Read koorete Efesoonaxituse 6 Bible Online

Efesoonaxituse 6 - koorete bible

Efesoonaxituse 6

¹Nayshito! Laaxi Yesuusaara bidzo hi maaqenike hinumba yella geruse woosuttuwayte. Ye esini bisheshako.

²<<Niyade neyndo kuxuwa!>> yeydi hiine woossoy gobbo keenge acha woossoko.

³Ye gobboni <<Uddi abakoy neese gizoko gize, ha saha gara ne yesesini galala berako e maaqe>> hidi hinesako.

⁴Hinuno adiyaxhito! Laaxi gaddo woganaara e eruse erunxunaara hi nayshe dichuwayte baaka uso huulussofita.

⁵Maalito! Kristosase hi woosuttenike hinumba ahe hi laaxe kuxisiniyara jhashishiniyara bidzi muxhurona esuse woosuttuwayte.

⁶Wonto maxoke be muxhurowafa kessi hante hade Kristosa maalituke baaka hade axe magguseesituke benteeme hissine hantofita.

⁷Axuse e maaddho baane Laaxi Yesuusase hi hantenike mati hi laaxuse <<Modheko>> hidi hissine maggana hantuwayte.

⁸Ye esini maalani maaqqe maala maaquwasi be bidzi bidzina be hanto modhe hanta abani e maaqo'ayko e wooma Laaxi Yesuusakofa e ekkenike erako hi ere.

⁹Hinuno laaxito! Hinusaara hi maalitusaara Laaxe maaqesi axi aafusha beedi hantuwasi afaaka yesenike massi hi maalita hi jhashushesha dhaddi ususe modhe hantuwayte.

¹⁰Aallicira hinuse ta ohesi Laaxunaara orje e osanaara oseywayte.

¹¹Humbaye fayankete iicheshe hi danda'oronike Wonto toora miijhe e uddina aykuwayte.

¹²Esaara wolko nu darguttesi axaara wolko e maaddho baane afaaka yese tuna ayaana tooraxitaarako. Ye usitini ha cencha beraaka hantiyaka yese ahiya yeseesitaara, afana maagitaara ha saha gara yese adeto keengeesitaarako.

¹³Ye e gisha iita wontay hinuko yooneniyaka hi iilaxe iicheshe hi danda'oronike Wonto toora miijhe e uddina aykuwayte. Ye toora miijhenako aallicira aallo esaara hi dargutto geede miindi ee'ese hi danda'e.

¹⁴Yoonase hade zalabhitena hi elfa hi gixhesenike aade gixxhi gizeteni hade fenga fashe toora maa'oke maadhi

¹⁵modhe odo hade kobha hi tokiya hi gelsenike go'utti esuna naqutti ee'uwayte.

¹⁶Ye usitaara wolko aadexo hade sheereke aykuwayte. Ye esunako hade tamake eexhe Humbaye dhozze e uddina baysese hi danda'e.

¹⁷Yeydiwo Wontoy hinuse matese loolo modhussi aykuwayte. Toorase qinowa gadusso gulley qino kakkenike ye looloy hinumba kafako e kakke. Ayaana Geeshi satata maaqe Wonto kato gixhuwayte.

¹⁸Worguse abakose Wonto shi'isine Ayaana Geeshuna durkutti uddi wogga shi'uwayte. Shi'isine birti oseywayte. Wonto haylaxiti gisha uddi burse baaka shi'uwayte.

¹⁹Assi e aallicira axi erese danda'uwa modhe odo jhashe keenguwasa ta ohoronike worguse kato taase e ingoronike Wonto taase shi'uwayte.

²⁰Tani fetto hatte tufutti yesineni Wontoy ha modhe odose be gisha e gaddesesako. E worgusenike naassi ta zeerorosa taase shi'uwayte.

²¹Laaxuse bidzi muxhurona hantiya yese eehuttese indo na'i Tikiqosey waydi ta yesenikiyara aba ta hantenikiyara hi eroronike uddi zeere hinuko ohoko e ohe.

²²Ye esusuko nuni waydi yesenike hi eroronikiyara hinumba e osusoronikiyara esa hinuko ta ansese.

²³Ade maaqe Wontokofaara Laaxi Yesuusi Kristosakofaara modhetiyara eehaaray aadexowaray wolko indo nayshe maaqe hinuse maaquwaye.

²⁴Buruwa eehana nu Laaxi Yesuusi Kristosa eeheesituse uddi Wontoy axuse keenge maxo modhetey maaquwaye.