Read koorete Qollasiyasaxituse 1 Bible Online

Qollasiyasaxituse 1 - koorete bible

Qollasiyasaxituse 1

¹Wontoy <<Maaquwaye>> hidi hidonike Yesuusi Kristosay ansosa maaqe Phawlosekofaara nu indo na'i Xhimootoosekofaara

²Qollasiyase katamaa yese Kristosaara bidzo maaddhese haylaxitaara esa aadessi e ogiya miindesesaara maaqe indo nayshushe ha woosso nu anxe. Nuuse ade maaqe Wontoy axuse keenge modhe maxowara modhetiyaray hinuse maaquwaye.

³Yesuusi Kristosa hi aadexenikiyara Wonto haylaxita hi eehenikiyara nu siidese gisha hi gisha Wonto nu shi'eniyaka nu Laaxi Yesuusi Kristosaade maaqe Wonto uddi woggaako nu galate.

⁵Hi aadexowara hi eehaaray e kaachuttosi afaaka naqutti hinumba kakke gobbo garako. Ye gobboni aade gisha ohesa maaqe modhe odoy hinuko yoodoniya buro siidiko hi yese.

⁶Modhe odo hi siido wontiyafa aytiyara Wontoy axuse keenge maxo modhetey aba e maaqenike hi erdo wontiyafa aytiyara ha modhe odoy hi giddaaka aafe be kaxhonike uddi ha saha gara aafe kaxhiyakaara diciyakaarako e yese.

⁷Ha modhe odo nuura wolko hantiya yese eehuttese Ephafray hinuko otiko e yese. Esini hi gisha Kristosase bidzi muxhurona hante hantaxuko.

⁸Ayaana Geeshi hinuse indo eeha gishani nuuko zeerdiko e yese.

⁹Ye e gisha ye esa nu siido wontiyafa ayti Wontokofa bente eranaara gaxunaara uddi Wonto maxo hi eroronike era hinuse lagussi e ingoronike hi gisha Wonto shi'e dhaddobaanxhiko.

¹⁰Yeydi e maaqo'ayko Laaxuse yese e worgusenike yessiko uddi ogena Laaxe hi magguse, laga bisha modhe hanta hanti aafe beysenaara Wonto erenaara diceshe hi danda'e.

¹¹Yeydiwo uddi abakona maggana dandadhi hi miimoronikeko keddaydi kuxuttese e osana miimete degexese hi danda'e.

¹²Assi fo'e maaqe kaateto giddaaka haylaxitaara wolko ade maaqe Wontoy ingesa[1] hi shahoronike hinumba mata esako hi galate.

¹³Ye esini Wontoy cencha osaafa numba maardi eehuttese be yele kaatetowa nuu e oodo.

¹⁴E yelena wozuttiko cubbose maaro nu degessese.

¹⁵Kristosay bentese danda'uwa Wontoy be bisha maaqesako e beyse. Esini meddhome uddi angussuko.

¹⁶Ye esini afaakani maaqqe sahaaka yeseesiti, benteesitaara bentuwasitaaray, afaaka yese osaara afanunte keengeesitaaray, durkeesitaara maagitaaray uddina meddhuttosi esunako. Wontoni uddi abako e meddhosi esunaara esusaarako.

¹⁷Esini uddi basume buronako e yecha. Uddi abakoy hanke wola ayti e eedhosi esunako.

¹⁸Esini be gara maaqe Wonto zawa axituse qinoko. Uddi abakose buronase be maaqoronike haybowafa dendena achaara bidzoydi hiyuttesaarako.

¹⁹Yeydi e maaddhosi be wontuntey kumena esuka yesoronike Wontoy eetineko.

²⁰Wontoy suxi mixi gara e gusso suuxuna modhete mati afaakani maaqqe sahaaka yeseesita uddi beera wolko e naddho.

²¹Buro Wontokofa zardi hi maxonaara iita hi hantanaara Wonto inxha'esako hi maaqicha.

²²Hattema e yeley axe maaddhi e haydhosuna[2] Wontoy beera wolko hinumba naddhiko e yese. E naddhosini haylaxaara geeshaara haasse keenguwasa mati be buro hinumba uqusesuko.

²³Esini uqusesi kaachuttiyara sekke hanke hiye baaka eedhesesaara maaddhi hi siidese modhe odoy gobbusesesi garafa arto badi hi aadexona oseydi hi yesa'aykoko. Ye modhe odoni ha saha gara yese meddhose uddi ohuttesesako. Tanini Phawlosey ye modhe odose e hantaxuko ta maaddhese.

²⁴Hatte hi gisha essa ta yese maddhana maggako ta magge. E gara maaddhi yese Wonto zawa axitume hissineko Kristosa maddhaafa facechashe ta acho maddhana kunsi ta alse.

²⁵Wontoy oto modhe odo bidzoni shahe baaka e kumena hinuse ta ohoronike taase e indese adetona Wonto zawaxituse hantaxe[3] maaddhiko ta yese.

²⁶Ha modhe odoni e aalliciray eruttese danda'uttuwasa maaddhi axukofa olo aachutti decechine hattema hayla maaqe aadexeesituse addeydesesako.

²⁷Wonto maxoy ye eruttobadechine hatte eruttasi kuxaara woduntiyara Ayhuda maaquwasiti giddaaka an makko malla e maaqenike haylaxituse adduseko. Ye eruttobadechine hatte eruttasi Kristosako. Hatteni hinukaaka e yesesuna Wonto kuxa fuula shahaxe maaqese gobbe keemako hi keenge.

²⁸Axi be bidzi bidzina Kristosana uuxha axe maaqoronike mahese laga gaxuna uso shi'isiniyara erusisiniyarako Kristosay oone maaqenike nu eruse.

²⁹Ye esusuko Wontoy orje be osana taaka e hantesuna ye e osa badena keddaysi karduttisine ta gakke.