi abako beese be maxona hante Wonto maxoke burussiwo <<Ha usi taasuko>> hidi be hidonike hatteni Kristosa badena e axita maaqesuko ni xharutto.

¹²Esume yeysi e matosini burona Kristosa gobbe mahe nini e kuxa fuula kedda kedda ni hisoronikeko.

¹³Assi hinunini aade gisha ohe kato ye esini hi maaruttesenike hinuse ohe modhe odo hi siido woggaaka Kristosa aadessiko hi yese. Esuse hi maaqoronike addusese Wontoy hinumba be gobbusecho Ayaana Geeshe hinuse indiko yese.

¹⁴Ayaana Geeshe niise e indosunako Wontoy beese maaqeesita uddi wozzi be also geede nuuse be hidese tago e indesenike erese ni danda'e. Ye esini Wonto kuxa fuulay kedda kedda hiyoronikeko e mahe.

¹⁵Ye e gisha Laaxi Yesuusa hi aadexenikiyara haylaxita uddi waysi hi eehenikiyara ta siidese gisha

¹⁶Wonto ta shi'e aallo hinumba massi esa galate dhagguwasso.

¹⁷Kuxay esuse bishe adiyara nu Laaxi Yesuusi Kristosa Wontowara maaqesa modhussi hi eroronike Ayaanay gaxe e ingorosaara Wonto zeere modhussi hinuse e addusorosaarako Wonto ta shi'e.

¹⁸Yeydiwo hinumba xheydi aba bissheshesha hinumba e gobbusesesaara Wonto haylaxiti efese hine kuxuttese tagoy aba makko laga e maaqesaara hi eroronike hi muxhuro e do'orosako Wonto ta shi'e.

¹⁹Hatteni aadexiya yese nuuka hantiya yese orje e osay an aallo malla e maaqenike hi erorosako Wonto ta shi'e.

²⁰Wontoy ye orje be osanako Kristosa haybowafa densi afaaka be oshichi badena e uttusso.

²¹Wontoy osani, adetoni, anguzeteni, laaxunteni keengesi garani maaqqe ye esa bishesheeshiti garani uddi Kristosa afana e mato. Yeydiwo ha sahaawoni e maaddho baanne yoone sahaani uddi afana maaqe kuxa fuula keenge sunxe esa e sunso.

²²Uddi abakoy esuse e woosuttoronike esuse adeto indi uddi basi garani qino mati Wonto zawa axituse e indo.

²³Wonto zawaxiti Kristosa garako. E kumetey usukaanna bentesako, esini uddi abakowa kundesesako.