Read koorete 1Teselonqaxituse 3 Bible Online

1Teselonqaxituse 3 - koorete bible

1Teselonqaxituse 3

¹Ha e gishako ha esume garsi hinumba ossaddhe dheeddi <<Ateena katamaa nu gooshewoko nu atto>> hidi nu hido geede

²nuundo na'i Xhimootoose hinuko nu ansechoshi. Esini nuura wolko Wonto hantaxaara Kristosa gisha modhe odo ohesaarako. Hinneko hinumba e osusorosaara hi aadexose e minxorosaara esani hinuko nu anso.

³Xhimootoosey hi gara yooda maddhana hi en'uwannikeko hinumba e minxe. Maddhay ni gara yooworonike esuse ni maaddhesesa hinuse erako hi ere.

⁴Aadewo hinunaara wolko nu yecho woggaaka maddhay ni gara yoonenike burussi hinuse otiko nu yecha. Ye nu otechonikeko e maaddho. Ye esani erako hi ere.

⁵Ye e gisha muxhuroy taase utte dheeddinne hi aadexo gisha erese wordi Xhimootoose hinuko ansiko ta yese. Esani anxese ta dandadhosi haliya naadhi beyena eruttese Humbayey hinumba naadhi beeniya hi iichuttine nu hantay yahowo e attoydi ta hooddo gishako.

⁶Hattema Xhimootoosey hinukofa hanke nuuko yoodi hi aadexo gishaara hi eeha gishaara magguse odo e otinne siidiko nu yese. Yeydiwo numba keddaysi maxiya hi yesenikiyara nuni hinumba saziya yese makko hinunini numba saziya yesesaarako esukofa nu siido.

⁷Yoonase nuundo nayshito! Nuni fetto maxona megguttiyakaara haanxhi maddha giddaakaara yesesa nu maaddhakoni hi aadexowafa dendasuna hinuse nu keenge maxona oseydiko nu yese.

⁸Ye esini Laaxaara bidzo maaddhi miindi hi yessosi nuuse yeso e maaqe gishako.

⁹Yoonase hi gisha Wonto buro nu keenge orje maggana Wontose aba bisha galata nu uqusakoni e ellaane?

¹⁰Nu aafena hinumba beyesaara aadexiya hi yesune faceshe bidzi bidzi abakita kunxesaara qamani wontani oseydi Wonto shi'iyako nu yese.

¹¹Hatteni hinuko nu hamoronike beese niise ade maaqe Wontowara ni Laaxi Yesuusaaray nuuse oge gizusuwaye.

¹²Nuni hinumba eehe genno wolusaara fedeesitusaara uddi hi keenge eeha Laaxi hinuse kosuwaye, lagusuwaye.

¹³Laaxi Yesuusay haylaxitaara uddi yooneniyaka nuuse ade maaqe Wonto buro haasse keenguwasaara hayla maaddhiyara hi bentoronike hi muxhuro Laaxi osusuwaye.