Read koorete 1Teselonqaxituse 2 Bible Online

1Teselonqaxituse 2 - koorete bible

1Teselonqaxituse 2

¹Nuundo nayshito! Hinuko nu handosi yaho e maaquwannike erako hi ere.

²Hi erenike zage Filphisoose katamaaka nu yechoniyaka maddhaara waayyaara nuu u beysakoni axiti numba orjena inxhadhakoni Wontokofa maaqe modhe odo hinuse ohese Wontonako nu oseydo.

³Hinuse modhe odo odde hidi nu otosi nuuse halisine oo'oyne iita maxisine oo'oyne hinumba qaarusisine maaquwasso.

⁴Wontoy hade modhe odo modhussi aykese danda'e axuke mati numba e taattonikeko nu zeere. Nu zeeresini nu muxhurowa yese abako arsi beene Wonto maggusese baaka axe magguseeme hissine maaquwasso.

⁵Go'uwa kato aade bishushi hinumba maggusese nu zeerdosi oo'oyne fetto miijhe eehaafa densi nu zeerdosi nuuse bidzini baasso. Ye esani erako hi ere, Wontoni nuuse atoko.

⁶Kristosay ansosa nu maaqesuna hi gara deexhesa maaqichine hinumbani maaqe fediti numba kuxorosa wordo baanxhiko. Ye esukofa indoy be nayshe hanke beeko aykenikeko shenona hinumba hanke nuuko nu ayto.

⁸Yeydiwo hinumba keddaysi nu eeto. Ye eehaafa dendasuna ha Wonto modhe odo hinuse ohewo e maaddho baanne nu yesoni hinuse garsi ingese naquttiko nu yecha.

⁹Nuundo nayshito! Nu gafeteni maaqqe waakidi kardutti nu hantichosha erako hi ere. Hi giddaaka bidzi axi garani nu deexhuwannike wontani qamani hantisineko Wontokofa maaqe modhe odo hinuse nu ohicha.

¹⁰Wonto aadexiyaka yese hi giddaaka nu yecho woggaaka waakidese geejhetenaara, gizetenaara haasse keenguwa yeso nu yechonike hinumbako nuuse atoy, Wontoni atoko.

¹¹Adey be nayshe aykenike hi bidzi bidzo waysi nu aytosa erako hi ere.

¹²E kaatetowaka hi geloronikiyara e kuxa fuula shahaxe hi maaqoronikiyara hinumba xheyda Wontose e worgusenike hi yesorosa hinumba erusiyakaara osusiyakaarako nu yecha, minsiko hinumba shi'iya nu yecha.

¹³Nuukofa hi siido Wonto kato hi ettoniya hade axi katoke e maaddho baane Wonto aadexiya yese hi giddaaka hantiya yese hade Wonto katoke hi etto gisha uddi woggaakako burse baaka Wonto nu galate. Ye katoni aade Wonto katoko.

¹⁴Nuundo nayshito! Yuuda wudiyaka be godowa godowa yese Yesuusi Kristosana yese Wonto zawaxitako hi bishe. Ye esini Ayhudaxiti ye uso maddha beysonike hinumbani hi wude axiti maddha beysiko u yese.

¹⁵Ayhudaxiti Laaxi Yesuusaara kaayaxitaara u woddho. Numbani waayye beysi u gooddo. Wontoni maggusutto baasso, axuseni uddi iilaxe u maaddho.

¹⁶Ye esini Ayhuda maaquwasiti loolorosa nu ohoroome u tucco. Yeysi mahisineko uddi wogga cubbo gara cubbo kossi hamiya u yese. Ye e gisha Wonto huulay aalliciraaka u gara yoodiko e yese.

¹⁷Nuundo nayshito! Nunimay maxona e maaddho baane achona hi garafa fetto oddhe wogga shahuttakoni hinumba orjenako nu sazzese. Ha e gisha nu aafena hinumba beyese wordiko orjena nu kardutto.

¹⁸Hinuko hamesuko nu wordecha. Fetto tani Phawlosey mati matiko hinuko hamese ta karduttecha. Maaqe baaka Humbayey ta hanguwannikeko tamba e tucco.

¹⁹Nu gobboy oo'oyne nu maggay oo'oyne Laaxi Yesuusay yooneniya e buro esuna nu cee'utte nu moorey hine oonena? Hinumba maaquwaye?

²⁰Aadewo esuna kuxa fuula nu degexesaara nu maggesaaray hinumbako.