Read koorete Filphisoosaxituse 3 Bible Online

Filphisoosaxituse 3 - koorete bible

Filphisoosaxituse 3

¹Nuundo nayshito! Yoonase aalliciraaka hinuse ta hinesi Laaxuna magguwayte. Hi haluwannike hinumba e mahe gisha ye buro ta diizechosha sekke hinuse diizese belxheywasso.

²Hade kanake maaddhi yeseesiti garafa hinumba kakkuwayte. Iita hanteesiti garafaara <<Gada utteko hinumba e worguse>> hidi zaade era eruseesiti garafaara hinumba kakkuwayte.

³Aadena gada uttesesi numbako. Ayaana Geeshuna Wonto kuxesaara wude yese wogana e maaddho baane Yesuusi Kristosana cee'uttesaara maaqe nunini aadena gada utti yesesako.

⁴Cee'uttese e worgussako wudena hantutte wogana cee'uttese danda'ako ta danda'e. Ye esuna cee'utte worge axi yessako tani esume gardi esuna ta cee'uttesako ta keenge.

⁵Ta yelutto hazzunxo wonteko gada ta utto. Tani Isra'eelaxuko, Isra'eelaxiti giddaafa Biiniyame nayshaafako ta yelutto. Eezoy essaa baa Ibraxuko tani. Ayhuda woga kafe gisha e maaqo'ayko Farasaxuko ta maaqicha.

⁶Wontose ee'e gisha e maaqo'ayko Wonto zawa axita waayye beysesako ta maaqicha. Woga kafenako gizuso yeydi hiyutte gizete gisha e maaqo'ayko haasse keenguwasako ta maaqicha.

⁷Ha esume buro taa go'ako u go'e ta hichoshita uddi Kristosame hissineko wooma keenguwasa mati ta beene.

⁸Ye esumeni afana ta Laaxi Yesuusi Kristosa ereme garesi feday baa gisha uddi abako hade wooma keenguwa abakokeko mati ta beene. E gishako uddi baseni ta dheeddo. Kristosa degexeeme hissineko hade fiteke mati uddi base ta beene.

⁹Yeysi ta mahesini Kristosaara wolla bidzo maaqesuko. Hatte ta keenge gizetey woga kafena bente taakofa maaqe gizete e maaddho baane Kristosa aadexena bente gizeteko. Ye e bisha gizetey Wontokofako. E bentesini aadexonako.

¹⁰Fedani assi Kristosaara haybowafa esa densa osaara ereko ta worge. Esi haydhonike haydhi esa bisshiko e maddhase shahaxe maaqese ta worge.

¹¹Haybowafa denxo taase degexese col'ako ta col'e.

¹²<<Ha esa uddi degessiko ta yese>> oo'oyne <<Tani facete keenguwasso>> yeydi ta gisha zeerese danda'uwasso. Yeydi e maaddhakoni Kristosay beese tamba mati taase ingese e hinesa degexesuko ta woxhe.

¹³Nuundo nayshito! <<Ye esa degessiko ta yese>> hidi hiwwasso. Bidzi abako mahoko ta mahe. Ye esini ta geede ta garsosita botisineko ta buro yesesa aykese ta oseyne.

¹⁴Wontoy Yesuusi Kristosa badena esume afaa taa e xheydese moore degexesuko iicho godowa ellese ta buro gara ta woxhe.

¹⁵Yoonase nuukaafa uuxheseesiti nu uddina ha esuke maxeko nuu e worguse. Ha ohutta maxome fede shahuttese maxo hi massakoni ye esani Wontoy hinuse addusako e adduse.

¹⁶Hatte aallo nu erdo era ayti ye esuna nu yesseese.

¹⁷Nuundo nayshito! Fediti taa bisshi yesenike hinunini taa bisshi yesuwayte. Numba bisshi yeseesiti waanidi yesenike naddhi beewayte.

¹⁸Ye esini ha esume buro laga wogga hinuse oti hatteni higilli yeekisine hinuse ta ohenike laga axiti be yesona Kristosay suxi mixi gara e haydhoosuse iilaxita maaddhiko u yese.

¹⁹U wontoy u gawwoko, borsuse abako be kuxa matiko u beene, u muxhuroy maxesi ha saha zeerewoko, u aalliciray bayeko.

²⁰Nuusema nu wudey afaako, yahafa yoonesako nuu loolusesa orje sazana nu kakke. Esini Laaxi Yesuusi Kristosako.

²¹Uddi base be adeto oomo mahese danda'e be osana gafaxe maaqe hay'e nu garako kuxa keenge e gara nu bishoronike e arxe.