Read koorete Efesoonaxituse 3 Bible Online

Efesoonaxituse 3 - koorete bible

Efesoonaxituse 3

¹Ye e gishako tani Phawlosey Ayhuda maaquwa hinumeydi hissine Yesuusi Kristosa ta mare gisha tufaxe maaddhi yesineko Wonto shi'iya ta yese.

²<<Hinumbako e go'e>> yeydi hissine Wontoy axuse be keenge maxo modhetiyafa densi hinuse ta hantoronike taa e matosa aadewo siidiko hi yese.

³Ha esume womfa hatussi hinuse ta diizzonike Wontoy aachiyaka yecha be maxo addussi tamba beysiko e yese.

⁴Hinuse ta diizzesesa hi zeerussa'ayko Kristosa gisha aachiya yecha Wonto maxo taase gellase eresuko hi danda'e.

⁵Ha aachutti yecha Wonto maxoy Wonto Ayaana badena hayla maaqe anxuttaasitusaara kaayaxitusaara hatte be addeydesenike ha esume buro beriti giddaa yecha axituse addeydo baasso.

⁶Ye aachiya yecha Wonto maxoy Ayhuda maaquwasiti modhe odo badena Ayhudaxitaara wolko Wonto suususe shahaxe u maaqenikiyara usaara wolla bidzi gara u maaqenikiyarako. Yeydiwo Wontoy Yesuusi Kristosa badena numba e gobbusese gobbose shahaxe u maaqesako.

⁷Wontoy be osana hanti axuse be keenge maxo modhetiyafa densi ha modhe odo ta hantoronike taa e mato.

⁸Tani fetto haylaxiti giddaafa eero ta maaddhakoni Wontoy axuse be keenge maxo modhetiyafa densi e aallicira axi erese danda'uwa Kristosa wodunte Ayhuda maaquwasituse ta ohoronike e mato.

⁹Yeydiwo uddi abako meddha Wontoy olowafa ayti aasshi be gaddecho be maxo waydi e hantuttenike uddiyadese ta addussoronike e mato.

¹⁰Yeysini e matosi ha woggaaka afaaka yese maagitaara adete keengeesitaaray Wonto zawa axita beedi laga bishana yese Wonto eraara e gaxaara u eroronikeko.

¹¹Wontoy nu Laaxi Yesuusi Kristosa badena ha esa e alsosi olowafa ayti koolo makki aallo <<Yeydiko e maaqe>> hidi be massechonikeko.

¹²Kristosaara bidzo maaddhi esa ni aadesese gisha Wonto buro naassi bidzi muxhurona uqesuko ni danda'e.

¹³Ye e gisha hinumeydi hissine essaaka ta yese maddhay hinuse kuxa e maaqenike erdi <<Gobbo bursofita>> hidiko hinumba ta shi'e.

¹⁴Ye e gishako ade maaqe Wonto buro bocunti ta shi'e.

¹⁵Afaakani maaqqe sahaaka be ommana ommana yeseesiti uddi sunxe u degexesi esukofako.

¹⁶Hinuka yese bentuwa hi oonunte minxe osa Ayaana badena Wontoy be kuxa fuula lagetiyafa hinuse inguwaye.

¹⁷Kristosay aadexona hi muxhurowaka be zawa mati yesoronikiyara hi xhabhowara hi kaachowaray eehana miindesesa maaqoronikiyara

¹⁸assi Kristosa eehay hadursi bade e galaltiyara oshichi bade e aaketiyara, wokke afaa an aallo e keddaydesesaara yekke sahaa an aallo e hodhesesaara haylaxitaara uddi wolko gaxhese hi danda'oronikeko Wonto ta shi'e.

¹⁹Kumena eruttese danda'uttuwa Kristosa eeha erese hi danda'oronike facete keenguwa Wontoy beese be modhete hinuka kunxoronikeko Wonto ta shi'e.

²⁰Yebo, nuukaaka hantiya yese be osa makko nu shi'eesumeni nu maxeesumeni uddi orjena garsi mahese danda'e Wontose

²¹e zawa axitunani maaqqe Yesuusi Kristosa badena berana berana uddi koolo makki aallo kuxay maaquwaye, ameen.