Read koorete 2Teselonqaxituse 1 Bible Online

2Teselonqaxituse 1 - koorete bible

2Teselonqaxituse 1

¹Phawlosekofa, Sillaasekofaara Xhimootoosekofaara anxutta woosso. Nuuse ade maaqe Wontowara Laaxi Yesuusi Kristosasaara bidzo maaddhi Teselonqe katamaaka yese Wonto zawa axituse.

²Nuuse ade maaqe Wontowara Laaxi Yesuusi Kristosaaray axuse keenge modhe maxowara modhetiyaray hinuse maaquwaye.

³Nuundo nayshito! Wonto shi'isine uddi woggaa hinumba massi Wonto galatey nuuse worgusesako. Ye esini hi aadexoy diciya yese gishaara hi uddina wola eehiya hi yese gishaarako.

⁴Hi gara yooda waayyenaara maddhanaara uddi hi miindosaara aadessi hi bentosunaarako be godowa godowa yese Wonto zawaxiti da'aaka hinumba nashiya nu yese.

⁵Ye maddhani e beysesi Wonto yaa'ay gizo maaqesako. Ye essafa dendasunako Wontoy esumeydi hissine maddha hi ekke be kaatetose ellesesa mati hinumba e taagge.

⁶Wontoy gizo yaa'a yaa'esa be maaqe gisha hi gara maddha oone axiti gara matiko maddha e oone.

⁷Laaxi Yesuusay keddaydese osaxi be woosaxitaara wolko lawi lawi hidi eexhe tamaanna afaafa be yooneniya ha woggaa maddha giddaa yese hinuse nuura wolko kaxe hi eforonikeko e mahe. Yenniyani Wonto eruwadi yechashitaara nu Laaxi Yesuusa modhe odose woosuttuwadi yechashitaara be gano e kese.

⁹Usini kuxa fuulay essaaka kundese osa keenge Laaxi burofa ooxutti koolo makkina iitti yaha maddha giddaaka u yesoronike yaa'ay u gara e sinte.

¹⁰Ha esini e maaqesi Laaxi yoone wonteko. E yoonesini be haylaxita e matoositi esa kuxorosaara Wonto aadexeesiti esa kedda kedda hisorosaarako. E gisha hinuko nu otosita siidi uddi etti hi yese gisha esa kuxeesitaara wolkoko hi maaqe.

¹¹Ye esa maxisine uddi wogga hi gisha Wonto nu shi'esi Wontoy hinumba be xheydo xheysuse beese hinumba ellesesa e mahoronike modhe hantese hi keenge col'aara aadexowafa densi hi hante hantaara hi alse aallo be osana aandi e ellusorosako.

¹²Ye ogena nu Wonto maxo modhetenaara Laaxi Yesuusi Kristosa maxo modhetenaara Laaxi Yesuusi Kristosa sunxi hinunnana kuxuttoronikiyara hinunini esuna hi kuxuttoronikiyarako Wonto nu shi'e.