Read koorete 2Teselonqaxituse 2 Bible Online

2Teselonqaxituse 2 - koorete bible

2Teselonqaxituse 2

¹Nuundo nayshito! Laaxi Yesuusi Kristosa yoowesaara esuko ni bhikkiluttesusaara odde hidi hissine hinuse nu ohe.

²Ye esini kaayoy addusonike oo'oyne nuukofa odoy sintonike oo'oyne nuukofa woossoy diizutti handonike mati <<Laaxi yoodiko e yese>> hidi hi maxo buddofita, du'eydofita!

³Ooneni hinumba aba ogenani qaarusoppe! Ye esini axiti Wonto gara dendi esa inxha'ey maaddho baanniyara <<Ha esi baanesako>> hidi hiyuttese woga kakkuwa iita birraxi addeydo baanniyara ye wontay yoowasso.

⁴Ye birraxi <<Wonto>> hidi hiyutteesitaara e buro dissuso fede abakitaara iilli bemba kedda kedda e hise. <<Tani Wontoko>> hidi oobadhisine fetto Wonto Hayla Zawaaka e utte.

⁵Hinunaara ta yechoyniya ha zeere hinuko ta zeerdechonike gaxhiya baytuwa?

⁶Beese be woggaaka e addeyorosa hatte abay esa tuciya yesenike erako hi ere.

⁷Ye esini hatte aachiyaanna maaquwaye baaka keddaydese birrey hantuttiyako e yese. Yeysi e hantesini hatte tuciya yesesi e ogiyafa ooxutte aalloko.

⁸Yenniyani Laaxi Yesuusay be asshaafa kese kaxhunxuna wodhesaara be yoone kuxa fuulana e baysesaara maaqe ye birraxi e addeyne.

⁹Ye birraxe maaqe axi yoodi Humbaye hanta hantese e osana kundi laga be bishana bishana yese zaadiya aange micushe abakowara du'use abakowarako e hante.

¹⁰Yeydiwo bayese yese axiti gara be bishana bishana yese iita haluxesako e hante. Bemba haybowafa maarese danda'e aade be eeto baa gisha ye axiti u baane.

¹¹Aade maaqesa <<Ha esi aadeko>> hidi efe inxhadhi cubbona maggeesiti uddi u yaa'uttoronike Wontoy zaade <<Aadeko>> hidi u hiyorosa uso orjena haluxesako e anxe.

¹³Laaxuna eehuttese nuundo nayshito! Uddi wogga hi gisha Wonto galateko numba e worguse. Ye esini Ayaana Geeshuna hi hayloomoronikiyara aadeni <<Aadeko>> hidi hi eforonikiyara mati Wontoy haybowafa maaroronike buronase hi maaqoronikeko hinumba e xhardo.

¹⁴Nu Laaxi Yesuusi Kristosa kuxa fuula shahaxe hi maaqoronikeko nuukona hinuse ohutta modhe odo badena hinumba e xheydo.

¹⁵Yebo, nuundo nayshito! Miindi ee'uwayte! Nuunana oti gaddi hinuse diizzi nu anso erunxe minsi aykuwayte!

¹⁶Beese nu Laaxi Yesuusi Kristosaara nimba eeti niise be keenge maxo modhetena koolo makki aallo nimba e minxoronike mati modhe gobboni niise inda nuuse ade maaqe Wontowaray

¹⁷hi muxhuro minxuwaye. Modhe maaqesa hi hantoronikiyara hi zeeroronikiyara osusuwaye.