Read koorete Efesoonaxituse 5 Bible Online

Efesoonaxituse 5 - koorete bible

Efesoonaxituse 5

¹Yoonase Wontoy hinumba eehe nayshe hi maaqenike Wonto bishuwayte.

²Kristosay nimba eetonikiyara Wonto magguse modhe sawwe ingowara kaashaara mati be yeso nuume hissine garsi e indonikiyara hinunini eehana yesuwayte.

³Aba bisha laggetoni maaqqe tuna hantay oo'oyne habbu habbu hiyey ye esita mahe dhagguwaychine beese e odoni odussofita. Ye e bishay Wonto haylaxituse worgusuwasso.

⁴Yeydiwo borsusesa oo'oyne go'uwa base oo'oyne seefuse qozooza zeere hinumba worgusuwasso. Yeysi mahekofa Wontose galata uqusuwayte.

⁵Laggetesi, tuna hantesi, uddi abakose habbu habbu hineesiti Kristosasaara Wontosaara maaqe kaatetowaka tagoy ususe baassa modhussi eruwayte. <<Habbu habbu hiyey>> yeydi hiyoy Wonto maaquwasa wonto mati kuxeko.

⁶Ye esa bisshesheshituna woosuttuwa axiti gara Wonto huulay yoone gisha ooneni hinumba go'uwa zeere zeerena qaarusoppe.

⁷Ye e gisha woosuttuwa axitaara wolko feysshofita.

⁸Hinuni hinuse buro cenchaakako hi yecha. Hattema Laaxaara bidzo maaddhi fo'e gidda hi yese gisha fo'e maaddhi yesuwayte.

⁹Fo'e aafey modheteni, gizeteni, aadeni uddi ye esa bisshesheshitako.

¹⁰Ye e gisha Wonto magguse basi aba e maaqenike hossi kessi naddhi beewayte.

¹¹Go'uwa cencha hanta hanteesita fo'iyaka addaa kessuwayte baaka usaara wolko hantofita.

¹²Ye esini aachiyaanna u hante hanta beese zeereni fetto borsusesako.

¹³Uddi abakoy fo'iya be kese woggaa e bishay tiddhidiko e bente.

¹⁴Ye esini addaa bentesa uddi fo'eko beysesa. Ye e gisha <<Neno geheyo, birkuwa! Haybowafani denduwa! Kristosay be fo'e giddaa ne yesoronikeko e mahe>> yeydiko e hiyuttese.

¹⁵Yoonase modhussi hinumba katti yesuwayte. Hade gaxaxituke baaka muyituke yesofita.

¹⁶Ha woggay iita maaqe gisha aba woggaakani modhe hantuwayte.

¹⁷Ye e gisha Laaxi maxoy aba e maaqenike gaxhuwayte baaka muyondofita.

¹⁸Weyne daana usshi goojhey axi yeso e iise gisha usshi goojhofita. Goojhekofa Ayaana Geeshuna kunguwayte.

¹⁹Be bishana bishana yese zingalena wolla zingaluwayte zeeruwayte, Laaxuse hi muxhurowaka zingaluwayte.

²⁰Uddi woggaaka uddi basi gisha nu Laaxi Yesuusi Kristosa sunxuna ade maaqe Wonto galatuwayte.

²¹Kristosa kuxemeydi hissine hi bidzi bidzina hinume feda afana mati esuse woosuttuwayte.

²²Indowaxhito! Laaxi Yesuusa afana mati esuse hi woosuttenike hi adese adese woosuttuwayte.

²³Ye esini Kristosay be gara maaqe Wonto zawa axita loolusesa maaqisine ususe qino e maaqenike adey be machishe qinoko.

²⁴Wonto zawa axiti Kristosase woosuttenike yeydiwo indowaxhi uddi abakona be adese adese woosuttuwaye.

²⁵Adiyaxhito! Kristosay Wonto zawa axita eetonikiyara bemba usume hissine garsi e indonikiyara hinunini hi macho macho eehuwayte.

²⁶Kristosay bemba garsi e indosi Wonto zawa axita be kato badena waaxuna shoti haylonxese wordiko.

²⁷Ye e bishanako axhuma oo'oyne waqo shur'ume oo'oyne fede iita abakoy bento baane bidzi facete keenguwasa haylaara kuxa fuulaara keengesa mati be buro e uquse.

²⁸Yeydiwo adiyaxhitini beese bemba be eehenike be macho be macho eeheko uso e worguse. Be macho eehesi bembako e eehe yeydi hiyoko.

²⁹Axi uddi beese e muune, mati mati bemba e kaalesa baaka bemba inxha'esi ooneni baasso. Nuni Wonto zawa axiti be sunxuna sunxuna yese Kristosa gara nu maaqe gisha Kristosay nuuse ye esukeko e mahe.

³¹Hayla Fissharowa <<Ye e gishako axi biyade beyndo dhaddi be machiyara wolla e zuqutte, be lam'unani bidzi axe u maaqe>> yeydiko e hiyuttese.

³²Ha zeerey axuse tiddhidi gello baa orje zeereko. Tani ha esa hinuse ta otosi Kristosasaara Wonto zawa axitusaara u gidda yese bidzeto gishako.

³³Yeydi e maaddhakoni ha ohuttasi hi gisha zeeruttasuko. Hinunini hi bidzi bidzina hi macho macho hinukeysi eehuwayte, machini be ade ade kuxuwayya.