Read koorete 1Xhimootoosese 1 Bible Online

1Xhimootoosese 1 - koorete bible

1Xhimootoosese 1

¹Nimba loolusa Wontowara esa gobbe ni mahe Yesuusi Kristosaaray otonikeko tani Phawlosey anxuttase maaddhi ta maagetto.

²Hidiko neese Xhimootoosese ha woosso ta diize. Wonto ne aadexe gisha aadewo neni ta yeleko. Ade maaqe Wontowara nu Laaxi Yesuusi Kristosaaray axuse keenge modhe maxoni, maaroni, modheteni neese maaquwaye.

³Maqadooniya hangisine neese odde hidi ta hidonike Efesooniyaka uttuwa. Yaaka bidzi bidzi axiti zaade era erusiyako u yese. <<Ha e bisha erusofita!>> hidi ususe minsi ohuwa.

⁴Assi olo gisha eruttuwa mamako garaara taafutti ittuwaa yelutte taafo garaara wogga u garxuwannike ohuwa. Ye esa bishe zeerey bersawo e oonesa baaka Wonto gobbe mahisine hantutte Wonto hanta go'uwasso.

⁵Ye neese ta woosso woossose e alsomay geeshi muxhuronani maaqqe iita modhe shati ere muxhuronani awsha keeguwa aadexonani aadexeesiti wola u eehesako.

⁶Ye bidzi bidzi axiti ha zeerita dhaddi Muse woga erusesa maaqe wordiko go'uwa bersaaka dhaddi u gellese. Geluttuwaye baaka be zeere zeeriyara <<Ha esa erako nu ere>> hidi be hinesaara eruttuwasso.

⁸Muse wogay e worguse godowa go'uttete modhe e maaqesa erako nu ere.

⁹Wogay e inguttosi gizo axuse e maaquwannike erako ni ere. Wogamay e inguttosi woga kakkuwasituse, woosuttuwasituse, Wonto jhashuwashituse, cubbachituse, haylonte eruwasituse, Wonto zeere haasseesituse, ade indo wodheesituse, axe wodheesituse,

¹⁰laggeteesituse, asanxe maaqichine fede asanxaara laggete asanxuse, axe zal'eesituse, zaaddeesituse, zaade caaqeesituse, ye usita bissheshe gizo erunxe inxha'e fede hanta hanteesituse uddiko.

¹¹Ha gizo erunxi kuxa fuula keenge modhe odowara wola efako ekke. Ye esini axiti esa kedda kedda hise Wontokofa axituse ta ohoronike taako odde hissine inguttesesako.

¹²Muxhuraxe taa mati esuse ta hantorosa tamba maagessi osa taase inda nu Laaxi Yesuusi Kristosay galatuttuwaye.

¹³Ha esume buro Kristosa cashesha, aadexeesita waayye beysesa, iita daafe hantesako ta maaqicha. Ere dheeddiyara esa aadexe dheeddiyara ta hanticho gishako tamba e maardo.

¹⁴Wontoy be eehaafa dendasuna axuse e keenge maxo modhetey taase keddaydi e laddo. Yesuusi Kristosaara wolko ta keenge bidzetona maaddhasuna esa ta aadexoronikiyara ta eehoronikiyara e mato.

¹⁵<<Yesuusi Kristosay ha saha gara e yoodosi cubbachita maaresuko>> yeydi ohutta katoy aadeko. Ye esani axeydosi uddi eezzo badi aadekoydi efeko e worguse. Cubbassaafa bidzo hissoosi tambako.

¹⁶Ye esa ta maaddhakoni Wontoy tamba e maardo. Cubbassaafa buronase maaqe tamba e maardosini Yesuusi Kristosay keddaydese cubbachushe aba makkina danda'o be keengesa beysesuko. Fediti tamba beedi Wonto aadessi koolo makkina yeso degexese be danda'enike gaxhesuko u danda'e.

¹⁷Koolo makkina kaate maaqesuse, hay'e eruwasuse, aafese bentuwasuse, esawoy Wonto maaqesuse kuxaara galataaray koolo makkina maaquwaye. Ameen.

¹⁸Ta na'o Xhimootoose, buro ne gisha ohuttecha kaayo hixa matiko ha woosso neese ta anxe. Ye kaayona naassi oseydi darguttuwa.

¹⁹Ne aadexo dattofuna, ne muxhurowa <<Iitako ne hanto>> hidi hinesa keenguwasa yesuwa. Bidzi bidzi axiti be muxhurowa <<Iitako ne hanto>> hidi hineesuse woosutte dheeddiko bidzi iita abakoy e gara ellese markabeke maaddhi be aadexo u woddusso.

²⁰Ye esa bishe geriti giddaa Hermenosiyara Iskindiriyaray yesako u yese. Ye usiti Wonto be cashuwannike u lossorosa hissine Humbayese garsi indiko ta yese.