Read koorete Efesoonaxituse 4 Bible Online

Efesoonaxituse 4 - koorete bible

Efesoonaxituse 4

¹Yoonase, Laaxuse ta hante gisha tufuttese tani hi xheyguttese xheysuse bissheshesha maaddhi hi yesoronikeko hinumba ta shi'e.

²Eehana wola aykisine uddi wogga hinumba ullaysena, shenona, danda'ona yesuwayte.

³Hinumba hanke wolko bidzo mahe modhetena Ayaana Geeshukofa bente bidzeto kafese oseywayte.

⁴Hi xheygutto wogga bidzi gobbose hi xheyguttesenike hinuni bidzi garako, bidzi Ayaanako hi keenge.

⁵Yeydiwo bidzi Laaxe, bidzi aadexowara bidzi xhinqatiyarako yesa.

⁶Assini uddime afana maaddhese uddiyadiyaka hantesa uddiyadiyaka yesesa uddiyadese ade maaqe bidzi Wontoko yesa.

⁷Yeydi e maaddhakoni Wontoy axuse keenge modhete maxowafa dendasuna Kristosay niise ingese be masso makko ni bidzi bidzise ingo indiko e yese.

⁸Ye esini <<Wokke be kesso woggaa lagaade didhi etti e hando, axuseni ingita e indo>> hidi e hiyuttonikeko.

⁹Hinne <<Wokke e kesso>> hidi hine katoy yekke sahase e oomo yese godowa e hoddhosa beyse dheeddako hine am e beyse?

¹⁰Yekke e hoddhosini uddi godowa kumese afase uddi e afana kessasi beese esako.

¹¹Esini bidzi bidzita anxuttaasita, bidzi bidzita kaayaxita, bidzi bidzita modhe odo oheesita, bidzi bidzita Wonto zawaxita yeengeesitaara eruseesitaara yeydi u maaqoronike mati Wonto zawaxituse e indo.

¹²E indosi Kristosase e gara maaddhi yese Wonto haylaxita maaqe numba nu dichoronike Wonto zawa hanta nu hantoronike naddhiko.

¹³Nu diceshini Wonto yele erenaara aadexonaara bente bidzetowaka elli Kristosay bidzoni facete keenguwasa kume maaqenike nunini diceshesha nu maaqoronikeko.

¹⁴Ha e geede sekke axe halusenaara qaarusenaara zaadena naquttese haluxe erunxuna hade jhirahonaara agexunaara sekke hanke hine nayshe maaddhofunxhi.

¹⁵Yeydi maaqekofa aade eehana zeerisine qino maaqe Kristosa bisheshe uddi basuna nu dicceeshe.

¹⁶Kristosanako be sunxuna sunxuna yese nu garay hanke wol gara e ayke. Gara kaatita hanke wol gara muhusesi esako. Garay be bidzi bidzina beese shahutti inguttese hanta hantisineko be kumena e dice, eehanani e oseyne.

¹⁷<<Ha e geede sekke hade u maxoy go'uwasa maaqe Wonto eruwasiti yesenike yessofita>> yeydi hissineko Laaxuna odde hidi hinuse ta ohe.

¹⁸U muxhuroy ceendi ere dheebiyafaara woosutte dheebiyafaara dendasuna Wontoy inge yeso garafa dhaddi zardiko u yese.

¹⁹An basuseni borso be keenguwa gisha be bishana bishana yese tuna hanta mati mati hantese iitana eexhi bembani iita hantase garsi u indo.

²⁰Hinunimay Kristosa gisha hi erdosi yeydi maaquwasso.

²¹Aadewo e gisha siidiko hi yese, Yesuusana yese aade esaara bidzo maaddhi fetto erdiko hi yese.

²²Ye e gisha qaarussi cubbowaaka aange col'ana iittese buro waakeydese axe hi maaqichoshaara waakeydese yeso hi yechoshaara erdi hi garafa ooxuwayte.

²³Hinuse hi kahena killoonguwayte.

²⁴Aadenani maaqqe gizetenaara haylontenaara Wonto bisshi meddhuttese kille axe hi maaddhonike yesuwayte.

²⁵Ye e gisha zaade zeerdofita, ni uddina be sunxuna sunxuna yese hade bidzi garake ni maaqe gisha fede axitaara aade nu zeerreese.

²⁶Huulesa maaqo'aykoni cubbo hantofita. Hi huullo huula hi dhaddo baanne qoossi gelloffe!

²⁷Humbayese godo indofita.

²⁸Buro kayssichashi ha e geede sekke kayssoppe. Ye esukofa maddha keenge axuse be inge abakoy yesoronike beese be kuchena modhe hanta hantuwaye.

²⁹E worgusenike fedeesita dicheshaara siineesita go'e katowara baaka iita katoy fetto hi nuunaafa kessoppe.

³⁰Wozuttese hi yese wontase Wontose hi maaqenike esuna adduse hayla maaqe Wonto Ayaana higilsofita.

³¹Camete, aaradhe, huula, koyse, cashoni uddi iita hantaaraysi hi garafa ooxuwayte.

³²Woluse jhergesaara higilesaara maaquwayte, Wontoy Kristosana hinuse <<Attuwaye>> hidi hidonike hinunini woluse <<Attuwaye>> hidi hiwayte.